1Mandac Dios ñucata rimashpaca:
2«Jerusalenpi causaccunaman
huillashpa, Mandac Diosca:
“Ñucaca canta yuyarinimi.
Cunan huiñai cashpaca,
allimi cazurcangui.
Cunanlla cazarashca shinami,
ñucata cuyarcangui.
Chaimantami ima mana pucuc
shitashca pambatapish ñucata
catimurcangui.
3Israelcunaca ñucapaclla
chicanyachishca punta pucushca
grano shinami carca.
Paicunata tucuchiccunataca
yallitami llaquichic carcani”
ninmi ningui» nirca.
4¡Jacobopac huahuacunapura tucui israelcuna Mandac Dios rimashcata uyaichic!
5Mandac Diosca:
«Cancunapac ñaupa taitacuna
ñucata saquingapacca,
¿ima mana allitatac tarircayari?
Paicunaca imatapish mana ruhuac
ruhuashcalla dioscunata catishpami,
mana alli nishca tucurca.
6Paicunaca: “¿Maipitac Egiptomanta
ñucanchicta llucchimuc
Mandac Diosca?
Paica shitashca pambapipish,
huañui japina amsapipish,
chaquishca pambacunata,
pipish mana purishca,
pipish mana causashca llactatami
ñucanchictaca pushamurca”
nishpaca mana nircacunachu.
7Ñucami allita micushpa causachun
alli grano pucuc allpaman
pushamurcani.
Ashtahuanpish cancuna
chaiman yaicushpaca ñuca llactata
mapayachircanguichicmi.
Millanatami ruhuarcanguichic.
8Curacunaca: “¿Mandac Diosca
maipitacyari?” mana nircachu.
Ñuca mandashcata ricuccunapish
mana ricsircachu.
Michiccunapish ñucataca piñarcami.
Ñucamanta huillaccunapish
Baal diospac shutipimi huillarca.
Chashnami imatapish mana ayudac
dioscunatarac catirca.
9Chaimantami ñucaca
piñarishpa llaquichigrini.
Cancunapac huahuacunapac
churicunahuanpish piñarigrinimi.
Chaitaca Mandac Dios ñucami nini.
10Mama cucha patapi tiyac
Quitim llactaman pasashpa
ricuichicyari.
Cai shina maipi tucushcata
yachangapac Cedar llactapi
tapuchun maijanta cachaichicyari.
11¿Maijan llactatac paicunapac
dioscuna yanga cacpipish,
chai dioscunata saquishpa,
shuctac dioscunata catishca?
Ashtahuanpish ñuca acllashcacunaca
paicunapac poderyuc Diosta
saquishpami, ruhuashcalla
dioscunata catirca.
12¡Jahua pachalla, caita ricushpaca
mancharishpa chucchuiyari!
Chaitaca Mandac Dios ñucami nini.
13Ñuca acllashcacunaca
cai ishcai mana allitami ruhuarca.
Puntaca tucyacuc yacu shina,
causaita cuc ñucatami saquirca.
Chai quipaca yacu mana jundaric
chictarishca jutcucunatami
yacu tandarichun ruhuarca.
14Israelcunaca mana servic
runacunachu.
Mana huatashca shinachu causarca.
¿Imamantatac israelcunaca prezurirca?
15Paicunata llaquichingapacca
leoncunami huacashpa shamurca.
Llactataca chushac pambatami
saquirca.
Llactacunata rupachishpami
shuc runallatapish mana saquirca.
16Menfis, Tafnes llactacunapi
causaccunapish umata paquircami.
17¿Manachu Mandac Dios ñuca
canta ñanta pushamucucpi,
ñucata saquishcamanta
chai llaquica japin?
18Cunanca, Egiptopi tiyac
Nilo yacuta ubiangapac cutishpaca,
¿imatatac llucchinguichic?
Asiria llacta
Eufrates yacuta ubiangapac
cutishpaca, ¿imatatac
llucchinguichic?
19Can quiquin mana allita
ruhuashcallatacmi llaquichinga.
Ñucata saquishpa
juchallishcallatacmi llaquichinga.
Mandac Dios ñucamanta anchurinapish,
ñucata mana manchanapish
mana alli cashcata,
llaqui cashcataca alli yuyariyari.
Chaita tucuita Mandac Dios ñucami
nini.
20Utcamanta pachami yugota
paquishpa, coyundatapish
pitircangui.
Shina ruhuashpaca:
“¡Mana servishachu!” nircanguimi.
Chashna nishca jahuami lomacunapi,
jatun yura ucucunapi huainayac
huarmi shina sirirircangui.
