MARCOS 9 - Biblia Quichua Cañar 2010

1Shinallatac Jesusca:

—Maijan caipi caccunaca Dios, paipac poderhuan shamushpa, mandacucta ricungacaman manarac huañunguichicchu. Chaica chashnatacmi canga— nirca.

Jesús shuctaclaya ricurishcamanta(Mt 17.1-13; Lc 9.28-36)

2Sucta punzha quipami, Jesusca Pedrotapish, Jacobotapish, Juantapish pushashpa, alto urcupi paicunalla cangapac rirca. Chaipimi paicunapac ñaupapi Jesusca shuctaclaya tucurca.

3Churashcapish yuranlla, jagan nicucmi tucurca. Cai pachapica pipish mana chashna yuranllata tacshanchu.

4Yachacuccunaca Eliastapish, Moisestapish Jesus-huan parlacuctami ricurca.

5Shina ricushpami, Pedroca Jesustaca:

—¡Yachachic, mai allimi caipica canchic! Quimsa chucllatami ruhuashun ninchic, shuctaca canman, shuctaca Moisesman, shuctaca Eliasman— nirca.

6Yallita manchaihuan cashpami, Pedroca pai imata rimacushcatapish mana yacharca.

7Shina rimacucpimi puyu llandushpa, paicunata llandurca. Chai puyu ucumanta shuc rimashca uyarishpaca:

—Caimi ñuca cuyashca Churi. Pai ima nishcata uyanguichic— nirca.

8Yachacuccuna muyundita ricushpaca, pitapish mana ricurcachu, Jesusllatami ricurca.

9Chai urcumanta cutimushpaca, Jesusca chai quimsa yachacuccunataca chai ricushcataca, Runa Tucungapac shamushca Huañushcacunapuramanta causaringacaman ama piman huillachunmi mandarca.

10Chaimantami pimanpish mana huillashpa, paicunapuralla parlanacushpaca: “¿Imamantatac huañushcacunapuramanta causarina nin?” nishpa tapunacurca.

11Chaimantami Jesustaca:

—¿Ima nishpatac mandashcacunata yachachiccunaca: “Ñaupa huillac Eliasracmi shamunga” nincuna?— nishpa tapurca.

12Shina tapucpimi, Jesusca paicunataca:

—Ari, Eliasracmi tucuita allichingapac shamunga. ¿Manachu Dios quillcachishcapica: “Runa Tucungapac shamushcataca mana ricunayachishpa llaquichingami” nicun?

13Ashtahuanpish ñucaca: Eliasca ñami shamurca. Paitaca Dios quillcachishcapi nishca shinami piñashpa, munashcata ruhuarcacuna ninimi— nirca.

Jesús supai japishca huambrata alliyachishcamanta(Mt 17.14-21; Lc 9.37-43)

14Jesusca caishuc yachacuccunapacman cutimushpaca, paicunata achca gentecuna muyushpa shayacuctami ricurca. Mandashcacunata yachachiccunaca yachacuccunahuanmi sinchita rimaricurca.

15Chai gentecuna Jesús shamucucta ricushpaca, cushicushpami “allillachu cangui” ningapac callpamurca.

16Shina shamucpimi Jesusca:

—¿Imatatac paicunahuanca rimarinacucunguichic?— nirca.

17Chashna nicpi, chai gentecunapuramanta shuc runaca Jesustaca:

—Yachachic, ñuca churitami cambacman pushamurcani. Paitaca supai japishpami, upayachishpa charicun.

18Chai supaimi maipipish japishpa urmachinlla. Quiru canirishpa, shimiman puscuta shitashpami, mana cuyurishpa siricunlla. Cambac yachacuccunamanpish supaita llucchichun mañarcani. Paicunaca supaita mana llucchi pudircachu— nirca.

19Shina nicpimi Jesusca:

—¡Aij, mana cric gentecunalla! Cancunahuanca, ¿maicamantac yachachishpa causacushalla? ¿Maicamantac llaquita apacushalla? Huambrata caiman apamuichic— nirca.

20Ña apamucpica, supai Jesusta ricushpaca, huambrata chucchuchishpami urmachirca. Huambraca shimiman puscuta shitashpami singurca.

21Jesús huambrapac taitata tapushpaca:

—¿Ima horamantatac huambraca cashna causan?— nirca.

Shina tapucpi taitaca:

—Huahuamanta pachami cashna causan.

22Tauca cutinmi supaica huañuchisha ninapipish, yacupipish urmachicunlla. Can allichi pudishpaca, ñucanchicta llaquishpa ayudaiyari— nirca.

23Shina nicpimi Jesusca:

—¿Ima nishpatac “allichi pudishpaca” ningui? Tucui shunguhuan cricca, imatapish ruhuai pudinmi— nirca.

24Shina nicpimi, chai huambrapac taita caparishpaca:

—Ari, crinimi. ¡Ashtahuan cringapac ayudai!— nirca.

25Achca gentecuna tandarimucta ricushpami, Jesusca chai supaitaca:

—¡Mana uyacta, upata ruhuac supai, ñucami cai huambramanta llucshi nini! ¡Ama cutin paipi yaicunguichu!— nishpa, sinchita rimarca.

