1 REYES 15 - Biblia Quichua Cañar 2010

Judá llactata Abiam mandashcamanta(2 Cr 13.1-22)

1Nabatpac churi jatun mandac Jeroboam ña chunga pusac huatata israelcunata mandacucpimi, Abiasca Judá llactata mandai callarirca.

2Paica quimsa huatatami Jerusalenpi mandarca. Paipac mamaca Absalonpac ushi Maacami carca.

3Abiamca pai manarac tiyacpi, paipac taita juchata ruhuashpa causashca shinallatacmi, juchata ruhuashpa causarca. Paica mana paipac ñaupa taita David shina, paita Mandac Diostaca tucui shunguhuan cazurcachu.

4Shina cacpipish, paita Mandac Diosca Davidta cuyashpami, lamparapi nina rupacuc shinata paipac huahua huahuacunamanta shuc huahuata Jerusalenpi churarca. Chashnami Jerusalentaca sinchiyachishpa catirca.

5Davidca tucui paipac causaipimi alli ruhuashpa, ima mandashcacunatapish pactachishpa Mandac Diospac ñaupapi causarca. Paica heteopura Uriasta llaquichishpallami, Diostaca nanachirca.

6Abiam mandacucpica, tucui pachami Roboamca Jeroboamhuan macanacushpalla causarca.

7Abiampac shuctac ruhuashcacunapish, imacunallata ruhuashcacunapish Judá llactata jatun mandaccuna, imata ruhuashcacunata quillcashcapimi tiyacun. Abiamca Jeroboamhuanmi macanacushpa catirca.

8Abiam huañushpa paipac ñaupa taitacunahuan tandanacucpica, Davidpac pueblopimi enterrarca. Paipac randica paipac churi Asami mandarca.

Asa Judá llactata mandashcamanta(2 Cr 14.1-5; 15.16-19)

9Jatun mandac Jeroboam ña ishcai chunga huatata Israel llactata mandacucpimi, Asaca Judá llactata mandai callarirca.

10Paica chuscu chunga shuc huatatami Jerusalenpi mandarca. Paipac mamaca Absalonpac ushi Maacami carca.

11Asaca paipac ñaupa taita David shinallatacmi, Mandac Diospac ñaupapi allita ruhuashpa causarca.

12Paica allitami ruhuacunchic nishpa huaclliric caricunataca tucuitami chai llactamanta anchuchirca. Paipac ñaupa taitacuna ruhuashca yanga dioscunatapish tucuimi chingachirca.

13Shinallatac Asera diosta ruhuashcamantami paipac mama Maacatapish jatun mandac canamanta anchuchirca. Asaca mamapac yanga diosta paquishpaca, Cedrón yacu ladopimi rupachirca.

14Ashtahuanpish lomapi tiyac altarcunataca mana anchuchircachu. Shina cashpapish, Asapac shunguca tucui causaipimi Mandac Dios-huan alli carca.

15Shinallatac paipac taitapish, paipish curita cullquita Diospaclla cachun cushcataca Mandac Diospac huasimanmi aparca.

Asaca Ben-adadhuan ari nishcamanta(2 Cr 16.1-10)

16Asahuan, Israel llactata jatun mandac Baasahuanca tucui pachami macanacushpa causarcacuna.

17Israelcunata jatun mandac Baasaca Judá llactapi causaccunahuan macanacungapac rishpami, Judá llactata jatun mandac Asapacman pi ama richun Ramá pueblopi jatun pircata shayachirca.

18Chaimantami Asaca Mandac Diospac huasipipish, mandaccunapac huasipipish alli huacaichishca cullquita japishpa, Siria llactata jatun mandac Ben-hadadman cuchun, paita serviccunaman cushpa cacharca. Ben-hadadca Damasco pueblopimi causarca. Paica Tabrimonpac churimi carca. Tabrimonca Hezionpac churimi carca. Asaca paicunataca:

19«Ñuca taitahuan, cambac taitahuan ari nishca shinallatac ñucanchicpish ari nishun. Riqui, canmanmi cai cullquitapish, curitapish cachani. Cunanca Israel llactata jatun mandac Baasapacman rishpa, can ari nishcata paqui. Chashna ruhuacpimi, ñucata llaquichinamanta saquinga» nichun cacharca.

