2 CRÓNICAS 2 - Biblia Quichua Cañar 2010

Hiramhuan Salomón ari ninacuita ruhuashcamanta(1 R 5.1-18; 7.13-14)

1Salomonca Mandac Diosman shuc huasitapish, llactata pai mandashpa tiyana huasitapish shayachingapacmi yuyarirca.

2Chaita ruhuangapacmi Salomonca imatapish apachunca canchis chunga huaranga runacunata, urcupi rumicunata labrachunca pusac chunga huaranga runacunata churarca. Paicunata ricushpa mandachunca, quimsa huaranga sucta patsac runacunatami churarca.

3Chai quipami Salomonca Tiro llactata jatun mandac Hiramman quillcashpaca: «Ñuca taita Davidhuan ruhuashca shinallatac ñucamanpish ruhuaiyari. Shuc huasita paiman ruhuachunca, cedro caspicunatami cacharcangui.

4Riqui, ñucaca, ñucata Mandac Diosmanmi shuc huasita shayachinata yuyarircani. Chai huasipimi mishquilla inciensota paipac ñaupapi rupachisha nini. Paipaclla chicanyachishca tandatapish, punzhanta tutamantapish, chishipish Diosman cushpa rupachingapac, samana punzhacunapi, llullu quilla punzhacunapi Diosman cushpa huañuchingapac, shinallatac ñucanchicta Mandac Diosta yuyarishpa shuc jatun fiestata ruhuangapacmi shayachisha nini. Caicunatami israelcunapac huahua huahuacunaca huiñaita ruhuacungalla.

5Ñucanchic Mandac Diosca tucui dioscunata atishpa, jatun Diosmi. Chashna cashcamantami ñuca ruhuasha nicushca huasitaca ashtahuan jatunta ruhuagrini.

6Ashtahuanpish pai causana huasitaca, ¿pitac shayachinata pudingayari? Jahua pachapi ashtahuan jahuaman cac pachapish pai causangapacca mana pactanchu. Paipac huasita shayachingapacca, ¿ñucaca imatac caniyari? Ashtahuanpish inciensota paipac ñaupapi rupachingapacllami shayachisha nini.

7Cunanca curita, cullquita, bronceta, fierrotapish alli ruhuanata yachactapish, morado, puca, azul telacunata ruhuanata alli yachactapish, shinallatac rumita labranata yachac shuc runata Judapi, Jerusalenpi ñucahuan cac gentecunahuan trabajachun cachai. Paicunataca ñuca taitami alli yachachirca.

8Shinallatac Líbano urcumanta cedro caspicunata, ciprés caspicunata, sándalo caspicunata cachai. Canta serviccunaca Líbano urcupi caspicunata pitinata alli yachaccunami can. Riqui, canta serviccunata ayudachunca, ñucata serviccunatami cachagrini.

9Paicunami achca caspicunata allichinga. Diospac huasita ñuca shayachinata yuyarishcaca jatun sumaimanami canga.

10Riqui, caspita pitishpa canta serviccunamanca ishcai chunga huaranga coro trigota, ishcai chunga huaranga coro cebadata, ishcai chunga huaranga litro vinota shinallatac ishcai chunga huaranga litro aceitetami cugrini» nichun cacharca.

11Chaimantami Tiro llactata jatun mandac Hiram Salomonman quillcashpaca: «¡Mandac Diosca pai acllashcacunata cuyashpami, cantaca paicunapac jatun mandac cachun churashca!» nirca.

12«¡Israelcunata Mandac Diosca allimari cangui nishca cachun! Paimi jahua pachatapish, cai pachatapish ruhuarca. Mandac Diospac huasitapish, mandashpa tiyana huasitapish shayachichunca, paillatacmi alli yachac, alli yuyaita charic, alli entendishpa imatapish allita ruhuac churita, jatun mandac Davidman cushca.

13Ñucaca imata ruhuanatapish alli yachac, alli yuyaita charic Hiram-abitami cambacman cachani.

14Paica Dan aillupuramanta shuc huarmipac cari huahuami. Paipac taitaca Tiro pueblomantami. Paica curimanta, cullquimanta, broncemanta, fierromanta, shinallatac rumimanta, caspimanta, azul, lino telacunamanta imata ruhuanata alli yachacmi. Shinallatac ima rumicunatapish labrashpa ruhuanllami. Pai yachashca ima ruhuanacunata ruhuachun mañacpica ruhuanllami. Paitaca alli yachac cambac runacunahuan, shinallatac cambac taita ñuca amo Davidpac yachac runacunahuan churangui.

15Cunanca, ñuca amolla, canta serviccunaman can cusha nishca trigota, cebadata, aceiteta, vinota cachailla.

16Ñucanchicca can mashna mañashca caspicunata Líbano urcupi pitigrishunllami. Chai quipaca balsata ruhuashpami, chai caspicunataca mama cuchata Jope pueblocaman apamushun. Chai pueblomantaca canllatac Jerusalenman ashtanguillami» nishpami quillcashpa cacharca.

17Salomonca shuc llactamanta shamushpa, Israelpi causaccunatami tucui yuparca. Caitaca paipac taita David yupashca quipami chashna yuparca. Pai yupacpica, patsac pichca chunga quimsa huaranga sucta patsac runacunami cashca carca.

18Chai runacunamantaca canchis chunga huaranga runacunatami ashtanapi churarca. Pusac chunga huaranga runacunataca urcupi labrachunmi churarca. Quimsa huaranga sucta patsac runacunataca ima ruhuaccunata ricushpa, mandachunmi churarca.