MATEO 16 - Biblia Quichua Cañar 2010

Jesusta milagrota ruhuachun nishcamanta(Mr 8.11-13; Lc 12.54-56)

1Fariseocunapish, saduceocunapish shamushpa, Jesusta pandachisha nishpaca:

—Jahua pacha Dios cachashcata ricuchingapacca milagrota ruhuashpa ricuchi— nirca.

2Chashna nicpimi Jesusca: «Cancunaca: “Chishita inti pucayashpa yaicucpica, cayaca sumac punzhami canga” ninguichicmi.

3Shinallatac: “Tutamanta jahuata puyu pucayashca cacpica, cunanca mana alli punzhami cagrin” ninguichicmi. Cancunaca chaicunata ricushpaca, imalaya punzha cagricushcataca yachanguichicmi. Ashtahuanpish cunan punzha ima tucucushcataca mana yachanguichicchu.

4Diosta mana cazuc, millai gentecuna milagrota ruhuashpa ricuchichunmi ninguichic. Chashna cashpapish imata mana ricunguichicchu, ashtahuanpish Dios ima nishcata huillac Jonás ima tucushcallatami ricunguichic» nirca.

Chashna nishpaca chaimanta rircallami.

Fariseocunapac yachachishcaca, levadura shina cashcamanta(Mr 8.14-21)

5Jesuspac yachacuccuna cuchata pasashpaca, tandatami cungarishpa rishca carca.

6Chaipimi Jesusca:

—Fariseocunapac, saduceocunapac levaduramanta cuidaringuichic— nirca.

7Chashna nicpimi paicunaca:

—Ñucanchic tandata mana apamushcamantami, chashnaca nicunga— ninacurca.

8Chaimantami Jesusca:

—Mana sinchi cric runacunalla, ¿ima nishpatac “manamari tandata apamushcanchic” ninacunguichic?

9Pichca tandata pichca huaranga yalli gentecunaman carashcatapish, chaimanta mashna taza puchushcatapish ¿manachu yuyaringuichic? ¿Manaracchu entendinguichic?

10Shinallatac canchis tandallata chuscu huaranga yalli gentecunaman carashcatapish, mashna taza puchushcatapish ¿manachu yuyaringuichic?

11Ñucaca mana tandamantachu nicuni. Ashtahuanpish fariseocunapac, saduceocunapac levadura shina yachachishcamanta cuidarichunmi nicuni. Chaitaca, ¿manachu entendinguichic?— nirca.

12Jesús chashna nicpimi, yachacuccunaca mana tandapi churana levaduramanta nicushcata, ashtahuanpish fariseocunapac, saduceocunapac yachachishcamanta cuidarinamanta yachac chayarcacuna.

Pedro “Quishpichic Cristomi cangui” nishcamanta(Mr 8.27-30; Lc 9.18-21)

13Jesús cuchulla Filipo mandacuc Cesarea puebloman chayashpa, paipac yachacuccunataca:

—Runa Tucungapac shamushca ñucataca, ¿pi cashcatatac gentecunaca yuyan?— nirca.

14Chashna tapucpimi paicunaca:

—Maijan: “Bautizac Juanmi cangui” cutin maijan: “Ñaupa huillac Eliasmi canga” cutin maijanca: “Ñaupa huillac Jeremiasmi canga, mana cashpaca, Dios ima nishcata huillaccunamanta maijanmi canga” nincunami— nirca.

15Shina nicpimi Jesusca:

—Cutin cancunaca ñucataca, ¿pi cashcatatac yuyanguichic?— nirca.

16Shina tapucpimi Simón Pedroca:

—Canca causac Diospac Churi, Quishpichic Cristomi cangui— nirca.

17Shina nicpimi Jesusca:

—Jonaspac churi Simón cushicui. Caitaca pi mana yachachishcachu, ashtahuanpish jahua pacha ñuca Taitami yachachishca.

18Ñucapish cantaca Pedromi cangui ninimi. Cai rumi jahuapimi iglesiata chayachisha. Chai iglesiataca huañuipish mana ati pudingachu.

19Canmanmi jahua pacha Dios mandacucman yaicuna llavecunata cusha. Can cai pachapi mana alli nishcataca, jahua pachapipish mana allichu ningami. Can cai pachapi allimi nishcataca, jahua pachapipish alli ningami— nirca.

20Chaimanta Jesús paipac yachacuccunataca: “Pacta piman ñuca Quishpichic Cristo cashcataca huillanguichicman” nirca.

Jesús pai huañunamanta huillashcamanta(Mr 8.31—9.1; Lc 9.22-27)

21Chashna nishca quipa Jesús paipac yachacuccunata yachachishpaca:

—Jerusalén pueblomanmi rina cani. Chaipimi curacunata mandac curacunapish, pushac yuyaccunapish, mandashcacunata yachachiccunapish llaquichicpi, llaquita apashpa huañunami cani. Shina cashpapish quimsa punzhapica causarishallami— nirca.

22Chashna nicpimi Pedroca paillata cayashpaca:

—Apunchic Jesús, ¡Dios ama munachun! ¡Chaica manatac tucungachu!— nirca.

23Chashna nicpi, Jesús Pedrota rimashpaca:

—¡Satanás caimanta anchuri! Canca, Dios munashcata ñuca ama ruhuachunmi jarcasha ningui. Canca, Dios imata ruhuasha nishcataca mana yachanguichu, ashtahuanpish gentecuna yuyashcallatami yuyangui— nirca.

24Chaimanta Jesús paipac yachacuccunataca:

—Maijanpish ñucata catisha nishpaca, quiquin causaita mana llaquishpa, cruzta apac shina llaquita apana cashpapish, ñucata catichun.

25Maijanpish quiquin causaita llaquicca chingaringami, ashtahuanpish ñucata caticushcamanta quiquin causaita mana llaquicca causangami.

26Maijanpish cai pachapi tucui ima tiyashcata charishpapish, huiñai causaita chingachishpaca, ¿ima allitac cangayari? Pai quishpiringapacca, ¿imatatac cui pudinga?

27Ashtahuanpish Runa Tucungapac shamushca ñucaca, ñuca Taitapac sumaimana achic nicuc-huan, paipac angelcunahuan cutimushpaca, tucuimanmi imata ruhuashca shina cusha.

28Runa Tucungapac shamushca ñuca mandacucta ricungacamanmi, maijan caipi caccunaca manarac huañunguichic. Chaica chashnatacmi canga— nirca.