1Israelcuna Jordán yacuta pasacpi, Mandac Dios Josueta rimashpaca:
2«Chunga ishcai Israel aillucunamanta chunga ishcai runata acllai. Cada aillumanta shucta acllashpaca:
3“Jordán yacu chaupipi chaquishca allpapi curacuna sarushca pushtumanta chunga ishcai rumita apanguichic. Chai rumicunataca cancuna cunan tuta maipimi pacaringuichic, chaipi shayachinguichic” nishpa mandai» nirca.
4Shina nicpimi, Josueca Israel aillucunapuramanta pai acllashca chunga ishcai runacunata cayarca. Paicunaca cada aillumanta shucmi carca.
5Josueca Paicunataca: «Cancunata Mandac Diospac Arca ñaupata rishpa, Jordán yacu chaupicaman richic. Chaimantaca cada Israel aillucunamanta acllashca chunga ishcai runacuna, cada shuc rumita marcashpa apaichic.
6Chai rumicunami cancunapurapica shuc señal canga. Quipa punzhacunapi cancunapac churicuna: “¿Cai rumicunaca imatatac nisha nin?” nishpa tapucpica,
7cancunaca: “Mandac Dios ari nishca quillcata huacaichina Arcata apashpa, Jordán yacuta pasagricpica, yacuca chaupirishpami ishcai ladoman saquirirca. Cai rumicunaca israelcunapac huahua huahuacunapac huiñaita yuyarinami can” ninguichic» nirca.
8Israelcunaca Mandac Dios Josueta mandashca shinallatacmi chunga ishcai rumita aparcacuna. Cada Israel aillucunamanta acllashca chunga ishcai runacunami cada shuc rumita aparca. Chaitaca maipimi paicuna pacarina pushtupimi churarca.
9Shinallatac Josuepish, Jordán yacu chaupipimi Dios ari nishca quillcata huacaichina Arcata huandushpa ric curacuna shayacushca pushtupi chunga ishcai rumicunata shayachirca. Chai rumicunaca cunancamanmi chaillapitac can.
10Arcata huandushpa ric curacunaca Josueta Mandac Dios mandashca shinallatacmi Moisés ima nishcata ningacaman Jordán yacu chaupipi shayacurca. Chai quipaca, israelcunaca utcami Jordán yacuta pasarca.
11Tucui israelcuna ña pasacpica, curacunapish paicunata catishpami Diospac Arcata apashpa pasarca.
12Moisés mandashca shinallatacmi Rubenpac, Gadpac aillupish, Manasespac chaupi aillupish macanacunata apashpa, caishuc israelcunapac ñaupata pasarca.
13Macanacungapac allichirishca runacunaca chuscu chunga huaranga shinami macanacunata apashpa Jericó pueblo pambaman Mandac Diospac ñaupata pasarca.
14Chai punzhami Mandac Diosca tucui israelcunapac ñaupapi Josuetaca jatunyachirca. Israelcunaca Moisesta cazushca shinallatac paitapish tucui causaipi cazurcacuna.
15Chai quipami, Mandac Diosca Josuetaca:
16«Ari nishca quillcata huacaichina Arcata huandushpa ric curacunata Jordán yacumanta llucshichun mandai» nirca.
17Shina nicpimi, Josueca curacunataca: «Jordán yacumanta llucshichic» nirca.
18Mandac Dios ari nishca quillcata huacaichina Arcata huandushpa ric curacuna Jordán yacu chaupimanta llucshishpa, paicunapac chaquicunapish chaquishcapi sarucpica, Jordán yacuca puntaman cashca shinallatacmi ladocunata tallirishpa ri callarirca.
19Israelcunaca punta quilla, chunga punzhapimi Jordán yacuta pasashpa, Gilgal pueblo lado pambapi carpacunata shayachishpa tiyarirca. Gilgal puebloca Jericó pueblomantaca inti llucshina ladomanmi carca.
20Chaipimi Josueca Jordanmanta apamushca chunga ishcai rumicunata shayachirca.
21Chashna shayachishpami, Josueca israelcunataca: «Quipa punzhacuna cancunapac churicuna: “¿Cai rumicunaca imatatac nisha nin?” nishpa tapucpica:
22“Jordán yacu chaupitami israelcunaca chaquishca allpata pasarca.
23Mandac Diosca israelcuna pasachunmi Jordán yacutaca Puca Cuchata ima shinami chaquichirca, chashnallatac chaquichishpa pasachirca.
24Cai pachapi tucui causaccuna Mandac Diosca imatapish ruhuaclla cashcata yachachun, shinallatac cancunapish cancunata Mandac Diosta tucui causaipi manchashpa causachunmi chashna ruhuarca” ninguichic» nirca.
Who We AreWhat We EelieveWhat We Do
2025 by iamachristian.org,Inc All rights reserved.
