ISAÍAS 9 - Biblia Quichua Cañar 2010

Mesías mandanamanta

1Shina cacpipish, chai mancharina llaquihuan causaccunaca mana chashna causacungallachu. Ñaupa punzhacunapica Diosmi Zabulonpac, Neftalipac aillucunata llaquichirca. Shina llaquichishpapish, mana israelcuna causacuc Galilea llactapi causaccunatapish, mama cucha patacunapi causaccunatapish, Jordán yacu chimba ladopi causaccunatapish yallitami cushichinga.

2Tutapi causaccunaca

jatun luztami ricurca.

Huañunalla llandupi

causaccunataca luzmi

achicyachirca.

3Can Mandac Diosllatacmi

paicunataca achcata mirachishpa,

yallita cushichircangui.

Cosechapi cushicuc shina,

macanacuipi quichushcacunata

chaupishpa cushicuc shinami,

cambac ñaupapica yallita cushicun.

4Canmi paicunapac llashac

yugota paquircangui.

Hombrospi cac caspitapish,

paicunata llaquichina

varatapish paquircanguimi.

Madián llactata tucuchic shinami

tucuchircangui.

5Jatun macanacuipi soldadocuna

chaquipi churarishcacunapish,

yahuarpi cahuirishca

churanacunapish tamo shinami

rupanga.

6Shuc cari huahuami huacharishca.

Shuc churitami ñucanchicman cushca.

Mandanaca paipac maquipimi.

Paipac shutica “Mancharina cunac”,

“Imatapish ruhuac Dios”,

“Huiñaita causac Taita”,

“Cushi causaita cucmi” canga.

7Jatun mandac Davidpac

tiyarinapi tiyarishpami,

huiñaita cushi causaita cushpa,

cashcata ruhuashpa,

cunanmanta huiñaicaman mandanga.

Pai mandanaca mana tucuringachu.

Tucuita Mandac Diosca

pai yallita cuyashcamantami

chaitaca pactachinga.

Israelcuna Mandac Diostallaquichishcamanta

8Dios llaquichinata Jacobopac

huahuacunaman huillachunmi

cacharca.

Chai llaquitami israelcunaca aparca.

9Chaitaca Efrainpac

huahua huahuacunapish,

Samaria llactapi causaccunapish,

tucui gentecunapish yachanmi.

Paicuna shungupi jatun tucushpaca:

10«Ladrillohuan shayachishca

pircaca urmarcami.

Chaitaca rumi ladrillohuanmi

shayachishun.

Sicómoro yuracunata urmachircami.

Chai yuracunapac randica

cedro yuratami tarpushun» nincuna.

11Mandac Diosca Rezinta

llaquichichunmi

piñaccunata cachanga.

12Chaimantami inti llucshina

ladomantaca siriocunata,

inti tigrana ladomantaca

filisteocunata pushamunga.

Paicunami israelcunataca

shuc amullita shina

ruhuashpa tucuchinga.

Chashna llaquichishpapish

Mandac Diosca nina japiric shina

piñarishcataca mana pasachishcachu.

Ashtahuanpish llaquichingaracmi.

13Shina llaquichicpipish,

paicunaca llaquichicpacmanca

mana cutirircachu.

Tucuita Mandac Diostaca

mana mashcarcachu.

14Chaimantami Mandac Diosca

israelcunataca animalta umata,

chupata pitic shina,

shuc yurata, ramacunandi

pitic shina, shuc punzhallapi

anchuchinga.

15Umaca pushac yuyaccuna,

alli nishca runacunami.

Chupaca llullashpa yachachiccunami.

16Cai gentecunata

mandaccunaca pandachiccunami.

Cai mandaccunata caticcunaca

pandarishpami chingaringa.

17Tucui paicunami

Mandac Diosta mana manchaccuna,

millaita ruhuaccuna,

millaita rimaccuna.

Chaimantami Mandac Diosca

mosocunatapish,

viuda huarmicunatapish,

taita mama illaccunatapish

mana llaquirca.

Chashna ruhuashpapish

Mandac Dios pai nina japiric shina

piñarishcataca mana pasachishcachu.

Ashtahuanpish llaquichingaracmi.

18Paicuna yallita mana allita

ruhuashcaca cardos yuracuna,

cashacuna ninapi rupacuc shinami.

Sachacunapi nina tiyarishpa,

cushni yanayashpa,

huaira huichaiman apacuc shinami.

19Tucuita Mandac Dios

yallita piñaricpimi,

cai pachapica nina japirirca.

Cai gentecunaca ninata

japichina cupa shinami tucurca.

Huauquindipurapish

mana llaquinacunchu.

20Tucuimi paipac alli lado

rigrata micunga.

Shina micushpapish yarcachingami.

Cutin shucca paipac lluqui lado

rigratami micunga.

Shina micushpapish yarcachingami.

Tucuimi paicunapac

rigrallatatac micunga.

21Manasés ailluca Efraín ailluta,

cutin Efraín ailluca

Manasés aillutami tucuchinga.

Shinallatac ishcai tucushpami

Judá aillutaca

tucuchingapac jataringa.

Chashna llaquichishpapish

Mandac Dios nina japiric shina

piñarishcataca

mana pasachishcachu.

Ashtahuanpish llaquichingaracmi.