HEBREOS 7 - Biblia Quichua Cañar 2010

Jesusca Melquisedec shinallatac cura cashcamanta

1Melquisedecca jahua pacha Diospac curapish, Salem llactata jatun mandacpishmi carca. Abraham jatun mandaccunahuan macanacushpa, mishashpa shamucpica, Melquisedecca tupangapac llucshishpami, Dios bendiciachun nirca.

2Chaimantami Abrahamca macanacushpa quichushcacunata, chungamanta shucta Melquisedec curaman curca. Melquisedec shutica: “Cashcata ruhuac jatun mandac” nisha ninmi. Shinallatac: «Salem llactata mandac» nishcapish, “cushi causac mandac” nisha ninmi.

3Melquisedecpac taita mamamantapish, paipac aillucunamantapish pi cashcaca mana yacharinchu. Pai huacharishcamantapish, huañushcamantapish pi mana yachanchu. Chaimantami Diospac Churi shina huiñai huiñaita Diospac cura can.

4Chaimanta Melquisedectaca, jatun cashcatami yuyanchic. Ñucanchic taita Abraham mandaccunahuan macanacushpa quichushcacunata chungamanta shuctami Melquisedecman curca.

5Moisés mandashcapish nishca shina, Levipac huahua huahuapuracunami curacuna cashpaca, israelcuna chungamanta shucta cushcata japicmi carca. Chashnami Abrahampac huahua huahuacuna cashpapish ruhuac carca.

6Ashtahuanpish Melquisedecca mana Levipac huahua huahuapura cashpapish, Dios cushami nishcata chasquic Abrahammanta chungamanta shucta chasquircami. Chashnami, Melquisedecca Abrahamman Dios bendiciachun nirca.

7Chaica maijanpish bendiciacmi bendicionta chasquicmanta yalli. Chaitaca pi mana chashnachu mana ni pudinchu.

8Huañunalla runacunami chungamanta shucta chasquincuna huañunalla runacunami, ashtahuanpish Melquisedecmantaca nishpaca, mana huañushca shinatami Dios quillcachishcapica nicun.

9Chungamanta shucta chasquic Leví curacunapish, Abraham Melquisedecman cuc shinami cuncuna.

10Melquisedec Abrahamta tupangapac llucshicpica, Levipac huahua huahuapuracunaca manarac huacharishpa, Abrahampac cuerpopiracmi carca.

11Israelcunaca Aarón huahua huahuapuramanta cac Leví curacunamantami Moisés mandashcacunataca chasquirca. Chai curacuna gentecunata allichishca cacpica, shucta cura mana ricurinmanchu carca. Chai curaca mana Aarón shinachu carca, ashtahuanpish Melquisedec cura shinami carca.

12Shuctac cura shamucpica, mandashcacunapish shuctacyarinmi.

13Chashna nishpaca, Apunchic Jesusmantami nicun. Paica mana Levipac huahua huahuapurachu, paipac ñaupa taitacunapish jaicapi mana curacunachu cashca.

14Ashtahuanpish ñucanchic Apunchic Jesusca Judapac aillumantami carca. Shina cacpipish, Moisesca chai aillupuramanta cura shamuna cashcataca, jaicapi mana nircachu.

15Melquisedec shina shuc mushuc cura ricuricpica, ñucanchic nicushcaca chashnatac cashcatami ricuchin.

16Mana runacuna mandacushca shina, mana maijan aillumanta, nishca shinachu carca, ashtahuanpish mana tucuric, causaita charicmi carca.

17Dios quillcachishcapica paimantaca:

“Canca Melquisedec shinami,

huiñai huiñaipac cura cangui” nin.

18Chaimantami ñaupa mandashcataca imapac mana alli, mana ruhuaipac saquirin.

19Moisés mandashcacunaca pactachishpaca, pita jucha illacta ruhuarca. Chaimantami Diospacman chayaringapacca shuc sumac shuyana cashcata shuyacunchic.

20Chai curaca Dios-huan ari nishcamantami tiyarca. Shuctac curacunaca mana chai shinachu carca,

21ashtahuanpish Apunchic Jesusca Dios-huan ari nishcamantami cura carca. Chaimantami Dios quillcachishcapica:

“Ñuca shimihuan pactachishatacmi

nishcataca mana shuctacyachishachu.

‘Canca huiñai huiñaipacmi

cura cangui’ nini” ninmi.

22Chaimantami Jesusca tucuimanta yalli alli mushuc ari ninacuita ruhuan.

23Caishuc curacunaca mana huañuita servi pudircachu. Chaimantami tauca curacuna tiyashca.

24Ashtahuanpish Apunchic Jesucristoca huiñaitami causacun. Chaimanta pai cura shina ruhuacca mana shuctacyanchu.

25Paimanta Diospacman cuchuyaccunataca, huiñai huiñaipacmi quishpichin. Paica huiñaitami causacun, chashnami huiñaita mañacun.

26Paica ñucanchic charishun nishca jatun mandac curami. Paica jucha illac, ima mapa illac, ima millaita mana ruhuac, shinallatac juchayuccunamantapish anchurishcami can. Paitaca jahua cielomanta yalli jahuapimi Diosca churashca.

27Jesusca mana shuctac curacuna shina puntaca paipac juchacunamanta, quipaca tucui gentecunapac juchacunamanta animalta Diosman cushpa, rupachicchu, ashtahuanpish Apunchic Jesucristoca huiñaipac shuc cutinlla huañushpami, paillatac Diosman curishpa huañurca.

28Moisés mandashcaca juchayuc runacuna jatun mandac cura cachun nin, ashtahuanpish Dios, pai ari nishpaca, Moisés mandashcacunamanta quipa cashpapish, huiñaita pactachic paipac Churitami jatun mandac cura cachun nin.