2 REYES 18 - Biblia Quichua Cañar 2010

Ezequías mandashcamanta(2 Cr 29.1-2)

1Elapac churi Oseas quimsa huatata Israel llactata mandacucpimi, Acazpac churi Ezequiasca Judá llactata mandai callarirca.

2Ezequiasca ishcai chunga pichca huatata charishpami mandai callarirca. Paica ishcai chunga iscun huatatami Jerusalenpi mandarca. Paipac mamaca Zacariaspac ushi Abimi carca.

3Ezequiasca Mandac Diospac ñaupapica paipac ñaupa taita David shinallatacmi allita ruhuashpa causarca.

4Paimi lomacunapi tiyac altarcunata anchuchishpa, imamanpish riccha dioscunata paquirca. Asera huarmi diosta yuyarina yuracunata pitishpami, Moisés ruhuachishca bronce culebratapish paquirca. Chai punzhacamanmi israelcunaca inciensota rupachishpa carcacuna. Chaimantami Nehustán nishpa shutichirca.

5Ezequiasca israelcunata Mandac Diosta yallita crishpami causarca. Judá llactata tucui jatun mandaccunapurapica utcapi mandaccunapish, quipata mandaccunapish pai shinaca pipish mana tiyarcachu.

6Ezequiasca Mandac Diosmanta mana anchurishpami catirca. Mandac Dios Moisesman cushca mandashcacunatapish pactachishpami causarca.

7Mandac Dios Ezequias-huan cacpimi pai imata ruhuacpipish tucui alli llucshirca. Asiria llactata jatun mandacta mana cazushpami, mana servirca.

8Shinallatac filisteocunatapish Gaza pueblocaman, chai pueblo linderocamanmi catishpa tucuchirca. Chapana torremanta callarishpa, jatun pircahuan muyundita jarcashca pueblocamanmi catishpa tucuchirca.

Samaria pueblota japishcamanta

9Judá llactata jatun mandac Ezequías chuscu huatata mandacucpimi, Elapac churi Oseasca canchis huatata Israel llactata mandacurca. Chai huatapimi Asiria llactata jatun mandac Salmanasarca Samaria puebloman shamushpa, chai pueblota muyurca.

10Quimsa huata quipami Samaria pueblota japirca. Ezequías sucta huatata mandacucpi, Oseas Israel llactata iscun huatata mandacucpimi, Samaria pueblotaca japirca.

11Asiria llactata jatun mandac israelcunata Asiria llactaman prezu apashpaca, Halah pueblopi, Gozán jatun yacu ladopi cac Habor llactapi causachunmi churarca. Shinallatac medocunapac pueblocunapipish churarcami.

12Paicunata Mandac Diosta mana cazushcamanta, Dios-huan ari nishcata yangapi churashcamanta, Mandac Diosta servic Moisés mandashcacunatapish mana ruhuashcamanta, mana uyashcamantami chashnaca tucurcacuna.

Judá llactaman jatun mandac Senaquerib yaicushcamanta(2 Cr 32.1-19; Isa 36.1-22)

13Ezequías chunga chuscu huatata mandacucpimi, Asiria llactata jatun mandac Senaqueribca Judá llacta muyundi pircashca pueblocunapi causaccunata huañuchishpa, chai pueblocunata japirca.

14Judá llactata jatun mandac Ezequiasca, Asiria llactata jatun mandac Laquis pueblopi cacta yachashpami shuc huillashcata cachashpaca: «Ñucaca mana allitami ruhuashcani. Cai llactamanta llucshi ñucaca can mañashcatami cusha» nichun cacharca.

Shina nicpimi, Asiria llactata jatun mandacca quimsa patsac talento cullquita, quimsa chunga talento curita cuchun mañarca.

15Chashna mañacpimi, Ezequiasca Mandac Diospac huasipi tucui tiyashca cullquitapish, mandana huasipi tucui huacaichishca curitapish curca.

16Chai punzhacunallatami Ezequiasca paillatac ruhuashca Mandac Diospac huasipi cac curihuan cahuishca pungutapish, chai pungu curi marcocunatapish llucchishpa, Asiria llactata jatun mandacman curca.

Mandac Rabsaces llaquichisha nishcamanta

17Chai quipami Asiria llactata jatun mandacca Tartán, Rabsaris shinallatac Rabsaces quimsa mandaccunata achca soldadocunahuan Jerusalenpi jatun mandac Ezequias-huan macanacuchun Laquis pueblomanta cacharca. Jerusalenman huichai shamushpaca, jahua ladopi tiyac tanqueman shamucuc yacu patapimi carpa huasicunata shayachishpa tiyarircacuna. Chaica tacshaccunapac pambaman rina ñanpimi carca.

18Chai quipami jatun mandac Ezequiastaca cayarcacuna. Shina cayacpimi Hilciaspac churi mayordomo Eliaquimpish, quillcac Sebnapish, jatun mandacpac huillac Asafpac churi Joapish paita tupangapac llucshirca.

