EZEQUIEL 12 - Biblia Quichua Cañar 2010

Prezu apanata Ezequiel ricuchishcamanta

1Mandac Dios ñucata rimashpaca:

2«Huañunalla runa, canca mana cazuccunapac chaupipimi causacungui. Paicunaca mana cazuccuna cashpami, ñahuita charishpapish mana ricun, ringrita charishpapish mana uyan.

3Huañunalla runa, quipita allichishpa, paicuna ricucucpi, can causacushcamanta punzha pacha llucshishpa ringui. Chaita ricushpaca entendingapishchari. Paicunaca mana cazuccunami.

4Canca punzha pacha, paicuna ricucucpi, shitashca pamban apana imacunata llucchingui. Chashna llucchishpaca prezushca riccuna shina, quipita apashpa, tucui ricucucpi chishita ringui.

5Paicuna ricucucllapitac pircata jutcushpa llucshingui.

6Paicuna ricucucpi, quipita apashpa amsayanata llucshingui. Llactata mana ricungapacca ñahuita taparingui. Cantaca israelcunapac jatun llaqui shamuna cashcata ricuchichunmi churarcani» nirca.

7Shina nicpica, pai mandashca shinami, punzha pacha prezucuna shina, quipita apashpa llucchircani. Ña amsayanatami ñuca quiquin maquihuan pircata jutcushpa, paicuna ricucucpi, quipita humbroschishpa llucshircani.

8Cayandi tutamanta Mandac Dios ñucata rimashpaca:

9«Huañunalla runa, ¿manachu chai mana cazuc israelcunaca: “¿Imatatac ruhuacungui?” nishpa tapuncuna?

10Shina nicpica canca: “Mandac Diosca: Cai ricuchishcaca Jerusalenta mandacpish, chaipi causac israelcunapish, ima tucunatami ricuchin” ninmi ningui.

11Shinallatac: “Ñucami cancuna ima tucunata ricuchicca cani. Ima shinami ñuca ruhuarcani, chai shinallatacmi cancunatapish ruhuanga. Cancunaca prezumi ringuichic.

12Cancunata mandacca amsayanata quipita humbroschishpami, pircata jutcushpa llucshi ringa. Llactata mana ricungapacca, ñahuitami taparinga.

13Ashtahuanpish paipac jahuapi linchita shitashpami, ñuca tucllapi urmachisha. Chaimantaca caldeocuna causana Babilonia llactaman apachunmi saquisha. Llactataca mana ricungachu. Chaipimi huañunga.

14Paipac muyundipi causac paita ayudaccunatapish, paipac soldadocunatapish espadahuan llaquichishpami caita, chaita cachasha.

15Chashna caita, chaita cachacpimi, ñucataca Mandac Dios cashcata yachanga.

16Paicunapuramantaca ashallatami jatun macanacuipi yarcaihuan, ungüihuan huañunamantaca quishpichisha. Paicunami mai llactaman rishpa, yalli millana juchacunata ruhuashcata huillanga. Shina huillacpimi, ñucataca Mandac Dios cashcata yachangacuna” ninmi ningui» nirca.

17Mandac Dios ñucata rimashpaca:

18«Huañunalla runa, chucchushpa micunata micuiyari, manchaihuan, llaquihuan yacuta ubiaiyari.

19Mandac Dios ñuca Israel llactapi causaccunatapish, Jerusalenpi causaccunatapish rimashpaca: “Micunataca llaquihuanmi micunga, yacutaca manchaihuanmi ubianga. Paicuna millaita ruhuashcamantami llactaca tucuchishca saquiringa.

20Gentecuna causacuc llactacunapish tucuimi tucuchishca canga. Pambacunaca llaquinayaitami shitashca saquiringa. Chashna ruhuacpimi, ñucataca Mandac Dios cashcata yachangacuna nini” ninmi ningui» nirca.

21Mandac Dios ñucata rimashpaca:

22«Huañunalla runa, cancunaca: “Punzhacunaca pasanmi. Muscuipi shina ricushcaca mana pactanchu” nishpaca, ¿imatatac nisha ninguichic?

23Canca: “Mandac Diosca: Yuyachic shimicunataca chingachishami. Chaitaca cai Israel llactapica jaicapi mana rimangachu. Ashtahuanpish punzhacunaca ñami chayamushca, muscuipi shina ricushcapish tucuimi pactamushca.

24Israelcunapurapica yanga muscuipi shina ricuccunapish, llullashpa huillaccunapish jaicapi mana tiyangachu.

25Imalla tucunataca Mandac Dios ñucami rimagrini. Chai rimashcaca utcami pactanga. Mana cazuc israelcunalla, cancunaman huillashcataca cancuna causacucpiracmi pactachisha nini” ninmi ningui» nirca.

26Shinallatac Mandac Dios ñucata rimashpaca:

27«Huañunalla runa, israelcunaca: “Cai runa muscuipi shina ricushcapish, ima tucunata huillashcapish unai huatacunapimi pactanga” nincunami.

28Chaimanta canca: “Mandac Diosca: Ñuca huillashcaca ña mana ashtahuan unayangachu, ashtahuanpish ñuca huillashcaca pactangatacmi” ninmi ningui» nirca.