ROMANOS 5 - Biblia Quichua Cañar 2010

Dios-huan alli tucushcamanta

1Ñucanchic crishcamanta Dios chasquicpimi, Apunchic Jesucristomanta Dios-huan cushi causanchic.

2Shinallatac Apunchic Jesucristota crishcallamantami Dios cuyashca, cushilla causacunchic. Shinami Diospac sumaimana mandanata cushicushpa shuyacunchic.

3Mana chaillachu, ashtahuanpish llaquita apashcamantapishmi cushicunchic. Chai llaquicuna mana piñarina yuyaita cuc cashcatami yachanchic.

4Mana piñaric cashpami sinchi cric cashun. Sinchi cric cashpami, cushicuihuan shuyashun.

5Diosca paipac Espirituta cachashpami, ñucanchic shungupi cuyaita churashca. Chaimantami mana yanga shuyacunchic.

6Ñucanchic maita mana quishpiripac cacpimi, Dios acllashca punzha Cristoca juchayuccunamanta huañurca.

7Pipish cashcata ruhuac runamantaca mana huañungachu. Maijan allita ruhuac runamanta huañusha nic tiyangapishchari.

8Ashtahuanpish Diosca ñucanchic juchayuc cacpipish, Cristota ñucanchicmanta huañuchun cachashpami, cuyac cashcata ricuchin.

9Apunchic Jesucristo huañushcamanta, Dios chashquishca cashpaca, Dios piñarishpa, llaquichicui punzhapica quishpirishcami cashun.

10Dios ñucanchic-huan piñashca cashpapish, paipac Churi huañushcamantami ñucanchicta chasquirca. Ña chashquishca cashpacarin Cristo causacushcamantami quishpichishca cashun.

11Shinallatac Apunchic Jesucristomanta Dios-huan alli tucushcamantapishmi Diosmanta yallita cushicunchic.

Adanmantapish, Cristomantapish

12Shuc runallamantami cai pachapica juchaca yaicurca. Chai juchamantami huañuica tiyan. Shinallatac tucui mashna juchallishcamantaca huañunami can.

13Mandashcacuna manarac tiyacpimi, juchaca ña cai pachapi tiyarca. Mandashcacuna mana tiyacpica, pipish mana juchanchishcachu carca.

14Shina cacpipish, Adanpac causai punzhamanta Moisespac causai punzhacamanmi huañuica ña tiyarca. Adán shina Dios mandashcacunataca mana cazushpapish huañurcami. Adanca chai shamuna cashca runata ricuchicmi carca.

15Dios cuyashpa cushcaca maita mana Adán juchallishcahuan chimbapuraipacchu. Shuc runa juchallishcamantami tucui gentecuna huañuna carca. Shina cacpipish, Dios cuyashpa, Jesucristota cachashpaca, tucuipac allipacmi cacharca.

16Dios cuyashpa cushcaca, mana shuc runa juchallishca shinachu carca. Chaica, Adán juchallishcamantami, Diosca taripashpa llaquichinaca yaicurca. Shina cacpipish, Dios cuyashpa, cushca Jesucristoca tauca juchayuccunatami Diospacman cutichishca.

17Shuc runa juchallishcamanta tucui gentecuna huañuna cacpica, Dios cuyashpa, cushcamanta Dios-huan alli tucushcacunacarin Jesucristollamantami mushuc causaita japinga.

18Ima shinami Adán juchallishcamanta tucui gentecuna juchayuc tucushpa llaquichina tucurca, chai shinallatacmi Apunchic Jesucristo cashcata ruhuac cashcallamanta tucui gentecuna mana juchanchishca canga. Shinallatac causaitapish charingami.

19Ima shinami shuc runa mana cazushcamanta, tucui gentecuna juchayuc tucurca. Chai shinallatacmi shuc runa cazushcamanta, tucui gentecunata Diosca chasquinga.

20Mandashcacunaca jucha ashtahuan mirarichunmi churashca carca. Chashna jucha miraricpica, Diosca ashtahuanmi cuyaita ricuchirca.

21Ima shinami juchaca cai pachaman yaicushpa tucuita huañuiman aparca, chai shinallatacmi Diosca cuyashpa, Apunchic Jesucristomanta chasquishpa, huiñai causaita cunga.