1Mana cazushcata perdonashca,
tucui juchacunatapish cungarishca
runaca mai cushicunmi.
2Mandac Dios mana juchanchishca
runaca cushicunmi.
Paipac shungupica llullana
munaica mana tiyanchu.
3Ñuca juchacunata Diosman
mana huillashpa yallita
llaquiricpica, punzhantami ñuca
tullucunaca maucayashpa catirca.
4Tutapish, punzhapish cambac maquica
llaquichishpami catirca.
Verdinlla quihua shina cashpapish,
usyaipi chaquishca
quihua shinami tucurca.
5Ñuca juchacunata huillashpaca
ima mapata ruhuashcatapish
mana pacashpami huillarcani.
Ñucaca: «Canta mana cazushcataca
can Mandac Diosmanmi huillasha»
nircani.
Chashna huillacpimi, ñuca millaita
ruhuashpa juchallishcataca
perdonarcangui.
6Chashna cacpimi, canta cazuccunaca
can uyana punzhapi mañangacuna.
Jatun yacu jundac shina
shamushpapish paicunataca
manatac japingachu.
7Canmi ñuca jarcarina cangui.
Llaquicunamanta cuidashpa,
quishpirishcata huillac
cantocunahuan, ñucata muyunguiyari.
8Canmi: «Allita entendichishpa
yachachishpa can purina ñanta
ricuchisha. Ñuca ñahuihuanmi
cantaca ricurasha.
9Ama caballo shina,
mana cashpaca mula shina
yuyai illac caichu.
Chaicunataca anguhuan huatashpa,
frenota shimipi churashpami
cazuchincuna.
Mana chashna ruhuashpaca
mana cuchuyai pudinguichu» nircangui.
10Diosta mana manchactaca
jatun nanaicunami japinga.
Ashtahuanpish Mandac Diosta
shuyactaca paipac cuyaihuanmi
pilluchic shina huacaichinga.
11Cashcata ruhuaccunalla,
Mandac Diosmanta cushicuichicyari.
Shungupi ima millai yuyaita
mana chariccuna cushicushpa
cantaichicyari.
Who We AreWhat We EelieveWhat We Do
2025 by iamachristian.org,Inc All rights reserved.
