1Mandac Diosmi Cirotaca aceitehuan
cahuishpa mandac cachun churarca.
Paitami alli lado maquimanta
aisashpa, shuc llactapi
causaccunata cumurichichun,
jatun mandaccuna
chumbillirishcata
surcuchichun apamurca.
Shinallatac paipac ñaupapi
pungucuna pascashca saquirichunmi
chashnaca apamurca.
Mandac Diosca paitaca:
2«Ñucami cambac ñaupata rishpa,
urcucunatapish pambayachisha.
Bronce pungucunatapish
paquishpami,
fierro aldabacunataca ñutuchisha.
3Chaipi sumac pacashcacunatapish,
pi mana ricushca
huacaichishcatapish
canmanmi cusha.
Israelcunata Mandac Diosca,
ñuca cashcata yachachun,
shinallatac canta shutipi
cayashcata yachachunmi
chashnaca ruhuasha.
4Ñucata servic Jacobotapish,
ñuca acllashca israelcunatapish
cuyashcamantami cantaca
shutipi cayarcani.
Ñucata can mana ricsicpipish,
cantaca tucui mashna ricsishca
cachunmi churarcani.
5Ñucallami Mandac Diosca cani.
Shuctac Diosca mana tiyanchu.
Ñucamanta shuctac Diosca
mana tiyanchu.
Can ñucata mana ricsicpipish,
ñucami alli chumbillichic shina
sinchiyachircani.
6Chaica, inti llucshic ladomanta
inti tigrana ladocaman
causaccunaca
ñucaca Mandac Dios cashcata,
shuctac Diosca mana tiyashcata
yachachunmi chashnaca ruhuarcani.
7Ñucami punzhatapish,
amsatapish ruhuani.
Ñucami cushi causaitapish,
llaqui causaitapish cuni.
Mandac Dios ñucami
tucui caicunata ruhuarcani.
Mandac Diosca tucuita ruhuaccashcamanta8Jahua pacha, jahuamanta
tamyata cachac shina,
cashcata ruhuana
yuyaita cachaiyari.
Puyupish tamyata cachac shina,
cashcata ruhuana
yuyaita cachaiyari.
Allpapish quishpirina tiyachun,
cashcata ruhuana yuyai tiyachun
pascariyari.
Mandac Dios ñucami
chaicunataca ruhuarcani.
9¡Aij manga callana shina
cashpapish ñucata piñachiccunalla!
Callanata ruhuana allpaca
paita ruhuactaca:
“¿Imatatac ruhuangui” ningachu?
¿Imata pai ruhuashcaca:
“Canca maqui illacmi cangui”
ningachu?
10Aij, taitata:
“¿Imapactac ruhuarcangui?”
niccunalla, mamata: “¿Imapactac
sajuarircangui?” niccunalla» ninmi.
11Israelcunata ruhuac jucha illac
Mandac Diosca:
«¿Quipa punzha ima tucunatachu
tapunguichic?
¿Ñuca maquihuan ruhuashca
huahuacunamantachu tapunguichic?
12Ñucaca cai pachata ruhuashpami
chaipica runata causachun
churarcani.
Ñuca maquihuan jahua pachata
ruhuashpami,
chaipi lucerocuna tiyachunpish
mandarcani.
13Ñucami mandac Cirotaca
cashcata ruhuanata yachachishpa,
alli ñanta pusharcani.
Paimi ñuca llactataca
cutin shayachishpa,
ñuca acllashcacunata
prezumanta cacharichimunga.
Paica ima cullquita,
ima caranata mana japishpami
chashna ruhuanga» ninmi.
Chaitaca tucuita
Mandac Diosmi nini.
14Mandac Diosca:
«Egiptopi causaccuna
ima charishcapish,
Etiopía llactapi randishcapish,
Sabá llactapi causac
jatun runacuna charishcapish
cambacmi tucunga.
Cambac huashataca cadenahuan
huatashcami catingacuna.
Cambac ñaupapi llaquilla tucushpa
cumurishpaca:
“Diosca canhuantacmari.
Shuctac Diosca mana tiyanchu.
15Israelcunapac quishpichic
Mandac Dioslla, canca
mana ricuric Diosmi cangui”
ningacuna.
16Yangalla dioscunata
ruhuaccunami pingaichishca,
cumurichishca canga.
Chashnami yallita llaqui tucunga.
17Ashtahuanpish israelcunaca
Mandac Dios quishpichicpimi,
huiñaita causanga.
Chashnami huiñaita mana
pingaichishca,
mana cumurichishca canga» ninimi.
18Jahua pachatapish,
cai pachatapish Diosca sumactami
ruhuarca.
Yanga tiyachunca mana ruhuarcachu.
Ashtahuanpish chaipi
causachunmi ruhuarca.
Mandac Diosca:
«Ñucallami Mandac Dios cani,
ashtahuan shuctac Diosca
mana tiyanchu.
19Ñucaca cai pachapica
mana pacalla amsapichu
rimarircani.
Jacobopac huahua huahuacunataca:
“Ñucataca yangami mashcanguichic”
mana nircanichu.
Ñucaca cashcata, allita rimac
Mandac Diosmi cani.
Mandac Dios Babilonia llactadioscunata rimashcamanta20¡Llactapi causacpuramanta
saquirishcacunaca
tandanacushpa shamuichic!
Caspimanta ruhuashca
yanga diosta huanduccuna,
manapish quishpichic diosta
yallita mañaccunaca
imatapish mana yachanchu.
21Imata nisha nishpaca
ñucapac ñaupapi nichicyari.
Chai quipaca tucui tandanacushpa
tapunacuichicyari.
¿Pitac ñaupamanta
pacha chaicunata huillarca?
¿Pitac utcamanta pacha
ña huillarca?
Mandac Dios ñucallami huillarcani.
Cashcata ruhuac quishpichic Diosca
ñucallami cani.
Ñucamanta shuctac Diosca
mana tiyanchu.
22¡Tucui cai pachapi tiyac
llactacunapi causaccuna ñucata
catichicyari, quishpiringuichicmi!
¡Ñucami Diosca cani,
ashtahuan shucca mana tiyanchu!
23Ñucaca cashcata
ruhuanatami rimani.
Ñucaca: “Tucui mashnami
ñuca ñaupapi cungurishpa,
tucui rimaipi ari ninga”
nishpami, ñuca shutipi
ari nini.
24Ñucamantaca:
“Cashcata ruhuanapish,
tucui poderpish
Mandac Dios-huanmi”
ningacunami.
Mandac Dios ñucapacmanmi shamunga.
Ñucata yallita piñaccunaca
tucuimi pingaichishca canga.
25Mandac Dios ñucahuanmi
israelcunaca atinga.
Huahua huahuacunapish
alli nishcami canga» ninmi.
Who We AreWhat We EelieveWhat We Do
2025 by iamachristian.org,Inc All rights reserved.
