LUCAS 10 - Biblia Quichua Cañar 2010

Jesús canchis chungacunata huillachun cachashcamanta

1Chai quipami Apunchic Jesusca canchis chungacunata acllashpa, pai chayana pueblocunaman, llactacunaman ishcai ishcaita ñaupachishpa cacharca.

2Paicunataca: «Cosechanaca achcami. Cosechaccunaca ashallami. Chaimanta ashtahuan cosechaccunata cachachun, Chagrayucman mañaichic.

3Cancunataca atuccunapac chaupita ovejacunata cachac shinami cachani. Cunanca richiclla.

4Cancunaca cucayutapish, cullquitapish, ushutallatapish ama apaichicchu. Ama ñanpi pihuan saludashpa unaiyanguichicchu.

5Mai huasiman chayashpaca: “Cushi causai tiyachun” nishpa, saludanguichic.

6Chai huasipi maijan cushi causaita munac tiyacpica, cancuna nishcaca pactangami. Paicuna mana chasquicpica, cancuna nishcaca mana pactangachu.

7Trabajac runaca pagota japinami can. Chaimanta mai huasipi alli chasquicpica, chaipi imata cushcata micushpa, ubiashpa canguichic.

8Mai pueblopi alli chasquicpica, imalla carashcata micunguichic.

9Chai pueblopi ungushcacuna tiyacpica alliyachinguichic. Paicunataca: “Diosca ñami mandagrin” ninguichic.

10Mai puebloman yaicucpi mana chasquishun nicpica, ñanman llucshishpa:

11“¡Ñucanchic chaquipi catirishca allpatapish, cancuna mana chasquisha nishcata ricuchingapacmi, caillapitac chaspishpa rinchic! Ashtahuanpish Diosca ñami cancunata mandagrin. Chaitaca allita yuyarinami canguichic” ninguichic.

12Ñucaca: Taripana punzhapica, Sodoma pueblopi causaccunata yallimi chai pueblopi causaccunaca llaquita apanga.

Jesús huillashcata mana cazuccunamanta(Mt 11.20-24)

13¡Aij, Corazín pueblolla! ¡Betsaida pueblolla, imachari tucunguichic! Cai pueblocunapi ruhuashca milagrocunata Tiro pueblopi, Sidón pueblopi ñuca ruhuashca cacpica, paicunaca sharpa churanata churarishpa, uchupapi tiyarishpa, llaquirishpa Diosman cutirinmanmi carca.

14Taripana punzhapica Tiro pueblopi, Sidón pueblopi causaccunamanta yallimi llaquita apanguichic, ninimi.

15Capernaúm pueblopi causac, cancunaca jahua pachamantami yuyacunguichic, ashtahuanpish ucu pachamanmi shitashca canguichic» nirca.

16Jesusca paipac yachacuccunataca: «Cancuna ima nishcata uyacca, ñucatami uyan. Cancunata piñacca, ñucatami piñan. Ñucata piñacca, ñucata cachac Taitatami piñan» nirca.

Jesús cachashca canchis chungacuna cutimushcamanta

17Canchis chungacuna cushicuihuan cutimushpaca:

—Apunchic Jesús, cambac shutipi nicpica, supaicunapish cazunmi— nirca.

18Chashna nicpimi Jesusca:

—Ari, Satanastaca relampa shina jahuamanta urmactami ricurcani.

19Cancunamanmi culebracunatapish, alacrancunatapish saruchun poderta cuni. Ima millaitapish atinguichicmi. Cancunataca mana imata ruhuangachu.

20Shina cacpipish, ama supaicuna cazushcallamanta cushicuichicchu, ashtahuanpish cancunapac shuticuna jahua pacha libropi quillcashca cashcamanta cushicuichic— nirca.

Jesús cushicushcamanta(Mt 11.25-27; 13.16-17)

21Chai ratollatacmi, Jesusca Diospac Espíritu cushichicpi, yallita cushicushpaca: «Jahua pachatapish, cai pachatapish Mandac ñuca Taitalla, cantaca alli ninimi. Canca cai yachanacunataca alli yuyaiyuc, alli yachaccunamanta pacashpami, huahuacuna shinaman ricuchishcangui. Ari, Taitito, chaitami ruhuasha nishcangui.

