1Cancunapurapi maijan piñanacucpica, Diospaclla cac criccuna allichichun ninapac randica, ¿ima nishpatac mana cric juezcunapacman allichichun nishpa ringuichicyari?
2Diospaclla caccuna cai pachapi causaccunata taripana cashcataca, ¿manachu yachanguichic? ¿Cancuna cai pachapi causaccunata taripana cashca jahuachu, cai uchilla piñanacuicunataca mana allichi pudinguichic?
3Angelcunatapish ñucanchic taripana cashcataca, ¿manachu yachanguichic? Chashna taripac cashpaca, cai pachapi causaccunallataca, ¿ima nishpatac mana taripai pudinguichic?
4Cai pacha causaipi piñanacui tiyashcataca, ¿ima nishpatac tandanacushca criccunahuan ima riccunata mana charic juezcunapacman allichichun nishpa ringuichicyari?
5Criccunapurapi imapish piñanacuicuna tiyacta ricushpa allichichunca, ¿manachu cancunapurapi maijan shucllapish tiyan? Cancuna pingaita charichunmi caitaca nini.
6Cancunaca mana piñanacunguichillachu ashtahuanpish mana cric juezcunapacmanmi chaita allichichun nishpa ringuichic.
7Cancunapura chashna piñanacushcaca, ñami shuc pingai ricurin. Chaipac randica mana allita ruhuacpipish, shuhuacpipish ¿manachu saquinalla canga?
8Ashtahuanpish cancunaca chaita ruhuanapac randica, ¡criccunapurami mana allita ruhuashpa shuhuanacunguichic!
9Millaita ruhuaccuna Dios mandacucpi imata mana charina cashcataca, ¿manachu yachanguichic? Ama pandarichicchu. Huaclliriccunapish, ruhuashcalla dioscunata adoraccunapish, huainayaccunapish, huarmi tucuccunapish, caricunapura millaita ruhuaccunapish,
10shuhuaccunapish, charinallata munaccunapish, machaccunapish, llaqui tucuchun niccunapish, crichishpa shuhuaccunapish, Dios mandacucpica mana yaicungacunachu.
11Ñaupaca cancunapuramanta maijancunaca chashna ruhuaccunami carcanguichic. Ashtahuanpish cunanca ñucanchic Diospac Espiritumanta, Apunchic Jesucristomantami juchacunata perdonashpa chuyayachishca, Diospaclla chicanyachishca, paihuan alli tucuchun chasquishcacuna canguichic.
Tucui cuerpohuan Diospaclla alli causanamanta12Maijanca: “Ñucaca tucui imata ruhuasha nishpapish, ruhuanallami cani” ningachari. Shina cashpapish, imatapish quiquin munashcata ruhuanaca mana allichu. Ñucaca cacharishca shina cashpapish, millai munaicuna imatapish ruhuachichunca mana saquinachu cani.
13Maijanca: “Micunaca huicsapacmi, cutin huicsaca micungapacmi can” ningachari. Chashna cashpapish Diosca micunatapish, huicsatapish chingachingami. Cuerpoca mana huainayangapacchu, ashtahuanpish Apunchic Jesusta servingapacmi, Apunchic Jesusca cuerpopacmi can.
14Apunchic Jesusta causachic Diosllatacmi paipac poderhuan ñucanchictapish causachinga.
15Cancunaca, ¿manachu cancunapac cuerpoca Cristohuan shuc shinalla cashcataca, yachanguichic? Cristohuan shuc shinalla tucushca cuerpotaca, ¿ima shinatac cullquimanta huainayac huarmipac cuerpohuan shuc shinallatac ruhuasha? ¡Chaitaca mana yuyanallapish canchicchu!
16¿Manachu cullquimanta huainayac huarmihuan chayarishpaca, chai huarmihuan shuc shinalla tucun? Chaimantami Dios quillcachishcapica: «Ishcai cashpapish, shucllami tucun» nicun.
17Maijanpish Apunchic Jesus-huan shuc shinalla tucushpaca, paihuanmi shuc espiritulla tucun.
18Huainayanamanta anchurichic. Maijanpish ima shuctac juchata ruhuashpaca, mana paipac cuerpota ima ruhuanchu, ashtahuanpish huainayacmi, paipac cuerpota mapayachin.
19¿Manachu cancunapac cuerpoca Diospac Espíritu causana huasi cashcata yachanguichic? Chai Espiritutami Diosmanta chasquircanguichic. Chai espiritumi cancunapi causacun Cancunaca mana quiquinpacchu canguichic,
20ashtahuanpish Diosmi cancunataca tucuimanta yalli valic-huan randirca. Chashna cashcamanta cancunapac cuerpohuan, espirituhuan Diosta alli nina nichic. Cuerpopish, espiritupish Diospacmi can.
Who We AreWhat We EelieveWhat We Do
2025 by iamachristian.org,Inc All rights reserved.
