JOB 12 - Biblia Quichua Cañar 2010

Zofar rimashcata Job cutichishcamanta

1Shina nicpimi Jobca:

2«Cancunaca alli runacunami canguichic.

Cancuna huañucpica,

jatun yachaica tucuringami.

3Ñucapish cancuna shinallatac

allita entendicmi cani.

Cancunamanta yalli yangapish

mana canichu.

Cancuna yachashcallataca,

¿pitac mana yachangayari?

4Ñucaca ñuca ricsishcacunapac

burlashpa asinami tucushcani.

Diosta mañacpica paica uyarcami.

Imatapish cashcata

ruhuac runatapish,

mana allita ruhuac runatapish,

burlashpami asincuna.

5Allita causaccunaca

llaquipi caccunataca rimashpami

llaquichincuna.

Urmanalla shina causaccunataca

tangashpami shitancuna.

6Shuhuaccunapac huasipica

tucuimi alli can.

Diosta piñaccunapish,

imatapish mana manchashpami

cushicushpa causancuna.

Diosllatac cucpi paicuna

ima charishcapi

shunguta churashpami causancuna.

7Shina cashpaca,

animalcunaman tapuichicyari.

Paicunaca yachachingami.

Jahuata volac animalcunaman

tapuichicyari.

Paicunaca ricuchingami.

8Mana cashpaca allpahuan

parlaichicyari.

Paipish yachachingami.

Mama cuchapi tiyac

challuacunaman tapuichicyari.

Paicunapish parlangami.

9Paicunamantaca, ¿maijantac

Mandac Dios paipac maquihuan

ruhuashcataca mana yachanyari?

10Tucui causaccunapac almapish,

samaipish paipac maquipimi.

11Ringri uyacpimi, imata

rimashcatapish yachan.

Callumi imalaya micuna

cashcatapish yachan.

12Yuyaccunami allita yachan.

Unai huatata causaccunami

alli yuyaita charin.

13Diosmi imatapish ruhuac,

alli yachacpish can.

Paimi alli yuyaita cuc,

alli entendicpish can.

14Pai urmachishcataca

pi mana cutin allichinchu.

Pai runata huichcashpa

churashcataca pi mana

cacharic pudinchu.

15Pai mana tamyachicpica,

tucuimi chaquin.

Pai yallita tamyachicpica,

allpa ucuyanmi.

16Pai imatapish ruhuac cashpami

huiñaita mishachin.

Pandachiccunapish,

pandariccunapish paipacmi.

17Yuyaita cuc runacunatapish,

paimi yuyai illacta saquin.

Juezcunatapish paimi

yuyaita chingachin.

18Paimi jatun mandaccuna

cadenahuan huatashpa

charicucmanta cacharichishpa,

huascallahuan cinturapi huatan.

19Curacunataca paicuna imata

ruhuana cashcamanta anchuchinmi,

poderta chariccunatapish

llucchishpami cachan.

20Cashcata nishpa

rimaccunatapish upallachinmi.

Yuyaccunapac yachaitapish quichunmi.

21Jatun mandaccunatapish

mana valichinllami.

Alli sinchita huatallishcatapish

pascachinllami.

22Amsa ucutapish ricuchinmi.

Huañuchic amsatapish

achictami ruhuan.

23Llactacunatapish paillatacmi jatunyachin,

shinallatac paillatacmi chingachin.

Llactacunamantaca caita chaitami cachan,

shinallatac paillatacmi tandachin.

24Cai pachata mandaccunapac

yuyaita quichunmi.

Shitashca pambapi,

maimanpish mana llucshi pudishpa,

chingarichunmi saquin.

25Machashca shinatami ruhuan.

Amsa tutapi shinami

tantiashpalla purincuna.