2 CRÓNICAS 13 - Biblia Quichua Cañar 2010

Judá llactata Abías mandashcamanta(1 R 15.1-7)

1Jatun mandac Jeroboam chunga pusac huatata israelcunata mandacucpimi, Abiasca Judá llactata mandai callarirca.

2Paica quimsa huatatami Jerusalenpi mandarca. Paipac mamaca Gabaa pueblomanta Urielpac ushi Micaiasmi carca.

Abiaspish, Jeroboampish macanacushpami causarcacuna.

3Abiasca chuscu patsac huaranga acllashca sinchi soldadocunata tandachishpami macanacungapac allichirirca. Shinallatac Jeroboampish pusac patsac huaranga acllashca macanacunata alli yachac sinchi soldadocunata tandachishpami, Abias-huan macanacungapac allichirirca.

4Abiasca Efraín urcupi cac Zemaraim lomapi shayarishpaca: «Jatun mandac Jeroboampish, tucui israelcunapish uyaichic.

5Israelcunata Mandac Diosca Davidman, shinallatac paipac huahua huahuacunaman israelcunata mandana huiñaipac cachun, mana shuctacyaipacta ruhuashpa, ari nishcataca, ¿manachu yachanguichic?

6Shina cacpipish, Davidpac churi Salomonta servic Nabatpac churi Jeroboamca paipac amota mana cazushpami cariyarca.

7Paihuanca quilla, mana alli gentecunami tandanacurca. Chai gentecunahuanmi, Salomonpac churi Roboam huambrarac cashpa mana mandai pudicpi mana cazurca.

8Cunanca, cancuna achca cashcamanta, cancunapac dioscuna cachun Jeroboam ruhuachishca curi becita charishpami, Davidpac huahua huahuacuna mandachun Mandac Dios cushcataca mana cazushun ninguichic.

9¿Manachu Mandac Diospac curacunata, Aaronpac huahua huahuacunata, levitacunataca cancuna llucchishpa cacharcanguichic? Chashna llucchishpa cachashpami, curacuna cachunca, shuc llactapi causac gentecuna shinallatac pitapish churarcanguichic. Shuc becita, canchis cari ovejata cushpaca, mana dioscunapac cura tucungapac shamuchunmi, chashnaca ruhuarcanguichic.

10Ashtahuanpish ñucanchicpacca Mandac Diosmi ñucanchic Diosca. Paitaca mana saquishpami catishcanchic. Mandac Diospac ñaupapica Aaronpac huahua huahuacunami Diospacta ruhuashpa causacun. Tucui imata ruhuanacunataca levitacunami ayudacun.

11Paicunami tutamantapish, chishipish animalcunata Diosman cushpa tucui rupachicun. Mishquilla ashnacuc inciensotapish paicunami rupachicun. Shinallatac ima mapa illac mizapimi Diosman tandata churacun. Curi candeleropi tiyac lamparacunatapish tucui chishicunami ninata japichincuna. Ñucanchicca, ñucanchicta Mandac Dios imata mandashcatami pactachinchic. Ashtahuanpish cancunaca saquishcanguichicmi.

12Riqui, Mandac Diosca ñucanchic-huanmi. Paimi ñucanchicta mandacun. Paipac curacunapish cancunahuan macanacugrichunmi, trompetapi sinchita tocangapac ñucanchic-huan shayacun. Chaimanta israelcunalla, cancunapac ñaupa taitacunata Mandac Dios-huan ama cariyaichicchu. Paitaca, ¿maitatac mishai pudinguichicyari?» nirca.

13Ashtahuanpish Jeroboamca huashata shamushpa Judá llacta soldadocunahuan macanacuchunmi, maijan paipac soldadocunataca pacalla ñaupa ladomanpish huasha ladomanpish churarca.

14Judá llacta soldadocuna tigrarishpa ricushpaca huashatapish, ñaupatapish macanacungapac shamuctami ricurca. Chaimantami paicunaca Mandac Diosta sinchita mañarcacuna. Curacunapish sinchitami trompetapi tocarcacuna.

15Chai quipami Judá llacta soldadocunaca macanacungapac sinchita caparicurca. Chashna sinchita caparinacucpimi, Mandac Diosca Abiaspac ñaupamantapish, Judá llacta soldadocunapac ñaupamantapish Jeroboamtaca tucui israelcunandi caita chaita cachashpa llaquichirca.

16Israelcunaca Judá llacta soldadocunapac ñaupamantami miticushpa callparca. Shinami Mandac Diosca Judapac maquipi churarca.

17Chai macanacuipimi Abiasca paipac soldadocunahuan sinchita macanacushpa, pichca patsac huaranga acllashca Israel soldadocunata huañuchirca.

18Chashnami israelcunaca chai huatapica llaqui tucushpa saquirirca. Ashtahuanpish Judá llacta soldadocunaca paicunapac ñaupa taitacunata Mandac Diosta mañashpami sinchi tucurcacuna.

19Abiasca Jeroboamta catishpa rishpami, Bet-el, Jesana, Efraín pueblocunataca muyundi uchilla llactacunandi quichurca.

20Jeroboamca Abías mandacui punzhacunapica pai mandacushcata cutin japishpa mandanataca mana pudircachu. Quipataca Mandac Dios llaquichicpimi, Jeroboamca huañurca.

21Ashtahuanpish Abiasca pai mandanataca sinchiyachishpami catirca. Paica chunga chuscu huarmicunatami japirca. Paicunahuanca ishcai chunga ishcai churicunata, chunga sucta ushicunatami charirca.

22Abías ashtahuan imata ruhuashcacunapish, pai ima shina causashcapish, Dios ima nishcata huillac Iddo huillashpa quillcashcapimi tiyacun.