26Chashna rimacpimi, supaica caparishpa, huambrata chucchuchishpa llucshirca. Huambraca huañushca shinami pambapi saquirirca. Chaita gentecuna ricushpaca:

—Ña huañun— ninacurca.

27Ashtahuanpish Jesús huambrata maquimanta jatarichicpica, chai alliyashpa shayarircallami.

28Jesús shuc huasiman yaicucpi, paipac yachacuccunaca:

—¿Ima nishpatac ñucanchicca chai supaitaca mana llucchi pudircanchic?— nishpa, paillaman tapurca.

29Chashna tapucpimi Jesusca:

—Chai shina supaicunataca ayunashpa, Diosta mañashpallami llucchishpa cachai pudinchic— nirca.

Jesús huañunamantacutin huillashcamanta(Mt 17.22-23; Lc 9.43-45)

30Chaimanta llucshishpaca, Galilea llactatami rirca. Jesusca chaita ricushcata pipish ama yachachunmi munarca.

31Paipac yachacuccunata yachachishpaca: “Runa Tucungapac shamushca ñucataca runacunaman japichingami. Paicunami ñucataca huañuchinga. Chashna huañuchicpipish, quimsa punzhapica causarishallami” nircami.

32Paicunaca chai rimashcacunataca mana entendircachu. Chashna mana entendishpapish, manchashpami mana tapurca.

“¿Maijanshi ashtahuan alli canchic?” ninacushcamanta(Mt 18.1-5; Lc 9.46-48)

33Jesús Capernaúm puebloman chayashpa, shuc huasipi yaicushpaca paipac yachacuccunataca:

—Cancunaca, ¿imatatac ñanpica rimanacushpa shamucurcanguichic?— nishpa tapurca.

34Paicunaca ñanta shamucushpaca: “¿Maijantac ashtahuan alli canchic?” nishpami rimanacushpa shamurca. Chaimantami upalla saquirircacuna.

35Jesús tiyarishpa, paipac chunga ishcai yachacuccunata cayashpaca:

—Cancunapuramanta maijan ashtahuan alli nishca casha nishpaca, tucuimanta yalli yangalla tucushpami, tucuita servina canguichic— nirca.

36Shina nishpami, shuc huahuata paicunapac chaupipi churashpa, chai huahuata Jesús marcashpaca:

37—Maijanpish ñuca shutipi shuc huahuata shina chasquicca, ñucatami chasquin. Shina chasquishpaca, mana ñucatachu chasquin, ashtahuanpish ñucata cachac Taitatami chasquin— nirca.

“Ñucanchicta mana piñacca,ñucanchic-huanmi” nishcamanta(Mt 10.42; Lc 9.49-50)

38Shina nicpimi Juanca:

—Yachachic, cambac shutipimi shuc runaca supaicunata llucchishpa cachacucta ricurcanchic. Paica mana ñucanchicpura cacpimi, jarcarcanchic— nirca.

39Chashna nicpimi Jesusca:

—Ama jarcanguichicchu, saquichiclla. Maijanpish ñuca shutipi milagrota ruhuashpaca, mana ñucataca piñangachu.

40Maijanpish ñucanchicta mana piñacca, ñucanchic-huan alli cashcatami ricuchin.

41Cancunaca Quishpichic Cristo ñucata caticcunami canguichic. Chaimanta maijanpish cancunaman shuc vaso yacullatapish cucmanca, Diosca japina cashcata cungami. Chaica chashnatacmi— nirca.

Juchapi mana urmachina cashcamanta(Mt 18.6-9; Lc 17.1-2)

42Maijanpish cai uchilla shina ñucata criccunata pandachictaca, jatun cutana rumita cungapi huatashpa, jatun cuchapi shitanami ashtahuan alli canman.

43Chaimanta cambac maqui juchapi urmachisha nicpica, pitishpa shitangui. Ishcai maquindi mana huañuc ucu pacha ninaman rinapac randica, shuclla maquihuan jahua pachapi yaicunami canmanca ashtahuan alli.

44Ucu pachapica curucunapish mana huañunchu, ninapish huiñaita rupacunllami.

45Cambac chaqui juchaman apasha nicpica, pitishpa shitangui. Ishcai chaquindi ucu pachapi shitashca canapac randica, shuclla chaquihuan jahua pachapi yaicunami canmanca ashtahuan alli canga.

46Ucu pachapica curucunapish mana huañunchu, ninapish huiñaita rupacunllami.

47Cambac ñahui juchapi urmachisha nicpica, surcushpa shitangui. Ishcai ñahuindi ucu pachapi shitashca canapac randica, Dios mandacucpi shuclla ñahuihuan yaicunami canmanca ashtahuan alli canga.

48Ucu pachapica curucunapish mana huañunchu, ninapish huiñaita rupacunllami.

49Tucuimi ninahuan chuyayachishca canga.

50Cachica allimi. Ashtahuanpish gamuyashpaca, ¿ima shinatac cutinca alli canga? Cancunaca caishuc chaishuc-huan sumacta causashpa, cachi shina caichic— nirca.