NÚMEROS 29 - Biblia Quichua Cañar 2010

1Canchisniqui quilla, callari punzhapica ñucapaclla tandanacuita ruhuashpa, ama ima trabajota ruhuanguichicchu. Chai punzhaca trompetapi sinchita tocana punzhami canga.

2Mandac Dios ñucaman mishquilla ashnachunca ima mana tucushca shuc becita, shuc cari ovejata, shuc huatayuc canchis cari ovejata tucui rupachinguichic.

3Shinallatac cada becihuan sucta kilo alli harinata aceitehuan chapushpa cunguichic. Cada cari ovejahuan chuscu kilo chaupi harinata aceitehuan chapushpa cunguichic.

4Shinallatac shuc huatayuc canchis cada ovejahuanca ishcai kilo alli harinata aceitehuan chapushpa cunguichic.

5Juchata pichachunca shuc cari chivota cunguichic.

6Chaicunataca mandashca shina quillanta ñucaman cushpa, tucui rupachishca jahua, harinahuan aceitehuan chapushpa cushca jahua, punzhanta tucuita rupachishca jahua, tallina vinota cushca jahuami Mandac Dios ñucaman mishquilla ashnachun rupachina canguichic.

Diosman cutirishpa llaquirinamanta

7Canchis quilla, chunga punzhapica ñucapaclla tandanacuita ruhuashpami, shungupi llaquirina canguichic. Chai punzhapica ama ima trabajota ruhuanguichicchu.

8Mandac Dios ñucaman mishquilla ashnachunca ima mana tucushca shuc becita, shuc cari ovejata, shuc huatayuc canchis ovejata tucui rupachinguichic.

9Chai animalcunahuanca sucta kilo alli harinata aceitehuan chapushpa, cada becihuan rupachinguichic. Cada cari ovejahuan chuscu kilo alli harinata aceitehuan chapushpa cunguichic.

10Shuc huatayuc cada ovejahuanca ishcai kilo alli harinata aceitehuan chapushpa cunguichic.

11Juchata pichachunca shuc cari chivota cunguichic. Chaicunataca ñuca juchata perdonachun cushca jahuapish, punzhanta ñucaman cushpa, grano ofrendata tucuita rupachishca jahuapish, tallina vinota cushca jahuapishmi cuna canguichic.

Chucllacunata ruhuana fiestamanta

12Canchis quilla chunga pichca punzhapica ñucapaclla tandanacuita ruhuanguichic. Canchis punzhata Mandac Dios ñucapac fiestata ruhuashpa, ama ima trabajota ruhuanguichicchu.

13Mandac Dios ñucaman mishquilla ashnachunca ima mana tucushca chunga quimsa becita, ishcai cari ovejata, shuc huatayuc chunga chuscu cari ovejata tucuita rupachinguichic.

14Chai chunga quimsa cada becihuanca sucta kilo yalli alli harinata aceitehuan chapushpa cunguichic. Cutin chai ishcai cari ovejahuanca chuscu kilo yalli alli harinata aceitehuan chapushpa cunguichic.

15Shinallatac shuc huatayuc chunga chuscu ovejacunahuanca ishcai kilo yallita harinata aceitehuan chapushpa, cada ovejahuan cunguichic.

16Juchata pichachunca shuc cari chivota cunguichic. Chashnami punzhanta animalcunahuan harinahuan tucuita rupachishca jahuapish, tallina vinota cushca jahuapish cuna canguichic.

17Ishcainiqui punzhapica ima mana tucushca chunga ishcai becita, ishcai cari ovejata, shuc huatayuc chunga chuscu cari ovejata cunguichic.

18Grano ofrendata, tallina vinotaca chai cushca becicuna, cari ovejacuna, shuc huatayuc ovejacuna mashna cashcata ricushpa cunguichic.

19Juchata pichachunca shuc cari chivota cunguichic. Chaicunataca punzhanta animalcunahuan harinahuan ñucaman cushpa, tucui rupachishca jahuapish, tallina vinota cushca jahuapishmi cuna canguichic.

20Quimsaniqui punzhapica ima mana tucushca chunga shuc becita, ishcai cari ovejata, shuc huatayuc chunga chuscu cari ovejata cunguichic.

