EZEQUIEL 13 - Biblia Quichua Cañar 2010

Llullac huillaccunata llaquichinamanta

1Mandac Dios ñucata rimashpaca:

2«Huañunalla runa, quiquin yuyaimanta huillac Israel llacta huillaccuna llaqui tucunamanta huillai. Paicunataca: “Mandac Dios rimashcata uyaichic.

3Mandac Diosca: ¡Aij, imatapish mana ricushpa, quiquin yuyaimanta llullashpa huillac, juizhu illac huillaccunalla!

4Chaica, Israel llacta huillaccunaca shitashca pambapi puric añascuna shinami.

5Mandac Dios ñuca llaquichina punzhapi jarcaringapacca, mana Israel llacta muyundita pircarcachu. Pirca tuñirishcatapish mana allichircachu.

6Paicuna muscushcapish yangallami, shinallatac llullashpami: ‘Mandac Diosmi chashna nin’ nishpa huillan. Ashtahuanpish ñucaca paicunataca mana cacharcanichu. Shina cacpipish, paicunaca tucui huillashcacunata ñuca pactachichunmi shuyancuna.

7Huillaccuna, cancuna muscuipi shina ricushcaca, ¿manachu yangalla? ¿Manachu huillashcapish llullalla? Cancunaca manapish ñuca rimashcata huillashpami ‘Mandac Diosmi cashna nin’ nishpa huillanguichic” ninmi.

8Chaimantami Mandac Dios ñucaca: “Cancuna yangata rimashcamanta, llullashcamantami llaquichisha.

9Manapish ricushpa yangata rimaccunatapish, llullac huillaccunatapish ñucaca piñashami. Paicunaca ñuca acllashca israelcunahuan mana tandanacungachu. Israelcunapac shuticunata quillcana libropipish mana quillcashcachu canga. Israel llactamanpish mana cutingachu. Chashna ruhuacpimi, ñucataca Mandac Dios cashcata yachanguichic.

10Ñuca acllashcacunataca manapish cushi causai tiyacpimi: ‘¡Cushi causaimi tiyan!’ nishpa crichircanguichic. Chashna ruhuashpaca, pircata turuhuan llutac shinami ruhuanguichic.

11Chai pircata turuhuan llutaccunataca: Pircaca urmangami ningui. Shinallatac manchana tamyami shamunga. Rumi shina rundu shamushpami chai pircataca urmachinga. Jatun acapana huairami chai pircataca urmachinga.

12Riquichic, chai pirca urmacpica, ¿manachu cancunataca: ‘Turuhuan llutashca pircaca, ¿ima nishpatac urmanyari? nishpa tapunga?’ nini” ninmi ningui.

13Chaimantami Mandac Dios ñucaca: “Yallita piñarishpami, chai pircataca acapana huairahuan urmachisha. Chashna piñarishpami manchana tamyatapish, rumi shina rundutapish cachasha.

14Chashnami cancuna turuhuan llutashca pircataca urmachishpa, tucui chingachisha. Callari rumicunapish ricunallami saquiringa. Chai pirca urmacpica, tucuimi huañunguichic. Chashna ruhuacpimi, ñucataca Mandac Dios cashcata yachangacuna.

15Chai pircatapish, chaita turuhuan llutaccunatapish chingachishpami, ñuca yallita piñarishcataca pasachisha. Chaimantami ‘Pircapish, chai pircata llutaccunapish ña mana tiyanchu’ nisha.

16Jerusalenpica manapish cushi causai tiyacpimi, ‘Cushi causaimi tiyan’ nishpa huillan. Chaitaca Mandac Dios ñucami nini” ninmi.

17Huañunalla runa, cambac llacta huarmicunaca quiquin yuyaimantami ñuca shutipi huillancuna. Paicunapacman rishpa, paicuna llaqui tucunata huillai.

18Canca: “Mandac Diosca: ¡Aij, brujocuna maquicunapi huatarina cintata siraccunalla, ñuca acllashcacunata urmachingapac umapi huatarina telata ruhuac huarmicunalla! Cancunaca, ¿ñuca acllashcacunata urmachishpaca quishpiringuichicchu?

19Cancunaca puñado cebadamanta, pedazo tandamantami ñuca acllashcacuna chaupipi manapish huañuna cashcacunata huañuchishpa, huañuna cashcacunataca mana huañuchishpa mapayashcanguichic. Chashnami, ñucataca yangapi churashpa, llullashcata uyac, ñuca acllashcacunataca crichircanguichic” ninmi.

20Chaimantami Mandac Dios ñucaca: “Brujocuna maquipi huatarina cintacunataca tucuchishami. Chaicunahuanmi gentecunataca zhutacunata japic shina urmachinguichic. Cancuna urmachishca ñuca acllashcacunataca cancunapac maquimantami cacharichisha. Chashna ruhuacpica, zhutacuna shinami volanga.

21Shinallatac cancuna ruhuashca umapi huatarina telacunatapish lliquishami. Ñuca acllashcacunataca cancunapac maquimanta cacharichishami. Paicunaca mana ashtahuan cancunapac maquipi yaicungachu. Chaita ricushpami, ñucataca Mandac Dios cashcata yachanguichic.

22Ñuca manapish llaquichishca, cashcata ruhuac runatami llullashpa llaquichircanguichic. Ñucata mana manchac runacuna millaita ruhuanata ama saquichunmi yuyaita cushpa, sinchiyachircanguichic.

23Chaimantami muscuipi shina yangalla ricunatapish mana ricunguichic. Mana llullashpa huillanguichic. Ñuca acllashcacunataca cancunapac maquimantami cacharichisha. Shina ruhuacpimi, ñucataca Mandac Dios cashcata yachanguichic” ninmi ningui» nirca.