1Josiasca pusac huatata charishpami mandai callarirca. Paica quimsa chunga shuc huatatami Jerusalenpi mandarca. Paipac mamaca Boscat pueblomanta Adaiapac ushi Jedidami carca.
2Mandac Diospac ñaupapica allita ruhuashpami causarca. Paipac ñaupa taita David causashca shinallatacmi alli ladomanpish, lluqui ladomanpish mana ladoyashpa allita causarca.
Dios mandashca quillcata tarishcamanta(2 Cr 34.8-33)3Josías chunga pusac huatata mandacushpami, Azaliapac churi, Mesulampac nieto quillcac Safanta Mandac Diospac huasiman cacharca. Paitaca:
4«Curacunata mandac Hilciaspacman rishpa, Mandac Diospac huasiman gentecuna apamushca cullquita tandai. Chai cullquitaca huasi pungupi cuidaccunami charicun.
5Chai cullquita japishpaca Mandac Diospac huasita allichiccunata ricuccunaman cui. Paicunami Mandac Diospac huasi pirca chictarishcacunata allichiccunaman cunga.
6Shinallatac carpinterocunaman, ashtahuan imata ruhuaccunaman, huasita ruhuaccunaman cunga. Shinallatac caspicunata, labrashca rumicunatapish randichuncuna.
7Ashtahuanpish chai cullqui imapi yaicushcataca ama tapunguichicchu. Paicunaca imatapish cashcata ruhuaccunami» nichun cacharca.
8Shina nicpimi, curacunata mandac Hilcías curaca quillcac Safantaca: «Mandashcata quillcashca librotami Mandac Diospac huasipi tarircani» nirca.
Shina nishpami chai librotaca Safanman curca. Pai japishpaca rezarcami.
9Chai quipami quillcac Safán jatun mandacpacman rishpaca:
—Can jatun mandacta serviccunaca Diospac huasipi tiyac cullquitaca ñami tandachishca. Chai cullquitaca mandac Diospac huasita allichiccunaman shinallatac allichichichun mingashca runacunamanmi cushca— nirca.
10Shinallatac quillcac Safanca: «Hilcías curami shuc librota curca» nishpami jatun mandacman huillarca.
Shina nishpami jatun mandacpac ñaupapi rezarca.
11Chai libropi cac mandashpa quillcashca shimicunata rezashcata uyashpami, jatun mandacca paipac churanata lliquirca.
12Chai quipami jatun mandacca Hilcías curatapish, Safanpac churi Ahicamtapish, Micaiaspac churi Acbortapish, quillcac Safantapish, jatun mandacta servic Asaiastapish mandashpaca:
13«Ñucamantapish, cai pueblopi causaccunamantapish, Judá llactapi tucui causaccunamantapish cai tarishca libropi quillcashca shimicuna ima nisha nicushcata Mandac Diosman tapugrichic. Ñucanchic ñaupa taitacuna ñucanchicmanta cai libropi quillcashca shinallatac mana cazushpa causashcamantami Mandac Dios ñucanchic-huan nina japiric shina piñarishca» nirca.
14Shina nicpimi, Hilcías curapish, Ahicam, Acbor, Safán, Asaías runacunapish Dios ima nishcata huillac Huldapacman rishpa parlarcacuna. Paica curacunapac churanata cuidac Salumpac huarmimi carca. Salumca Ticvapac churimi carca. Ticvaca Harhaspac churimi carca. Hulda huarmica Jerusalenllapitacmi quipata ruhuashca uchilla pueblopi causarca.
15Shina parlacpimi, chai huarmica: «Israelcunata Mandac Diosca: “Ñucapacman cachac runataca
16Mandac Diosca: ‘Riqui, ñucami cai llactamanpish, cai llactapi causaccunapac jahuamanpish jatun llaquita cachagrini. Judá llactata jatun mandacpac ñaupapi rezashca libropi nishca shinami tucui llaquicunata cachasha.
17Ñucata saquishpa shuc dioscunaman inciensota rupachishcamantami chashna llaquichigrini. Cancunapac maquihuan chashna mana allita ruhuashpami, ñucataca yallita piñachircanguichic. Chaimantami cai llactapi causaccunahuanca nina japiric shina yallita piñarircani. Chashna piñarishcamantaca manatac alli tucushachu’ ninmi.
18Mandac Diosman tapuchun cachac Judá llactata jatun mandactaca: ‘Cai libropi imata alli uyashcamantaca israelcunata Mandac Diosca:
19Cai llactatapish, cai llactapi causaccunatapish llaquichisha nicushcata Mandac Dios ñucapac ñaupapi uyashpami, yallita cambac shungupi nanarishpa, llaquilla tucushcangui. Shina llaquirishpami, cambac churanatapish lliquirishpa, Mandac Dios ñuca ñaupapi huacarcangui. Can chashna llaquirishcataca Mandac Dios ñucaca uyarcani.
20Chaimantami can huañucpipish, cambac ñaupa taitacunahuan tandachisha. Canca ima llaquipish illacmi enterrashca cangui. Tucui jatun llaquicunata cai llactaman cachactaca canca mana ricunguichu’ ninmi” nigrichic» nirca.
Chashna nicpimi jatun mandacman huillangapac cutircacuna.
Who We AreWhat We EelieveWhat We Do
2025 by iamachristian.org,Inc All rights reserved.
