1Juezcuna mandacuc punzhacunapimi, Israel llactapica yallita yarcai tiyarca. Chaimantami Judá llactapi cac Belén pueblomanta shuc runaca paipac huarmindi, ishcai churicunandi Moab llactapi causangapac rirca.
2Chai runaca Elimelecmi carca. Paipac huarmica Noemimi carca. Churicunaca Mahlón, Quelionmi carca. Paicunaca Judá llacta Belén pueblomanta efrateopurami carca.
Moab llactaman chayashpaca chaipi causangapacmi saquirircacuna.
3Ashtahuanpish Noemipac cusa Elimelecca huañurcami. Noemica paipac ishcai cari huahuacunallahuanmi saquirirca.
4Chai huahuacunaca moabita huarmicunahuanmi cazararca. Chai huarmicunaca shucca Orfa, caishucca Rutmi carca. Paicunaca chunga huata shinatami causarcacuna.
5Chai quipaca Mahlonpish, Quelionpish huañurcami. Chaimantami Noemica ishcai huahuacunapish, cusapish huañucpi, pailla saquirirca.
6Noemica Moab llactapi cashpami: “Mandac Diosca pai acllashcacunata llaquishpami cutinllatac granota pucuchi callarishca” nicta uyarca. Shina uyashpami paipac ishcai nueracunandi Moab llactamanta cutirca.
7Noemica pai causacushca pushtumantami ishcai nueracunandi Judá llactaman cuti callarirca.
8Chashna cuticushpami Noemica paipac ishcai nueracunataca:
—Cancunaca, quiquin taitacunapac huasiman cutichiclla. Cancunapac huañushca cusacunahuanpish, ñucahuanpish allimi causarcanguichic. Chashnallatac Mandac Diospish cancunata llaquichun.
9Cancuna cazarashpa cancunapac cusacunapac huasipi causacucpi, Mandac Dios sumac cushi causaita cuchun— nirca.
Shina nishpami Noemica muchashpa caya minchacaman nirca. Ashtahuanpish paicunaca sinchita huacashpami:
10—Ñucanchicca canllahuantacmi cambac llactaman cutishun ninchic— nircacuna.
11Shina nicpimi Noemica:
—Ñuca huahuacunalla, cutichiclla. ¿Imapactac ñucahuanca ringuichicyari? Cancunahuan cazarachunca mana cutin huahuacunata huicsapi charinichu.
12Ñuca huahuacunalla, cutichiclla. Ñucaca cutin cazarangapacpish ñami paya cani. Cunan tuta cusahuan sueñushpa huahuacunata charigrinimi nicpipish,
13¿Cancunaca paicuna huiñangacaman shuyanguichicmanchu? ¿Paicuna huiñangacaman mana cazarashpa shuyanguichicmanchu? Ñuca huahuacunalla, ama chashna ruhuaichicchu. Mandac Diospac poder ñucata llaquichicpimi, cancunata yalli llaquita apacuni— nirca.
14Cutinllatacmi paicunaca sinchita huacarcacuna. Shina cashpapish Orfaca paipac suegrata muchashpami paipac huasiman cutirca. Ashtahuanpish Rutca paihuanmi saquirirca.
15Chaimantami Noemica:
—Riqui, cambac cuñadaca ñami paipac puebloman paipac dioscunapacman cutin. Canpish paita catishpa cutilla— nirca.
16Ashtahuanpish Rutca:
—Canta saquishpa, canmanta
caruyachun ama mañaichuyari.
Can maiman ricpipish,
ñucapish chaimanmi risha.
Can maipi causacpipish
chaipimi causasha.
Cambac llactapish ñuca
llactami canga.
Cambac Diospish
ñuca Diosmi canga.
17Maipimi can huañungui,
chaipimi ñucapish huañusha,
chaillapitacmi enterrashca casha.
Ñuca nishcata mana pactachishpa
canta saquishpa ricpica,
Mandac Diosllatac
yallita llaquichichun.
Ñucanchic ishcaimantaca
huañushpami raquirishun— nirca.
18Paihuan ringapactac yuyarishcata yachashpami Noemica imatapish mana ashtahuan nirca.
19Paicunaca Belén puebloman chayangacamanmi ishcaita rircacuna. Chai llactapi causaccunaca tucuimi paicuna chayacta ricushpaca mancharirca. Shina mancharishpami:
—¿Manachu caica Noemí?— nishpa tapunacurca.
20Shina cacpimi Noemica:
—Ama Noemí nishpa cayaichicchu, ashtahuanpish Mara nishpa cayaichic. Imatapish ruhuac Diosca yalli llaquitami ñucaman cushca.
21Caimantaca achca
charishcahuanmi rircani.
Ashtahuanpish Mandac Diosca
chushacllatami cutichimushca.
¿Ima nishpatac Noemí ninguichic?
Mandac Diosca ñucataca
llaquichishcami.
Imatapish ruhuac Diosmi
ñucataca llaquishca— nirca.
22Chashnami Noemica Moab llactamantaca moabitapuramanta paipac nuera Ruthuan Belenman cutirca. Paicunaca cebadata cosechana callari punzhacunapimi chayamurcacuna.
Who We AreWhat We EelieveWhat We Do
2025 by iamachristian.org,Inc All rights reserved.
