1 SAMUEL 7 - Biblia Quichua Cañar 2010

1Quiriat-jearim pueblopi causaccuna shamushpami, Diospac Arcata apashpa shuc lomapi cac Abinadabpac huasipi churarca. Mandac Diospac Arcata cuidashpa causachunca Abinadabpac churi Eliazartami Diospaclla cachun acllarca.

Israelcuna Samuelta pushac cachun acllashcamanta

2Diospac Arca Quiriat-jearim puebloman chayamushcaca ñami unai huatacuna carca. Ishcai chunga huatami tucurca. Chaipimi tucui israelcunaca huacashpa Mandac Diosta mashcarca.

3Chaimantami Samuelca israelcunataca:

—Mandac Diosman tucui shunguhuan cutirishpaca ruhuashcalla shuctac dioscunata, Astarot huarmi diostapish cancunamanta anchuchinguichic. Chai quipaca shungumanta allichirishpa Mandac Diosllatac servishpa causanguichic. Chashna causacpimi, filisteocunapac maquimantaca cacharichinga— nirca.

4Shina nicpimi, israelcunaca Baal, Astarot dioscunata anchuchishpa, Mandac Diosllatac servirca.

5Shina cacpimi Samuelca:

—Israelcunata Mizpa pueblopi tandanacuchun mandaichic. Ñucami cancunamanta Mandac Diosta mañasha— nirca.

6Israelcunaca Mizpa pueblopi tandanacushpami yacuta llucchishpa, Mandac Diospac ñaupapi tallirca. Chai punzhami ayunashpa: «Juchata ruhuashpami Mandac Diostaca llaquichishcanchic» nirca.

Samuelca israelcuna piñanacushcamantaca Mizpa pueblopimi allichirca.

7Israelcuna Mizpa pueblopi tandanacushcata filisteocunata mandaccuna yachashpami israelcunahuan macanacungapac shamurca. Israelcuna chaita uyashpaca yallitami mancharca.

8Chaimantami israelcunaca Samueltaca: «Filisteocunapac maquimanta ñucanchicta huacaichichunca Mandac Diosta ñucanchicmanta mañanataca ama saquinguichu» nirca.

9Shina nicpimi, Samuelca chuchucuc huahua ovejata japishpa, Mandac Diosman cushpa, tucui rupachirca. Shina ruhuashpa Mandac Diosta tucui israelcunamanta mañacpica, Diosca uyarcami.

10Mandac Diosman cushca ovejata Samuel tucui rupachicucpimi, filisteocunaca israelcunahuan macanacungapac chayarca. Ashtahuanpish Mandac Diosca sinchita tulun nichishpami filisteocunataca manchachishpa muspachirca. Chashna ruhuacpimi, israelcunaca filisteocunata atirca.

11Israelcunaca Mizpa pueblomanta llucshishpami filisteocunataca Bet-car pueblo ura ladocaman catishpa huañuchirca.

12Chai quipami Samuelca shuc jatun rumita japishpa, Mizpa pueblohuan Sen pueblohuan tupanacui chaupipi churashpaca: «¡Mandac Diosca caicamanmi ñucanchictaca ayudashca!» nishpa, Eben-ezerta shutichirca.

13Chashna israelcuna filisteocunata mishashpa llaquichicpimi, Israel llactamanca mana cutin yaicui pudirca.

Mandac Diospac maquica Samuel tucui causacui punzhacunami filisteocunataca llaquichirca.

14Filisteocuna macanacushpa israelcunamanta quichushca pueblocunaca Ecrón pueblomanta Gat pueblocamanmi carca. Chai pueblocunatami israelcunaca filisteocunahuan macanacushpa atishpa cutin japirca. Amorreocunahuanpish sumactami causarcacuna.

15Samuelca tucui paipac causaipimi israelcunataca mandacurca.

16Paica huatantami Bet-el, Gilgal, Mizpa pueblocunapi israelcunapurapi ima tiyashcata allichingapac ric carca.

17Chai quipaca Ramá pueblopi cac paipac huasimanmi cutic carca. Paica chai pueblopipish tucui israelcunata mandashpami causarca. Chai pueblollapitacmi Mandac Diosman shuc altartapish ruhuarca.