2 SAMUEL 6 - Biblia Quichua Cañar 2010

David Jerusalenman Arcata apasha nishcamanta(1 Cr 13.5-14)

1Jatun mandac Davidca cutinllatacmi israelpuramanta quimsa chunga huaranga runacunata acllashpa tandachirca.

2Chai quipami, Davidca tucui paihuan cac gentecunandi, Judá llacta Baala pueblomanta Diospac Arcata apamungapac rirca. Chai Arcapimi tucuita Mandac Diosta mañac carca. Chaica querubincunapac chaupipimi carca.

3Diospac Arcata shuc mushuc carretapi churashpami, Abinadabpac huasimanta aparca. Chai huasica loma jahuapimi carca. Chai mushuc carretataca Abinadabpac churicuna Uza, Ahiomi apacurca.

4Chai loma jahuapi cac Abinadabpac huasimanta Arcata apacucpica, Ahiomi ñaupata ricurca.

5Davidpish, tucui israelcunapish cushicushpami caspimanta ruhuashca arpapi, panderopi, salteriopi, flautapi, cimbalopi tocashpa Mandac Diospac ñaupapi danzarca.

6Paicuna Naconpac trillana pambaman chayacpimi, chai carretata aisacuc huagracunaca lluchcarirca. Chaipimi Uza runaca Arca urmagricpi charirca.

7Chaimantami Mandac Dios nina japiric shina piñarishpa, Uzata chugrichishpa, Arca ladollapitac huañuchirca.

8Mandac Dios Uzata chashna huañuchishcamantami Davidca yallita llaquirishpa, chai pambataca Pérez-uzata shutichirca. Cunancamanmi chai shutillatac can.

9Chai punzhacunapi David Mandac Diosta manchashpaca: «¿Ima shinatac ñuca huasimanca Mandac Diospac Arcata apashayari?» nirca.

10Mandac Diospac Arcataca paipac pueblomanca ña mana apasha nircachu. Chaipac randica geteocunapuramanta Obed-edompac huasimanmi apachun mandarca.

11Mandac Diospac Arcaca Obed-edompac huasipimi quimsa quillata carca. Chaipi cacpimi, Mandac Diosca Obed-edomtapish, paipac familiatapish bendiciarca.

David Jerusalenman Arcata apashcamanta(1 Cr 15.1—16.6)

12Jatun mandac Davidmanca: «Obed-edompac huasipi Diospac Arca cashcamantami paipac familiatapish, paipac ima charishcacunatapish Mandac Diosca bendiciashca» nishpa huillashcata yachac chayashpami, Davidca cushicushpa, Obed-edompac huasimanta paipac puebloman Arcataca aparca.

13Davidca Diospac Arcata huanduccuna sucta saruita ricpimi shuc huagrata, huira ovejata huañuchirca.

14Shinallatac linomanta ruhuashca efot churanata churarishpami, Davidca Mandac Diospac ñaupapi danzarca.

15Chashnami Mandac Diospac Arcataca Davidpish, tucui israelcunapish cushilla caparinacushpa, cornetapi tocashpa aparca.

16Mandac Diospac Arcahuan David paipac puebloman saltarishpa, danzashpa shamucucta Saulpac ushi Mical ventanamanta ricushpami, paipac shungupi Davidca mana allichu nirca.

17Chashna apamushpami, Mandac Diospac Arcataca David ruhuashca shuc carpa huasipi churana pushtupi churarca. Chai quipaca, Davidca Mandac Diosman animalcunata cushpami tucui rupachirca. Shinallatac Dios-huan alli tucungapacpish animalcunatami curca.

18Davidca Diosman cushpa tucuita rupachishca quipa, Dios-huan alli tucungapac animalta cushca quipaca, Mandac Diospac shutipimi tucui israelcunata bendiciarca.

19Shina ruhuashpami, tucui chaipi cac Israel huarmicunamanpish, caricunamanpish cada shucman shuc tandata, asha aichata, shuc pasas tortatapish cararca. Chai quipami, tucui israelcunaca paicunapac huasicunaman cutirca.

20Chai quipami, Davidca paipac familiacunata bendiciangapac cutirca. Ña David huasiman chayacpimi, Saulpac ushi Micalca Davidta tupangapac llucshishpaca:

—¡Cunanca, israelcunata jatun mandacca paita serviccunapac ñaupapi maijanpish cullquimanta servic shina lluchulla danzashpaca allitamari ricuchishca!— nirca.

21Shina nicpimi Davidca:

—Mandac Diospac ñaupapimi danzarcani. Chaica Mandac Diosmi cambac taitapac randi, paipac familiapac randi Mandac Dios acllashca israelcunata mandachun ñucata acllarca. Chaimantami Mandac Diospac ñaupapi danzashpa catisha— nirca.

22Cunan danzashcamanta ashtahuan danzashpami yangalla tucusha. Shina cacpipish, chashna can nicushca servic huarmicunami ñucataca alli ninga.

23Saulpac ushi Micalca pai huañuna punzhacamanmi mana huahuata chari pudirca.