22Ñuca Taitaca tucuitami ñucaman curca. Ñuca pipac Churi cashcataca pi mana yachanchu, ñuca Taitallami yachan. Ñuca Taita pi cashcatapish pi mana yachanchu, ñucallami yachani. Pipish ñuca yuyaita cucllapimi, ñuca Taita pi cashcataca yachancuna» nirca.

23Jesús yachacuccunallata cayashpaca:

—Cunan ricucushcata ricuccuna cushicuichic.

24Cai cancuna ricushcataca tauca Diosmanta ñaupa huillaccunapish, jatun mandaccunapish ricunata munarcami. Chashna munashpapish manatac ricurcacunachu. Cancuna uyacushcata uyanata munacushpapish, manatac uyarcacunachu— nirca.

Samaria llacta alli runamanta

25Mandashcacunata shuc yachachic shayarishpa, Jesusta pandachisha nishpa tapushpaca:

—Yachachic, huiñai causaita charingapacca, ¿imatatac ruhuana cani?— nirca.

26Chashna nicpimi Jesusca:

—Dios quillcachishpa mandashcacunapica, ¿imata ruhuachun nishcatatac ricungui?— nirca.

27Shina nicpimi, chai yachachicca:

—Chaipica: “Tucui shunguhuan, tucui almahuan, tucui yuyaihuan, tucui munaihuan canta Mandac Diosta cuyangui. Can quiquinta shina, shuccunatapish cuyangui” ninmi— nirca.

28Shina nicpimi Jesusca:

—Allitami ningui. Caicunata pactachishpaca, huiñai causaita charinguimi— nirca.

29Chashna nicpipish, chai yachachicca mana upalla saquirircachu. Chaimantami:

—¿Pi shuctatac cuyana cani?— nirca.

30Chashna nicpimi Jesusca:

—Shuc runa Jerusalenmanta Jericó puebloman shamucucpimi, shuhuaccuna imalla charishcacunata quichushpa, macashpa huañunallata saqui rirca.

31Chashna huañunalla siricucpipish, shuc cura chai ñanta shamushpaca, caru caruta pasarcallami.

32Shuc Levita runapish chai ñanta shamushpa, chai siricuc runata ricushpaca pasarcallami.

33Ashtahuanpish Samaria llacta shuc runa chai ñanta shamushpa, chai siricuc runata ricushpaca, yallita llaquirircami.

34Chaimantami runapacman cuchuyashpa, chugrita aceitehuan, vinohuan jambishpa, pañohuan pilluchirca. Chashna ruhuashpaca, paipac burropi tiyachishpami, pozana huasiman apashpa cuidarca.

35Cayandi punzha rishpaca, ishcai denario cullquita chai huasiyucman cushpami: “Cai runata cuidangui. Cai cullqui faltacpica, ñuca cutimushpaca cutichishallami” nirca.

36Cambac yuyaipica, chai quimsa runamantaca, ¿maijantac chai shuhuaccuna macashca runataca quiquinta shina cuyashca?— nishpa tapurca.

37Chashna tapucpimi paica:

—Chai huañunalla runata llaquic runayari— nirca.

Shina nicpimi Jesusca:

—Canpish chashnallatac cuyashpa causagri— nirca.

Jesús ñañandi Martapac, Mariapac huasiman rishcamanta

38Jesús ricushpami, uchilla llactaman chayarca. Chaipimi Marta shuti huarmi paipac huasipi Jesusta chasquirca.

39Martaca María shuti ñañatami charirca. Mariaca Jesuspac ñaupapimi yachachishcata uyashpa tiyacurca.

40Martaca caita chaita ruhuana yuyaillami ucupica carca. Chaimantami Jesuspacman cuchuyashpaca:

—Apunchic Jesús, ñuca ñaña cai tucui ruhuanacunata ñucallaman saquishcataca, ¿manachu ricungui? Ñucata ayudachun cachaiyari— nirca.

41Ashtahuanpish Jesusca:

—Marta, Marta, canca ucupi imata ruhuanacunallapimi yuyacungui.

42Tucuimanta yallica, shucllatami ruhuana cangui. Mariaca allitami yuyarishca. Pai chashna uyasha nictaca, pi mana jarcangachu— nirca.