1 CRÓNICAS 15 - Biblia Quichua Cañar 2010

David Jerusalenman Arcata apashcamanta(2 Sam 6.12-23)

1Davidca paipac pueblopimi paipac huasicunata shayachirca. Shinallatac Diospac Arcata churangapacpish shuc pushtuta acllashpami carpa huasita shayachirca.

2Shina ruhuashpami Davidca: «Diospac Arcataca mana pipish apangachu, ashtahuanpish levitacunallami apanga. Mandac Diosmi paicunataca paipac Arcata apachunpish, tucui causaipi paita servichunpish acllashca» nirca.

3Davidca, Mandac Diospac Arcata pai acllashca pushtuman apangapacmi tucui israelcunata Jerusalenpi tandachirca.

4Shinallatac Aaronpac, huahua huahuacunatapish, levitacunatapish tandachircami.

5Tandanacuccunaca, Cohatpac huahua huahuapuramanta paicunata mandac Urielmi patsac ishcai chunga aillucunahuan shamurca.

6Meraripac huahua huahuapuramantaca paicunata mandac Asaiasmi ishcai patsac ishcai chunga aillucunahuan shamurca.

7Gersonpac huahua huahuapuramantaca paicunata mandac Joelmi patsac quimsa chunga aillucunahuan shamurca.

8Elizafanpac huahua huahuapuramantaca paicunata mandac Semaiasmi ishcai patsac aillucunahuan shamurca.

9Hebronpac huahua huahuapuramantaca paicunata mandac Eliemi pusac chunga aillucunahuan shamurca.

10Uzielpac huahua huahuapuramantaca paicunata mandac Aminadabmi patsac chunga ishcai aillucunahuan shamurca.

11Chai quipa Sadoc, Abiatar curacunata, shinallatac levitacunamanta Uriel, Asaías, Joel, Semaías, Eliel, shinallatac Aminadabta,

12cayashpaca: «Cancunami levitacunapac familiacunata mandac canguichic. Chaimanta israelcunata Mandac Diospac Arcata ñuca acllashca pushtuman apamungapac cancunapish, cancunapac aillucunapish Diospaclla tucushpa chuyayaichic.

13Utcapica cancuna mana apamushcamanta, shinallatac pai mandashca shina mana ruhuashcamantami ñucanchicta Mandac Diosca llaquichirca» nirca.

14Israelcunata Mandac Diospac Arcata apamungapacca curacunapish, levitacunapish Diospaclla tucushpami chuyayarca.

15Levitacunapac huahua huahuacunami Arcataca Mandac Dios Moisesta mandashca shinallatac caspicunapi churashpa huandumurca.

16Shinallatac Davidca levitacunata mandaccunataca: “Salteriopi, arpapi, platillocunapi sinchita tocashpa cantashpa richun cancunapac aillucunata acllaichic” nirca.

17Chaimantami levitacunaca Joelpac churi Hemanta, paipac aillucunamantaca Berequiaspac churi Asafta, Meraripac huahuapuramanta shinallatac paicunapac aillumantaca Cusaiaspac churi Etantami acllarca.

18Shinallatac paicunahuan quipa mandaccuna cachunca Zacariasta, Jaazielta, Semiramotta, Jehielta, Unita, Eliabta, Benaiata, Maasiasta, Matatiasta, Elifelehuta, Micniasta, Obed-edomta, shinallatac Jeieltami acllarca. Paicunaca punguta cuidaccunami carca.

19Cantac Hemán, Asaf, shinallatac Etanca bronce platillocunapimi tocarca.

20Zacarías, Aziel, Semiramot, Jehiel, Uni, Eliab, Maasías, shinallatac Benaiasmi salteriocunapi Alamot tonopi tocangapac carca.

21Matatías, Elifelehu, Micnías, Obed-edom, Jeiel, Azaziasca arpacunapimi siminita tonopi tocanata callaringapac carca.

22Tocanapi Levitacunata pushac Quenaniastami cantanata yachachishpa pushachun churarca. Paica tocanata alli yachacmi carca.

23Berequías, shinallatac Elcanaca Diospac Arcata cuidaccunami carca.

24Sebanías, Josafat, Natanael, Amasai, Zacarías, Benaía, shinallatac Eliezer curacunaca Diospac Arca ñaupapimi trompetacunapi tocarcacuna. Shinallatac Obed-edom, Jehiaspish Diospac Arcata cuidaccunami carca.

25Davidpish, israelcunata pushac yuyaccunapish, huaranga huaranga soldadocunata mandaccunapish cushicushpami, Obed-edompac huasimanta Dios ari nishcata huacaichina Arcata apamungapac rircacuna.

26Mandac Dios ari nishca quillcata huacaichina Arcata levitacuna apacucpi, Dios ayudashcamantami canchis becita, canchis cari ovejata Diosman cushpa huañuchirca.

27Davidca linomanta ruhuashca ashtahuan alli churanata churashcami carca. Diospac Arcata apac levitacunapish, cantac levitacunapish, cantaccunata pushac Quenaniaspish chashna churanallahuantacmi carca. Davidca linomanta ruhuashca efodtapish churashcami carca.

28Chashnami Davidca Mandac Dios ari nishca quillcata huacaichina Arcataca tucui israelcunahuan yallita cushicushpa, cantashpa, bocinacunapi, trompetacunapi, platillocunapi salteriocunapi, sinchita tocashpa aparcacuna.

29Mandac Dios ari nishca quillcata huacaichina Arcahuan David paipac puebloman cushicushpa, saltashpa, danzashpa shamucucta Saulpac ushi Mical ventanamanta ricushpaca, paipac shungupimi piñanayachirca.