PROVERBIOS 2 - Biblia Quichua Cañar 2010

Alli yachaica alli cana cashcamanta

1Ñuca huahualla, ñuca rimashcacunata

chasquishpa, ñuca mandashcacunata

shungupi huacaichishpa,

2Alli yachaita allita uyashpa,

tucui shunguhuan entendinata munashpa,

3Alli yachaita mañashpa,

yallita entendinata munashpa,

4cullquita mashcac shina,

ima allicunata mashcac shina,

mashcashpaca,

5Mandac Diosta manchanatami entendingui.

Paipac alli yachachishcatami

ricsingui.

6Mandac Diosmi alli yachaitaca cun.

Paipac shimimi allita yachachin,

allita entendichin.

7Alli yachaimi allita ruhuaccunamanca

mana pandana yuyaita cun.

Allita ruhuashpa causaccunapacca

jarcarina escudo shinami.

8Cashcata ruhuashpa causaccunata

cuidashpami,

paipaclla causaccunapac

ñantapish huacaichin.

9Shina cuidacpimi,

cashcata ruhuanatapish,

allita ruhuanatapish,

imata pacta pacta ruhuanatapish,

tucuipi alli causanatapish entendingui.

10Cai alli yachai

cambac shungupi yaicucpi,

cambac almapac alli cacpica,

11cai alli rimashcacunaca cuidangami.

Cai alli yuyaicunaca

allita entendichingami.

12Mana alli ñanmantapish,

millaita rimac runamantapish

cuidangami.

13Chai runacunaca amsa

ñanta puringapacmi

alli ñancunataca saquincuna.

14Paicunaca mana allita ruhuashpami

cushicuncuna.

Jatun mana allicunata ruhuashpami,

yallita asincuna.

15Paicunaca mana alli ñantami purincuna.

Paicunaca pandatami causancuna.

16Shucpac huarmimanta cacharichingami.

Mana ricsishca huarmicuna

sumacta rimashpa,

inquitacpipish cuidangami.

17Chai huarmica huambrarac cashpa

charishca cusata shitashpami,

Dios-huan ari nishcata cungarin.

18Chai huarmipac huasica

ucuyachic shinami huañuiman apacun.

Pai purina ñancunapish

huañushcacunapacmanmi apacun.

19Maijanpish chai huarmihuan chayariccunaca

mana cutingachu.

Chai alli ñanpica ña mana chaquita

churangachu.

20Shinami canca allita ruhuaccunapac

ñanta purina cangui.

Cashcata ruhuaccunapac

ñantami catina cangui.

21Allita ruhuaccunallami

allpapica causanga.

Imapish pandata mana ruhuaccunallami

llactapica causashpa catinga.

22Ashtahuanpish Diosta mana manchaccunaca

allpamanta anchuchishcami canga.

Yachashpapish mana cazuccunaca

chai allpamanta llucchishcami cangacuna.