ZACARÍAS 11 - Biblia Quichua Cañar 2010

1¡Líbano urculla,

cambac cedro yuracunata

nina tucuchichun,

pungucunata pascaiyari!

2Ciprés yuralla,

cedro yura urmashcamanta,

jatun yuracuna

urmashcamanta huacaiyari.

Basán llactapi encina

yuracunapish caparishpa

huacaichicyari.

Quichqui yuracunaca urmashcami.

3Sumac pambacuna

tucurishcamanta,

michiccuna caparishpa

huacashcami uyarin.

Huahua leoncunapish,

Jordán yacu ladopi

tiyac sachacuna

tucurishcamanta

huahua leoncuna sinchita

huacashcami uyarin.

Ishcai michiccunamanta

4Ñucata Mandac Diosca: «Huañuchina ovejacunata michi.

5Chai ovejacunata randiccunaca mana llaquishpami huañuchinga. Cutin catuccuna catushpaca: “Chayucyashcanimi, chaimanta Mandac Diosca alli nishca cachun” nicunmi. Michiccunapish mana llaquinchu.

6Ñucapish cai llactapi causaccunataca mana ashtahuan llaquishachu. Ñucallatacmi shuctac gentecunapac maquipi, jatun mandacpac maquipi churasha. Paicunata tucuchishpa, llactata chushaclla saquicucpipish, paicunapac maquimantaca mana cacharichishachu» nirca.

7Chaimantami randiccuna huañuchina ovejacuna shina, ovejacunata michicurcani. Michingapacca ishcai tauna caspitami japircani. Shuc taunataca Cuyai, caishuctaca Tandanacuitami shutichircani. Shinami chai ovejacunata michicurcani.

8Shuc quillallapimi quimsa michiccunata tucuchircani. Ñuca shungupish paicunata mana ricunayachircachu. Paicunapac shungupish ñucata mana ricunayachircachu.

9Chaimantami ñucaca: «Mana ashtahuan michishachu. ¡Maijanpish huañucca, huañungachari! ¡Maijanpish chingaricca, chingaringachari! ¡Maijanpish saquiricca, paicunapurallatac tucurinacungachari!» nircani.

10Chaimantami ñuca tucui llactacunapi causaccunahuan ari nishcata paquingapac, chai Cuyai shuti taunata paquircani.

11Chai punzhami ari nishcata pactachinaca tucurirca. Chashna paquicpimi, ovejacunata randic ñucata ricushpa shayacuccunaca Mandac Diospac rimashcata yachac chayarca.

12Chaimantami ñucaca paicunataca: «Cancuna munashpaca, ñuca trabajashcamanta pagaichic, mana cashpaca saquichiclla» nircani. Shina nicpimi, paicunaca quimsa chunga cullquita pezashpa pagarca.

13Chaimantami Mandac Diosca: «Chaitaca ñuca huasipi tiyac cullquita huacaichinapi churai. ¡Yalli valishca cullquipimi ñucataca catucurca!» nirca. Shina nicpimi, chai quimsa chunga cullquita japishpa, Mandac Diospac huasipi tiyac cullquita huacaichinapi churarcani.

14Chai quipaca israelcunahuan, Judá llactapi causaccunahuan apanacuita tucuchingapacmi, Tandanacui shuti caishuc taunatapish paquircani.

15Chashna ruhuacpimi, Mandac Diosca: «Cunanca, yuyai illac michic ima shina cashcata ricuchi.

16Chaica, cai llactapica chingarishca ovejacunatapish mana llaquic, huahua ovejacunatapish mana mashcac, suchu ovejacunatapish mana jambic michictami churagrini. Paica huira ovejacunataca shillullatapish mana saquishpami tucui micunga.

17¡Aij, manada ovejacunata

shitac, mana vali michiclla!

Paipac rigratapish,

alli lado ñahuitapish,

espadahuan chugrichichun.

Paipac rigrapish

tucui chaquichun.

Alli lado ñahuipish

amsayachun» nirca.