19Paicunatami mandac Rabsacesca:

—Ezequiastaca: Asiria llactata jatun mandacca: “¿Ima nishpatac macanacushpa atishallami nicungui?

20Canca macanacungapac alli yuyaiyuc alli sinchimi cani ninguimi. Canca shimillami cangui. ¿Ima nishpatac mana cazushpa, ñucahuan macanacungapac shayaringui?

21Canca astillaricuc taunapi taunallic shinami, Egipto llactapi shunguta churashpa causacungui. Maijanpish chaipi taunaricpica, astilla maquipi satiringami. Chashnami Egipto llactata jatun mandac Faraonca tucui paipi shunguta churaccunata ruhuanga.

22Cutin cancunaca: ‘Ñucanchicta Mandac Diospimi shunguta churanchic’ nishpaca ¿Ima nishpatac lomacunapi tiyac altarcunataca Ezequiasllatac anchuchirca? Chashna anchuchishpaca, ¿manachu Judá gentecunata, Jerusalenpi causaccunataca: ‘Jerusalenpi tiyac altar ñaupapi Diosta alli nina canguichic?’ nirca.

23Cunanca, Asiria llactata jatun mandac ñuca amoman caballocunapi ric soldadocunata can cucpica, ñucapish ishcai huaranga caballocunatami cusha.

24Egipto carretacunapi, caballopi ric soldadocunapimi shunguta churashpa cangui. Ñuca amopac soldadocunapuramanta yangalla soldadocunahuanpish macanacunataca mana pudinguichu.

25¿Cunanca, Mandac Dios manapish cachacpichu cai llactata tucuchingapac shamushcani? Mandac Diosmi ñucataca: ‘Chai llactaman rishpa tucuchigri’ nirca” nichunmi— cacharca.

26Shina nicpimi, Hilciaspac churi Eliaquimpish, Sebnapish, Joapish chai mandactaca:

—Canta servic ñucanchictaca arameo rimaipi rimai. Chai rimaitaca yachanchicmi. Ama hebreo rimaipi rimaichu, pirca jahuapi cac gentecuna uyacuncunami— nirca.

27Shina nicpipish, mandac Rabsacesca:

—Ñucata mandacca ¿canman, canta mandacllamanchu cai shimicunataca huillachun cacharca? ¿Manachu cai pirca jahuapi shayacuc gentecunamanpish huillachun cacharca? Paicunapish ¿Manachu cancuna shinallatac paicuna mapayachishcata micungapac paicuna miyashcata ubiangapac shuyacuncuna?— nirca.

28Shina nicpimi, chai mandac shayarishpa, hebreo rimaipi sinchita caparishpaca: «¡Asiria llactata jatun mandac rimashcata uyaichic!

29Pai jatun mandacca: “Ezequías nishcataca ama crichicchu. Paica ñuca maquimanta mana cacharichi pudingachu.

30Mandac Diosta crichunmi paica: ‘Mandac Diosca ñucanchictaca cacharichingami. Cai pueblotaca Asiria llactata jatun mandacpac maquipica mana churangachu’ ningami” nirca.

31¡Ezequiastaca mana uyanachu canguichic! Asiria llactata jatun mandacca: “Cushi causai tiyachun ñucahuan parlangapac shamuichic. Shina ruhuashpaca, tucui cancunami quiquin uvas, higo chagramanta micunguichic. Yacutapish quiquin jundumanta ubianguichic.

32Ñucaca cancunapac llacta shinallatac alli granota pucuc, vinopish, tucuilaya micunapish, uvas chagracunapish, olivospish, aceitepish, bunga mishquipish tiyac llactaman pushac shamungacamanmi chashna causanguichic. Chashnami mana yarcaihuan huañunguichic. Ezequiastaca mana uyanachu canguichic. Paica llullashpami: ‘Mandac Diosca ayudangami’ nicun.

33Paipac llactataca ¿Maijan llactamanta dioscunatac Asiria llacta jatun mandacpac maquimanta cacharichirca?

34¿Maipitac Hamat, Arfad pueblomanta diosca? ¿Maipitac Sefarvaim, Hena, Iva pueblomanta dioscunaca? ¿Chai dioscunaca ñuca maquimanta Samaria pueblota cacharichircachu?

35¿Chai llacta dioscunamantaca maijan Diostac paicunapac llactata ñuca maquimanta cacharichishca? Chashna cacpica, ¿ima shinatac Mandac Diosca Jerusalentaca ñuca maquimanta cacharichinga?” ninmi» nirca.

36Chashna nicucpipish, gentecunaca imata mana nishpa upalla uyacurcacunallami. Jatun mandac Ezequiasmi paicunataca: «Imatapish ama rimanguichicchu» nishca carca.

37Chai quipami Hilciaspac churi mayordomo Eliaquimpish, quillcac Sebnapish, Asafpac churi Joapish paicunapac churanata lliquishpa Ezequiaspacman shamurca. Paipacman shamushpami, chai mandac ima nishcata huillarca. Joaca jatun mandacpac randi parlacmi carca.