1 TIMOTEO 6 - Biblia Quichua Cañar 2010

1Amo randishcamanta huatashca shina serviccunataca, Diostapish, ñucanchic yachachishcacunatapish mana allichu nishpa pi ama rimachunca paicunapac amocunata alli cazuchun yachachingui.

2Maijan serviccuna, cric amocunata charishpaca, “cric amollami” nishpa ama yuyachun, ashtahuanpish cuyashca, cric huauquipacta ruhuacushcamantaca, “ashtahuan allita ruhuashpami cazuna canguichic” nishpami, cunashpa yachachina cangui.

Charishcallahuan cushi canamanta

3Maijanpish ñucanchic Apunchic Jesucristo cashcata nic rimashcacunata, shinallatac ñucanchic yachachishcacunata mana allichu nishpa shuctaclayaman yachachicca,

4imatapish mana yachac, jatun tucushca, caica cashnami nicun nishpa, shuccunahuan piñanacunallatami munan. Chashna cashpami shuccuna shina casha nin, macanacun, rimanacun, shuccuna mana alli cashcata yuyan.

5Cashcata nishcata saquishpa millai yuyaiyuccunahuan mana alli tucushpa piñanacuna yuyaillami can. Paicunaca chayucyana yuyaillahuanmi Diosta cric tucuncuna.

6Maijanpish ima charishcallahuan cushi causashpaca, pai crishcamantaca yallita charishca shinami can.

7Cai pachapi huacharishpaca, imata mana apamushcanchicchu. Shinallatac huañushpapish, imata mana apashunchu.

8Shina cashcamanta ñucanchic churaringapac, micungapac charishpaca, cushilla cashunchic.

9Ashtahuanpish charina yuyaihuan cacpimi, millai munaicunaca muspachishpa, tucllapi urmachic shina gentecunataca llaquiman apashpa chingachin.

10Yallimana cullquita charina munaica tucuilaya millaicunapimi urmachin. Maijancunaca cullquita charinata yallita munashpami crinatapish saquishpa, tauca llaquicunatapish aparcacuna.

Macanacushpa mishac shina, crishca yuyaihuan atinamanta

11Ashtahuanpish canca Diospacta ruhuac cashcamantaca, tucui chai mana allicunamanta anchurishpa, cashcata ruhuashpa, Diosllata yuyarishpa, crishca yuyailla cuyaihuan mana piñariclla, shinallatac cuyac shunguhuan causanata munachunmi nini.

12Huiñai causaita japingapacca, macanacuipi mishac shina crishca yuyaihuan alli catingui. Cantaca achcacunapac ñaupapi “tucui shunguhuan crinimi” nicpimi, chai causaita japichun Diosca acllashca.

13Cantaca tucui cai pachapi causaita cuc Diospac ñaupapi, shinallatac mandac Pilatoman cashcata nishpa allitac huillac Jesucristopac ñaupapimi, caicunataca mandani.

14Cantaca ñucanchic Apunchic Jesucristo cutimungacaman, cai tucui nishcacunata pactachishpa, allita cazushpa ruhuachunmi mandani. Chashna ruhuacpica, pipish mana juchanchingachu.

15Diosca pai acllashca punzha pactacpimi, Apunchic Jesucristotaca cutin cachanga. Diosca mai sumacmi. Paica tucuita Mandacmi. Jatun mandaccunapacpish Jatun Mandacpish, amocunapacpish Jatun Amomi.

16Paillami huiñaita causacca. Pipish mana ricuipac luzpi causacmi. Paitaca pipish jaicapi mana ricushcachu, shinallatac mana ricui pudingachu. ¡Paitaca huiñaita alli nishca, tucuita Mandacpish nishca cachun! Chashna cachun.

17Cai pachapi achcata chariccunataca: “Ama jatun tucushpa, chingarinalla charishcapi ama shunguta churangui” nishpa rimangui. Chaipac randica, ñucanchicman imallatapish atic aticta cushpa cushichic Diospi shunguta churachun ningui.

18Chayuccunataca imatapish allita ruhuashpa, mana misarishpa shuccunaman carashpa, chaicunahuan chayuc shina cachun yachachingui.

19Chashna ruhuashpami, quipa punzhapi huiñai causaita japingapac ña utcashpa mana chingaric allicunata ruhuacuncuna.

Tucuchingapac Timoteoman mingashcamanta

20Timoteo, tucui canman mingashcacunataca allita huacaichingui. “Caicunaca alli yachanami” nishpa, piñanacuipi churac yanga yachanacunataca pacta uyanguiman.

21Chai yachachishcacunata catishpami, maijancunaca crishcata saquishcacuna. Diosca paipac sumaimana cuyaita canman cushca cachun ninimi.