21Animalcunahuan cuna ofrendata, tallina vinotaca chai cushca becicuna, cari ovejacuna, shuc huatayuc ovejacuna mashna cashcata ricushpa cunguichic.

22Juchata pichachunca shuc cari chivota cunguichic. Chaicunataca punzhanta animalcunata grano ofrendahuan ñucaman cushpa, tucui rupachishca jahuapish, tallina vinota cushca jahuapishmi cuna canguichic.

23Chuscuniqui punzhapica ima mana tucushca chunga becita, ishcai cari ovejata, shuc huatayuc chunga chuscu cari ovejata cunguichic.

24Animalcunahuan cuna grano ofrendata, tallina vinotaca chai cushca becicuna, cari ovejacuna, shuc huatayuc ovejacuna mashna cashcata ricushpa cunguichic.

25Juchata pichachunca shuc cari chivota cunguichic. Chaicunataca punzhanta animalcunata harinahuan ñucaman cushpa, tucui rupachishca jahuapish, tallina vinota cushca jahuapishmi cuna canguichic.

26Pichcaniqui punzhapica ima mana tucushca iscun becita, ishcai cari ovejata, shuc huatayuc chunga chuscu cari ovejata cunguichic.

27Animalcunahuan cuna grano ofrendata, tallina vinotaca chai cushca becicuna, cari ovejacuna, shuc huatayuc ovejacuna mashna cashcata ricushpa cunguichic.

28Juchata pichachunca shuc cari chivota cunguichic. Chaicunataca punzhanta animalcunata grano ofrendahuan ñucaman cushpa, tucui rupachishca jahuapish, tallina vinota cushca jahuapishmi cuna canguichic.

29Suctaniqui punzhapica ima mana tucushca pusac becita, ishcai cari ovejata, shuc huatayuc chunga chuscu cari ovejata cunguichic.

30Animalcunahuan cuna grano ofrendata, tallina vinotaca chai cushca becicuna, cari ovejacuna, shuc huatayuc ovejacuna mashna cashcata ricushpa cunguichic.

31Juchata pichachunca shuc cari chivota cunguichic. Chaicunataca punzhanta animalcunata grano ofrendahuan ñucaman cushpa, tucui rupachishca jahuapish, tallina vinota cushca jahuapishmi cuna canguichic.

32Canchisniqui punzhapica ima mana tucushca canchis becita, ishcai cari ovejata, shuc huatayuc chunga chuscu cari ovejata cunguichic.

33Animalcunahuan cuna grano ofrendata, tallina vinotaca chai cushca becicuna, cari ovejacuna, shuc huatayuc ovejacuna mashna cashcata ricushpa cunguichic.

34Juchata pichachunca shuc cari chivota cunguichic. Chaicunataca punzhanta animalcunata grano ofrendahuan ñucaman cushpa, tucui rupachishca jahuapish, tallina vinota cushca jahuapishmi cuna canguichic.

35Pusacniqui punzhaca ñucata yuyarina punzhami. Chai punzhapica ama ima trabajota ruhuanguichicchu.

36Mandac Dios ñucaman mishquilla ashnachunca ima mana tucushca shuc becita, shuc cari ovejata, shuc huatayuc canchis ovejata tucui rupachinguichic.

37Chai becihuan, cari ovejahuan, shuc huatayuc ovejahuan cuna grano ofrendata, tallina vinotaca chai cushca animalcuna mashna cashcata ricushpa cunguichic.

38Juchata pichachunca shuc cari chivota cunguichic. Chaicunataca punzhanta animalcunata harinahuan tucuita rupachishca jahuapish, tallina vinota cushca jahuapishmi cuna canguichic.

39Chashnami ñucapac fiesta punzhapica ruhuana canguichic. Chaicunataca ñucaman cushpa tucuita rupachishca jahuapish, grano ofrendata, tallina vinota cushca jahuapish, ñucahuan alli tucungapac cushami nishcamanta cushca jahuapish, quiquin munaimanta cushca jahuapishmi cuna canguichic» nirca.

40Moisesca Mandac Dios mandashca shinallatacmi tucui israelcunamanca huillarca.