1 REYES 19 - Biblia Quichua Cañar 2010

Eliasca Horeb urcupi miticungapac rishcamanta

1Acabca Elías tucui ima ruhuashcata, Baalmanta huillaccunata ima shina espadahuan huañuchishcatami Jezabelman huillarca.

2Shina huillacpimi, Jezabel Eliasman huillachun shuc huillacta cachashpaca: «Chai huillaccunata huañuchishca shinallatac cantapish caya cashna horasllatatac mana huañuchicpica, ñucatapish dioscunaca yallita llaquichichun» nishpami huillachun cacharca.

3Chashna huillacpimi, Eliasca mancharishpa ama huañuchichun nishpa, Judá llacta Beerseba puebloman rirca. Chai pueblopimi paita servictaca saquirca.

4Paica shitashca pambata tucui punzha rishpami enebro yura ucuman chayashpa tiyarirca. Pai huañunata munashpaca: «¡Mandac Dioslla, caicamanllami causanata munani! ¡Ñuca causaita quichuilla! ¡Ñucaca ñaupa taitacunata yalli ashtahuan allipish mana canichu!» nirca.

5Eliasca enebro yura ucupi siririshpami sueñurca. Pai shina sueñucucpimi, shuc ángel tuparishpaca: «Jatari, micui» nirca.

6Shina nicpi, Elías jatarishpa ricucpica, paipac uma ladopimi cusashca shuc tortillata, shinallatac shuc mangapi yacu tiyacucta ricurca. Chaita micushpa, ubiashpaca cutinmi sueñungapac siririrca.

7Chashna sueñucucpimi, Mandac Diospac ángel cutin shamushpa tuparishpaca: «Jatari, micui. Cambac purinaca achca carumi» nirca.

8Shina nicpimi, Eliasca jatarishpa micurca, yacutapish ubiarca. Chaita micushpaca, ña sinchiyashpami, chuscu chunga punzha, chuscu chunga tutata Diospac Horeb urcuman chayangacaman rirca.

9Ña chai urcuman chayashpaca, shuc jatun machaiman yaicushpami chai tutaca chaipi pacarirca. Pai chaipi cacpimi, Mandac Diosca:

—¿Elías imatatac caipica ruhuacungui?— nirca.

10Shina nicpimi paica:

—Ñucaca Mandac Diosta yallita cuyashcamantami llaquirini. Israelcunaca canhuan ari nishcatapish, cambac altarcunatapish shitashpami rishca. Canmanta huillaccunataca espadahuanmi huañuchishca. Chai huillaccunamantaca ñucallami saquirishcani. Cunanca, ñucatapish huañuchingapacmi mashcacuncuna— nirca.

11Shina nicpimi, Mandac Diosca:

—Canzhaman llucshishpa, cai urcullapitac ñucapac ñaupapi shayari— nirca.

Mandac Dios chashna nishpa, chaita pasacpica, yallita sinchi huairami shamurca. Chai huairami Mandac Diospac ñaupapi lomacunatapish tuñirca, rumi quingraicunatapish paquirca. Chashna cacpipish, Mandac Diosca chai huairapica mana carcachu. Huaira pasarishca quipaca allpami chucchurca. Mandac Diosca chai allpa chucchuipipish mana carcachu.

12Allpa chucchushca quipaca, ninami ricurirca. Mandac Diosca chai ninapipish mana carcachu. Ninapac quipaca huaira allilla huacacucmi uyarirca.

13Elías chaita uyashpaca, pai jahualla churarishcahuan ñahuita jarcarishpami tapashpa, canzhaman llucshishpa chai jatun machai pungupi shayarirca. Elías chaipi shayacucpica:

—¿Elías imatatac caipica ruhuacungui?— nirca.

14Chashna nicpimi paica:

—Ñucaca Mandac Diosta yallita cuyashcamantami llaquirini. Israelcunaca canhuan ari nishcatapish, cambac altarcunatapish shitashpami rishca. Canmanta huillaccunataca espadahuanmi huañuchishca. Chai huillaccunamantaca ñucallami saquirishcani. Cunanca ñucatapish huañuchingapacmi mashcacuncuna— nirca.

15Shina nicpimi, Mandac Diosca:

—Can maita shamushca ñanllatatac cutishpa ri. Damasco pueblo cuchulla shitashca pambaman chayashpaca, Hazael runata Siria llactata jatun mandac cachun aceitehuan cahuingui.

16Nimsipac churi Jehutaca Israel llactata jatun mandac cachun, aceitehuan cahuingui. Shinallatac Abel-mehola pueblopi causac Safatpac churi Eliseotaca cambac randi ñuca ima nishcata huillac cachun aceitehuan cahuingui.

17Chashna ruhuacpimi, Hazaelpac espadahuan huañuchinamanta miticushpa rictaca Jehú huañuchinga. Jehupac espadahuan huañuchinamanta miticushpa rictaca Eliseo huañuchinga.

18Ñucaca israelcunapurapica Baal diosta mana cunguric, paicunapac shimihuan mana muchaccunataca canchis huaranga runacunatami saquigrini— nirca.

Eliseota churashcamanta

19Chai urcumanta rishpami, Eliasca Safatpac churi Eliseo chunga ishcai yuntacunahuan yapucucman chayarca. Shuc yuntapica paillatacmi tucuipac huashata caticurca. Eliasca Eliseopac ñaupata rishpami, pai jahualla churarishcata Eliseopac jahuapi shitarca.

20Chashna ruhuacpimi, Eliseoca yuntata saquishpa, Eliasta catishpa rishpaca:

—Ñuca taitata, ñuca mamata muchashpa cayacaman ningapac shuyai. Chai quipaca canta catishallami— nirca.

Shina nicpimi Eliasca:

—Cutimugrilla, ñucaca mana jarcacunichu— nirca.

21Shina nicpimi, Eliseo rishpaca huagracunata huañuchishpa, armata yantata ruhuashpa aichata cusashpa gentecunaman cararca. Chai quipaca, Eliasta catishpa rishpami paita servirca.