2 REYES 11 - Biblia Quichua Cañar 2010

Ataliamantapish, Joasmantapish huillashcamanta(2 Cr 22.10—23.21)

1Ocoziaspac mama Atalía paipac huahua huañushcata yachashpami, jatun mandacpac tucui huahua huahuacunata huañuchirca.

2Jatun mandac Jorampac ushi Ocoziaspac pani Josabaca Ocoziaspac churi Joasta pacalla apashpami pacarca. Joasca jatun mandaccunapac churicunapuramantami carca. Atalía ama ricuchunmi huiñachic mamandi sueñuna ucupi pacarca. Chashnami paitaca mana huañuchirca.

3Sucta huatatami paitaca huiñachic mamandi Mandac Diospac huasipi pacalla huiñachirca. Chai huatacunami Ataliaca chai llactata mandacurca.

Joás Judá llactata mandai callarishcamanta

4Ashtahuanpish canchis huata tucucpimi, Joiada curaca patsac soldadocunata, mandana huasita cuidaccunata tandachishpa, Mandac Diospac huasi ucuman pusharca. Chai huasi ucupimi paicunahuan shuclla yuyai tucushpa ari ninacurca. Chai quipami jatun mandac Ocoziaspac churi Joastaca ricuchirca.

5Chashna ricuchishpami paicunataca: «Cancunaca caitami ruhuana canguichic. Quimsapi chaupirishpa, shuc parteca jatun mandacpac huasita samana punzhapi cuidanguichic.

6Caishuc parte runacunaca inti tigrana ladota cuidanguichic. Cutin caishuc parte runacunaca huasi huasha ladota cuidanguichic. Chashnami pipish ama yaicuchun cuidanguichic.

7Samana punzhapi cuidaccunaca ishcaipi chaupirishpa, shuc parteca Mandac Diospac huasita jatun mandacpac ladopi cuidanguichic.

8Jatun mandacpac muyundita shayarishpami, macanacunata maquipi apashpa cuidana canguichic. Maijanpish cancunapac chaupiman yaicucpica, huañuchinguichic. Jatun mandac maiman llucshicpipish, cutimucpipish paihuanmi cana canguichic» nishpami mandarca.

9Patsac soldadocunata mandaccunaca Joiada cura mandashca shinallatacmi tucui ruhuarca. Chashnami paicunaca samana punzhapi cuidangapac yaicuc soldadocunatapish, cuidashpa llucshic soldadocunatapish pushashpa Joiada curapacman shamurca.

10Chaipimi Joiada curaca Mandac Diospac huasipi tiyac jatun mandac Davidpac lanzacunata, escudocunata patsac soldadocunata mandaccunaman curca.

11Chashnami cuidac soldadocunaca quiquin macanacunata maquipi apashpa shayarirca. Paicunaca Mandac Diospac huasi jahuamanpish, ura ladomanpish altartapish, Diospac huasi chaupipi shayacuc jatun mandactapish muyundita cuidashpami shayacurca.

12Chai quipami Joiada curaca jatun mandac Ocoziaspac churita pushamushpa, coronata churachishpa, Dios-huan ari— ninacushca quillcatapish curca. Chai quipa jatun mandac cachun aceitehuan cahuishpa maquita churashpaca: «¡Jatun mandac, causailla!» nishpa caparircacuna.

13Chashna yallita caparinacucpimi, Ataliaca Mandac Diospac huasipi shayacuc gentecunapacman yaicurca.

14Chaiman yaicushpami, jatun mandactaca ima shina shayarina cashca shinallatac, pilar ladopi shayacucta ricurca. Shinallatac mandaccunapish, trompetapi tocaccunapish jatun mandacpac ladopi shayacurca. Chai llactapi causaccunapish trompetapi tocashpa, yallita cushicucucta ricushpami, Ataliaca paipac churanata lliquirishpaca: «¡Umashcamari! ¡Umashcamari!» nishpa caparirca.

15Chaimantami Joiada curaca patsac soldadocunata mandaccunataca: «Chai huarmita Diospac huasi ñaupamanta llucchichic. Maijanpish paita catic tiyacpica, espadahuan huañuchichic» nishpa mandarca.

Curami “Mandac Diospac huasipica ama huañuchinguichu” nishpa mandashca carca.

16Chaimantami Ataliataca mandana huasiman apashpa, caballocuna yaicuna pungupi huañuchirca.

17Chai quipaca Joiada curami jatun mandactapish, gentecunatapish Mandac Diosman imata ruhuashpa pactachichun, Mandac Diospaclla causachun ari nichirca. Shinallatac jatun mandactapish, chai gentecunatapish ari nichircami.

18Chai quipaca, chai llactapi causac tucui gentecunami Baal diospac huasiman yaicushpa, tucui urmachirca. Shinallatac chai ucupi tiyac altarcunata, imamanpish riccha tucui dioscunatapish paquishpa, Baal diosta servic Matán curatapish altar cuchupi huañuchirca.

Chai quipaca Joiada curaca Mandac Diospac huasita cuidachunmi soldadocunata churarca.

19Patsac soldadocunata mandaccunatapish, caishuc mandac soldadocunatapish, mandana huasipi cuidac soldadocunatapish, chai llactapi tucui causaccunatapish pushashpami, jatun mandactaca mandana huasita cuidac soldadocuna yaicuna ñanta Mandac Diospac huasiman aparca. Chaipimi jatun mandacca jatun mandaccuna tiyarinapi tiyarirca.

20Chai llactapi tucui causaccunaca yallitami cushicurca. Ataliata mandana huasi ladopi espadahuan huañuchicpimi, Jerusalén pueblopi causaccunaca sumacta causarcacuna.

21Joasca canchis huatata charishpami mandai callarirca.