1 SAMUEL 28 - Biblia Quichua Cañar 2010

Saulmanta shinallatac Endor pueblopi causac huarmimanta

1Chai punzhacunallatacmi filisteocunaca israelcunahuan macanacungapac paicunapac soldadocunata tandachirca. Chaipimi Aquisca Davidtaca:

—Canca cambac runacunandi ñucahuan tandanacushpami, macanacuiman rina cangui. Chaitaca canllatacmi alli yachangui— nirca.

2Shina nicpimi, Davidca Aquistaca:

—Canta servic ñuca imata ruhuanatapish canllatac allimi yachangui— nirca.

Saulmantapish, Endor llactaadivina huarmimantapish

Shina nicpimi, Aquisca Davidtaca:

—Shina cashpaca ñuca tucui causaipimi, ñucata cuidac soldadocunata mandac cachun churasha— nirca.

3Samuelca ñami huañushca carca. Tucui israelcunami huacashpa, pai causacushca Ramá pueblollapitac enterrashca carca. Ashtahuanpish Saulca huañushcata mañaccunatapish, adivinocunatapish tucuimi Israel llactamantaca llucchishpa cachashca carca.

4Shina cacpimi, filisteocunaca Sunem puebloman shamushpa, carpa huasicunata shayachishpa tiyarirca. Shinallatac Saulpish tucui israelcunata tandachishpami, Gilboa urcupi carpa huasicunata shayachishpa tiyarirca.

5Filisteocuna carpa huasicunata shayachishpa, tiyaricta ricushpami, Saulca yallita mancharishpa, paipac shungupi yalli llaquirirca.

6Chaimantami Saulca Mandac Diosta tapurca. Shina tapucpipish, Mandac Diosca muscuipipish, Urim nishcapi suerteta ruhuacpipish, Dios ima nishcata huillaccunamanpish, imata mana nircachu.

7Chaimantami Saulca paita serviccunataca:

—Ñuca tapungapac ringapac huañushcata mañac huarmita mashcagrichic— nirca.

Shina nicpimi, paita serviccunaca:

—Riqui, Endor pueblopimi huañushcata mañac shuc huarmi causan— nirca.

8Shina nicpimi, Saulca ama ricsichun shuctac churanata churarishpa, ishcai runacunata pushashpa, chai huarmipacman tuta rirca. Chaiman tuta chayashpaca:

—Ñuca ima tucunata cambac espirituman tapushpa cui. Shinallatac ñuca maijanta huichai shamuchun nicpi, pushamuchun mañashpa cui— nirca.

9Shina nicpimi, chai huarmica:

—Riqui, canca Saúl imata ruhuashcataca yachanguimi. Paimi huañushcata mañaccunatapish, adivinocunatapish cai Israel llactamanta llucchishpa cacharca. ¿Ima nishpatac ñucata huañuchichun pandachingapac shamungui?— nirca.

10Shina nicpimi Saulca:

—¡Mandac Diospac shutipimi nini: Can caita ruhuashcamantaca ima llaquipish mana japingachu!— nishpa Mandac Diospac shutipi ari nirca.

11Shina nicpimi, chai huarmica:

—¿Pitatac huichai shamuchun nisha?— nirca.

Shina nicpimi Saulca:

—Samuelta huichai shamuchun ni— nirca.

12Samuelta chai huarmi ricushpaca sinchita caparishpami Saultaca:

13—¿Ima nishpatac umarcangui? ¡Canca Saulmari cangui!— nirca.

Shina nicpimi, jatun mandacca:

—Ama manchaichu. ¿Imatatac ricungui?— nirca.

Shina nicpimi, chai huarmica:

—Allpamanta dioscuna llucshicuctami ricuni— nirca.

14Shina nicpimi Saulca:

—¿Chaicunaca imalayatac ricurin?— nishpa tapurca.

Shina nicpimi, chai huarmica:

—Yuyac runami, jahualla churanahuan pillurishpa llucshicun— nirca.

Shina nicpi, Saulca Samuelmi canga yuyashpa, allpaman chayacta cumurirca.

15Chaipimi Samuelca Saultaca:

—¿Imapactac ñucata huichai cayashpa piñachingui?— nirca.

Shina nicpimi Saulca:

—Filisteocunami ñucata piñashpa macanacungapac shamushca. Diospish ñucamantaca anchurishcami. Chaimantami ñucaca yalli llaquiricuni. Ñuca tapushcataca Diosca muscuipipish, pai ima nishcata huillaccunamanpish imata mana huillanchu. Chaimantami ñuca ima ruhuanata huillachun cantaca cayarcani— nirca.

16Shina nicpimi Samuelca:

—Mandac Dios canmanta anchurishpa, canta piñacucpica, ¿imapactac ñucataca tapunguiyari?

17Mandac Diosca ñucaman huillashca shinallatacmi cantaca ruhuashca. Mandac Diosllatacmi can mandanata quichushpa, cambac ricsishca Davidman cushca.

18Canca Mandac Dios rimashcatapish mana cazurcanguichu. Shinallatac amalecitacunahuan Dios nina japiric shina piñarishpa, paicunata tucuchichun nicpipish mana pactachircanguichu. Chaimantami Mandac Diosca cunanca chashna ruhuashca.

19Shinallatac Mandac Diosca israelcunatapish, cantapish filisteocunapac maquipimi churanga. Shina churacpimi, cayaca canpish, cambac churicunapish ñucahuan canguichic. Mandac Diosca Israel soldadocunatapish filisteocunapac maquipimi churanga— nirca.

20Samuel chashna huillacta uyashpami yallita mancharishpa Saulca jatun runa cashcamanta pambapi suniman urmarca. Shinallatac chai punzhapish, chai tutapish imata mana micushcamantami fuerza illac carca.

21Saúl yallita mancharishpa, ima ruhuanatapish mana pudicta ricushpami, chai huarmi shamushpaca:

—Canta servic ñucaca can rimashcatami cazurcani. Can imata ruhuai nishcatapish uyashpami, huañunatapish mana manchashpa, tucui ruhuarcani.

22Chaimanta cunanca canta servic ñuca ima nishcatapish uyai. Can sinchiyashpa, ñanta richunmi asha micunata caragrini— nirca.

23Shina nicpipish Saulca:

—Mana micusha ninichu— nirca.

Ashtahuanpish, paita serviccunapish, chai huarmipish micuchun nicucllapitacmi micurca. Ña micushca quipaca, pambamanta jatarishpami camapi tiyarirca.

24Chai huarmica paipac huasipimi shuc huirayachishca becita charirca. Chaitami huañuchirca. Chai quipaca harinata japishpa masashpami, levadura illac tandata ruhuarca.

25Shina ruhuashpami Saulmanpish, paita serviccunamanpish apamushpa cararca. Ña micushpaca chai tutallatacmi jatarishpa rirca.