1Mandac Dioslla,
cantami caparishpa mañasha.
Canca ñuca jarcarina
jatun rumimi cangui.
Ama ringrita pacaichu.
Can ringrita pacashpa
ñuca mañashcata mana uyacpica,
huañushcacuna shinami casha.
2Caparishpa ñuca mañashcatapish,
cambaclla huasi ladoman
huichailla maquicunata chutashpa
mañashcatapish uyaiyari.
3Ama chai millai runacunahuan
pacta huañuchichu.
Paicunaca shuccunahuan
sumacta rimashpapish
shungupica millaitami yuyancuna.
4Paicuna ruhuashca shinallatac
llaquichiyari.
Paicuna millaita ruhuashcamantaca
chashnallatac llaquichiyari.
Paicunapac maquihuan imata ruhuashca
shinallatac llaquichiyari.
5Mandac Dios, paipac maquihuan
ruhuashcatapish mana yuyarincunachu.
Chaimantami paicunataca ama cutin
jatarichun tucui chingachinga.
6Mandac Diosca alli nishca cachun.
Paica ñuca mañashcata uyarcami.
7Mandac Diosca ñucapac
sinchi fuerza, ñuca jarcarina
escudo shinami.
Paitami ñuca shungupica shuyani.
Chashna pai ayudashcamantami
ñuca shungupi yallita cushicushpa,
ñuca ruhuashca cantohuan
paita cantacusha.
8Mandac Diosca pai acllashcacunapac
sinchi pirca shinami.
Pai aceitehuan cahuishpa
acllashca runapacca quishpichic
shinallatac jarcarinami can.
9Mandac Dioslla,
can acllashcacunata quishpichiyari.
Cambaclla gentecunataca
bendiciaiyari.
Paicunataca huiñaita michishpa,
cuidashpa pushaiyari.
Who We AreWhat We EelieveWhat We Do
2025 by iamachristian.org,Inc All rights reserved.
