SANTIAGO 1 - Biblia Quichua Cañar 2010

Santiago saludashpa quillcashcamanta

1Ñucaca Diospacta, Apunchic Jesucristopacta ruhuac Santiagomi cani. Israelpac chunga ishcai aillucuna shic-huarishpa, caipi chaipi causaccunatami “allillachu canguichic” nishpa, quillcani.

Llaquicuna japicpipish cushicuna cashcamanta

2Ñuca cuyashca criccuna, cancunata ima llaquicuna japicpica, achcata cushicunguichic.

3Cancuna cric cashcamanta ima llaqui japicpica, mana piñarishpa, alli shunguhuan llaquicunata apana cashcataca cancunallatacmi yachanguichic.

4Ashtahuanpish tucuimanta yallica mana piñarishpa, alli shunguyuc canata yuyaichic. Chashna cashpami alli sinchiyashpa, imapish mana illac, alli criccuna canguichic.

5Cancunapuramanta maijanpish yachaita mana charishpaca, Diosta mañaichic, paica cungallami. Diosca pimanpish mana misarishpami, tucui mañaccunamanca achcata cunga.

6Ashtahuanpish cancuna mañashpaca, crishpami, japina yuyailla mañana canguichic. Maijanpish jahua shungulla mañacca, cucha yacu huairahuan caiman chaiman cuyucuc shinallami can.

7Maijanpish chashna mañacca Mandac Diosmanta imata japina cashcata ama yuyachun.

8Chashna mana shuc yuyailla cac runaca tucui causaipimi mana alli causan.

9Maijan cric imata mana charishpapish, Dios jatunyachina cashcamantaca cushillami cana can.

10Shinallatac chayucpish Dios yangallata ruhuacpica cushillami cana can. Chayucca quihua sisa chaquiric shinami tucunga.

11Yuraca inti llucshishpa, nina rupaihuan chaquichicpica, sisaca urmanmi, pai sumac cashcaca chingarinmi. Chai shinallatacmi chayucpish, paipac randina, catunapica chingarin.

Mana alli munaicuna shamucpi, mishana cashcamanta

12Imapish millai munaicuna shamucpi, chaita mishacca mai cushillami can. Chashna mishacmi Dios paita cuyaccunaman cusha nishca causaita cuc coronata japinga.

13Maijantapish mana alli ruhuana munaicuna japicpica, “Diosmi chai munaitaca cun” nishpa, ama yuyachun. Diosca jaicapi mana allitaca mana ruhuanchu. Ima mana allicunata ruhuachunpish millai yuyaitaca mana cunchu.

14Ashtahuanpish quiquinllapitac mana alli munaicuna tiyashcamantami, mishquilliric shina, mana allita ruhuanaman pushan.

15Chai shina mana alli munaicunamantami, juchaca chichushca shina tucushpa huacharin. Chai juchata ruhuacpica huañuimanmi apan.

16Ñuca cuyashca criccuna, ama pandarichicchu.

17Jahua pachapi sumac achiccunata ruhuac Diosmantami, ima allita ruhuana yuyaipish, cashcata ruhuana yuyaipish shamun. Paica mana shuctacyanchu, llandu shinapish mana tucunchu.

18Diosca chai shina munashcamantami, cashcata nic alli huillaita huillashpa, ñucanchicmanca causaita curca. Tucui pai ruhuashcacunamanta ñucanchic punta cachunmi, chashnaca ruhuarca.

Alli huillaita huillashcata pactachina cashcamanta

19Ñuca cuyashca criccuna, imapish uyanallataca alli uyaichic. Rimaringapacpish, piñaringapacpish jarcariccuna caichic.

20Pipish piñaricca, Dios munashcataca mana ruhuanchu.

21Chashna cashcamanta tucui mapamanta, shinallatac tucui mana allicunamanta anchurishpa, cancunapac shungupi tarpushca alli huillaitaca cuyac shunguhuan chasquichic. Chai alli huillaimi cancunataca quishpichinata pudin.

22Dios rimashcacunataca ama uyaccunalla caichicchu, pactachiccunatac caichic. Chashna uyaccunalla cashpaca, cancunallatacmi pandaringuichic.

23Maijanpish Dios rimashcata uyashpa mana pactachicca, paipac ñahuita espejopi ricuric shinallami.

24Espejopi ricurishpa, anchurishpaca, pai ima shina cashcataca cungarinmi.

25Ashtahuanpish huatashca shina cashcamanta cacharichic, Dios mandashpa rimashca shimita uyashpa, mana cungarishpa, shungupi huacaichicca imata ruhuashpapish cushicungami.

26Maijanpish “ñucaca Diosta alli cricmi cani” nishpapish, paipac calluta mana jarcaricca paillatacmi pandaricun. Pai “alli cricmi cani” nishcaca, yangallami can.

27Diospac ñaupapi mapa illac, Diosta alli cricmi cani ninaca, llaquipi cac viuda huarmicunatapish, taita mama illaclla cac huahuacunatapish ayudanami can. Shinallatac cai pachapi tiyac imapish mana allicunamanta huacaichirinami can.