1Saúl huañushca quipa amalecitacunahuan macanacushpa cutishca quipaca Davidca ishcai punzhatami Siclag pueblopi carca.
2Ña quimsa punzha tucucpica, Saulpac carpa huasimantami shuc mosoca churanacuna lliquirishca, umapish allpalla chayamurca. Chashna shamushpami, cazushcata ricuchishpa Davidpac ñaupapi pambacaman cumurirca.
3Chaipimi Davidca:
—¿Maimantatac shamungui?— nishpa tapurca.
Shina tapucpi paica:
—Israelcunapac carpa huasimantami atimuni— nirca.
4Shina nicpimi Davidca:
—¿Imatac tucushcayari? ¡Chaitaca huillaiyari!— nirca.
Shina nicpimi runaca:
—Israelcunaca miticushpami rishca. Israelcunamantaca taucami huañushca. Saultapish, paipac churi Jonatantapish huañuchishcami— nirca.
5Shina nicpimi, Davidca mosotaca:
—¿Ima shinatac canca Saulpish, paipac churi Jonatanpish huañushcataca yachanguiyari?— nirca.
6Shina nicpimi, huillangapac shamuc mosoca:
—Ñucaca Gilboa urcupimi carcani. Chaipimi Saúl taunallishca huañunalla shayacucta ricushpa, paita piñac gentecunapish carretacunahuan, caballocunahuan huashata cuchuyacurcami.
7Chaipimi Saulca ñucata tigrarishpa ricushpa cayarca. Shina cayacpimi ñucaca: “¡Amito, caipimi cani!” nircani.
8Shina nicpimi paica: “¿Pitac cangui?” nishpa tapurca. Shina tapucpi ñucaca: “Amalecitami cani” nircani.
9Shina nicpimi paica: “Ñucaca ña huañunalla cashpapish causacuniracmi, cuchuyashpa ñucata huañuchi” nirca.
10Pai macanacuipi urmashpaca, ña mana causaipac cashcata yachashpami, paipacman cuchuyashpa huañuchircani. Quipaca, paipac umamanta coronatapish, paipac maquimanta argollatapish llucchishpami, can amitopacman apamuni— nirca.
11Chaimantami Davidca munai llaquirishpa, paipac churanata lliquicpi, paihuan cac gentecunapish chashnallatacmi ruhuarca.
12Saulmantapish, paipac churi Jonatanmantapish, Dios acllashca gentecunamantapish, Israel aillucunamantapish espadahuan huañuchishca cashcamantami tutayangacaman mana micushpa, yallita llaquirishpa huacarcacuna.
13Chai quipami, Davidca huillangapac shamuc mosotaca:
—¿Canca maimantatac cangui?— nishpa tapurca.
Shina nicpimi mosoca:
—Ñucaca caru llactamanta amalecita runapac churimi cani— nirca.
14Shina nicpimi Davidca:
—¿Canca ima nishpatac aceitehuan cahuishpa Mandac Dios acllashca runataca mana manchashpa maquihuan huañuchircangui?— nirca.
15Shina nishpami, Davidca paita servic shuc runata cayashpaca:
—¡Cai mosota huañuchigri!— nirca.
Shina nicpimi, amalecita mosotaca chugrichishpa huañuchirca.
16Chashna huañuchishca quipami Davidca:
—Cambac shimillahuantac: “Aceitehuan cahuishpa Mandac Dios acllashca runataca ñucami huañuchircani” nishpaca cambac shimillahuantacmi llaqui tucushcangui. Chaimanta canta huañuchishpa jichashca yahuarca cambac jahuallatami— nirca.
Davidca Saultapish, Jonatantapish yuyarishpa huacashcamanta17Davidca Saulpish, Saulpac churi Jonatanpish huañushcamantami huacashpa cai cantota allichirca.
18Judá aillucunapish chashnallatac huacashpa cantachunmi yachacuchun mandarca. Cai cantoca Jaser libropimi quillcashca tiyacun. Cai cantoca:
19«¡Aij, sumaimana Israel-lla,
cambac urcu jahuallapitacmi
huañushca!
¡Ima shinachari cai sinchi
runacunaca huañurca!
20Gat pueblopi causaccunamanpish,
Ascalón pueblo plazapipish,
ama parlanguichicchu.
Filisteocunapac,
circuncisionta mana ruhuashca
huarmicuna ama cushicuchun.
21Gilboa urcucunalla,
cancunapac jahuapica,
tamyapish, garuapish ama urmachun.
Diosman cuna ofrendapish ama pucuchun.
Chai urcupimi sinchi runacunapac,
escudoca sarushca carca.
Saulpac escudopish aceitehuan mana
cahuishca shinami tucurca.
22Jonatanpac arcoca
yahuarpi mana chapurishcaca
jaicapi mana shamucchu carca.
Saulpac espadapish,
paita piñaccunapac yahuarpi
mana chapurishcaca jaicapi mana
shamucchu carca.
23Saulpish, Jonatanpish
yallitami cuyanacuccuna carca.
Causaipipish, huañuipipish
manatac chicanyarircacunachu.
Paicunaca aguilatapish
yalli callpaccunami carca.
Leontapish yalli
sinchicunami carca.
24¡Israel huarmicunalla,
Saulmanta huacaichicyari!
¡Paimi sumac morado churanacunata,
curihuan sumacta allichishcata
cancunaman churachic carca!
25¡Cai sinchi runacunaca
llaquinayaitami
macanacuipica huañushca!
¡Jonatanpish,
paipac urcupimari huañushca!
26Ñuca huauqui Jonatanlla,
canmantaca yallitami llaquirini.
Ñucapacca yallitami
cuyashca carcangui.
Cambac cuyaica huarmicunapac
cuyaitapish yallimi carca.
27¡Sinchi runacunaca
ima shinachari huañurca!
¡Ima shinachari sinchi runacunapac
macanacunapish chingarirca!» nirca.
Who We AreWhat We EelieveWhat We Do
2025 by iamachristian.org,Inc All rights reserved.