20Ben-hadadca jatun mandac Asa mañashcata ari nishpami, Israel llacta pueblocunapi causaccunahuan macanacuchun, paipac soldadocunata mandaccunata cacharca. Paicunaca Ijón, Dan, Abel-bet-maaca pueblocunatapish, Cineret, Neftalí llactacunatapish quichurcami

21Chaita yachashpami, Baasaca Ramá pueblota trabajanata saquishpa, Tirsa pueblopi saquirirca.

22Chaimantami jatun mandac Asaca Judá llactapi causaccunataca shucllatapish mana saquishpa, tucui tandachirca. Paicunahuanmi Ramá puebloman rishpa Baasapac pircashca rumicunata, caspicunata aparca. Shina apashpaca jatun mandac Asaca Benjamín llacta Geba, Mizpa pueblocunatami shayachirca.

Jatun mandac Asa huañushcamanta(2 Cr 16.11-14)

23Asapac shuctac ruhuashcacunapish, alli sinchi cashcapish, tucui imacunallata ruhuashcacunapish maijan pueblocunata shayachishcapish, Judá llactata jatun mandaccuna, imata ruhuashcacunata quillcashcapimi tiyacun. Shina cashpapish pai ña yuyac cacpica, chaqui nanai ungüimi paitaca japirca.

24Asa huañushpa paipac ñaupa taitacunahuan tandanacucpica, Davidpac pueblopimi enterrarca. Paipac randica paipac churi Josafatmi mandarca.

Nadab Israel llactata mandashcamanta

25Judá llactata jatun mandac Asa ishcai huatata ña mandacucpimi, Jeroboampac churi Nadabca israelcunata mandai callarirca. Paica ishcai huatatami Israel llactata mandarca.

26Paica Mandac Diospac ñaupapica, mana allita ruhuashpami, paipac taita ruhuashca juchacunallatatac ruhuashpa israelcunatapish juchallichishpa causarca.

27Isacar aillupuramanta Ahiaspac churi Baasami Nadabta huañuchingapac shuccunahuan pacalla parlanacurca. Shina parlashpami, filisteocunapac Gibetón pueblopi macashpa huañuchirca. Nadabca tucui israelcunandimi, Gibetón pueblota japingapac ña chaupipi churashca carca.

28Jatun mandac Asa ña quimsa huatata Judá llactata mandacucpimi, Nadabta Baasaca huañuchirca. Chashna huañuchishpami, Nadabpac randica paillatac mandarca.

29Pai mandai callarishpaca, Jeroboampac huasi ucupurataca shucllatapish mana saquishpami, tucui huañuchirca. Jeroboampac huahua huahuacunataca Diosta servic Ahiasman Mandac Dios huillachishca shinallatacmi chashna ruhuarca. Ahiasca Silo pueblopimi causarca.

30Jeroboamca juchacunata ruhuashpami israelcunatapish chai juchallatatac ruhuachishpa Dios-huan piñanacuipi churarca. Chaimantami Mandac Diosca chai shinallatac ruhuarca.

31Nadabpac shuctac ruhuashcacunapish, imacunallata ruhuashcacunapish Israel llactata jatun mandaccuna imata ruhuashcacunata quillcashcapimi tiyacun.

32Asahuan, Israel llactata jatun mandac Baasahuanca tucui pachami macanacushpa causarcacuna.

Baasa Israel llactata mandashcamanta

33Judá llactata jatun mandac Asa quimsa huatata mandacucpimi, Ahiaspac churi Baasaca tucui Israel llactata mandai callarirca. Paica ishcai chunga chuscu huatatami Tirsa pueblopi mandarca.

34Baasaca Mandac Diospac ñaupapica mana allita ruhuashpami, paipac taita Jeroboam ruhuashca juchacunallatatac ruhuashpa israelcunatapish juchallichishpa causarca.