21Ñucaca cantaca alli acllashca
uvas muyuta shinami tarpurcani.
¿Ima nishpatac sacha uvas shina
tucurcangui?
22Lejiahuan, tucuilaya jabonhuan
armaricpipish, cambac juchacunaca
manatac anchuringachu.
Ñuca ñahuipica ricuricungallami.
23¿Ima nishpatac canca:
“Mana mapayashcachu cani,
Baal dioscunatapish
mana catishcanichu” ningui?
Pambacunapi can imata
ruhuashcatapish ricuiyari.
Alli yuyariyari.
Ñanman llucshishpa, maitapish
callpac huarmi shinami cangui.
24Shitashca urcupi causac
huarmi burro cari burrota
mashcashpa, mutquishpa maitapish
callpac shinami cangui.
Chai huarmi burro cunucyashcataca,
¿pitac jarcai pudingayari?
Tucui paita mashcaccunapish
mana shaicushpa taringami.
25Lluchu chaquilla purinamantapish,
yacunayaihuan cunga chaquishpa
purinamantapish cuidaringui
nicpica canca: “Mana,
mana saqui pudinichu.
Ñucaca shuccunatami cuyani.
Paicunatami catisha”
nircanguimi.
26Shuhuac japi tucushpa,
pingai tucuc shinami,
israelcunaca juchata
ruhuashcamanta pingai tucunga.
Paicunapish, jatun mandaccunapish,
paicuna churashca mandaccunapish,
curacunapish, huillaccunapishmi
pingai tucunga.
27Shuc yurata:
“Canmi ñuca taita
cangui” niccunapish,
shuc rumita: “Canmi ñuca
mama cangui” niccunapish,
pingai tucungami.
Paicunaca ñucaman ñahuita
ricuchina shinaca,
huashatami ricuchin.
Cutin llaqui japicpica:
“¡Quishpichingapac jatariyari!”
nicuncunami.
28Judá llactapi causaccunalla,
cancunaca achca dioscunatami
charinguichic.
¿Chai dioscunaca maipitacyari?
¡Llaqui punzhacunapi,
quishpichingapac jatarichun!
29¿Ima nishpatac ñucataca
caita chaita nishpa piñachinguichic?
Cancunaca ñucata mana cazushpami
piñarcanguichic.
Chaitaca Mandac Dios ñucami nini.
30Ñuca llaquichicpipish,
cancunapac huahuacunaca
manatac entendishcacunachu.
Yangami llaquichishcani.
Ñuca ima nishcata huillaccunataca
espadahuanmi millai león shina
tucuchishcanguichic.
31¡Quipa huiñaicunalla,
ñuca rimashcata alli uyaichic!
Ñucaca israelcunapacca,
¿shitashca pamba shina,
mana cashpaca pura tutapi cac
llacta shinachu carcani?
¿Imamantatac ñuca acllashcacunaca:
“Cunanca cacharishcami canchic,
jaicapi cambacmanca mana
cutishunchu” nincuna?
32Carihuan manarac chayarishca
solteraca, ¿sumac churanata
cungarinchu?
Cazarangapac ari nishca solteraca,
¿sumacta allichirinataca cungarinchu?
Ashtahuanpish ñuca acllashcacunaca
mana yupaipac punzhacunatami
ñucata cungarishpa causan.
33¡Cuyacta mashcanataca
allitami yachangui!
Mana allita ruhuac huarmicunapish
canta ricushpami yachacurca.
34Cambac churanaca
huacchacunapac yahuarhuan,
mana faltayuccunapac yahuarhuanmi
cahuirishca.
Paicuna mana allita ruhuashcataca
mana tarircanguichu.
Shina cashpapish,
35canca: “Ñucaca ima mana
allitapish mana ruhuacchu cani.
Diosca ñucahuanca
mana piñarishcachu” ninguimi.
Shina can: “Ima juchata
mana ruhuashpami causarcani”
nicucpipish, ñucami can imata
ruhuashcataca ricuchigrini.
36¿Ima nishpatac ñanpi
caiman chaiman callpacunguiyari?
Asiria llactata jatun mandac
pingaichishca shinallatacmi
Egipto llactata jatun mandacpish
cantaca pingaichinga.
37Egiptomantaca maquita uma jahuapi
churashpami cutimungui.
Ñucallatacmi can imapi shunguta
churashpa causaccunataca piñarcani.
Paicunamantaca ima allitapish
mana chasquinguichu.
Who We AreWhat We EelieveWhat We Do
2025 by iamachristian.org,Inc All rights reserved.
