1Judá llactata jatun mandac Josafatca ima mana tucushpami Jerusalenpi cac paipac huasiman cutimurca.
2Pai chayacpica, Dios ricuchishcata huillac Hananipac churi Jehumi tupangapac llucshirca. Paica jatun mandac Josafattaca:
—Canca Diosta mana manchac runatami ayudangapac rishcangui. Mandac Diosta piñac runahuanmi apanacushcangui. Chaimantami Mandac Diosca canhuan piñarishca.
3Shina cacpipish, Asera huarmi diosta yuyarina yuracunata anchuchishpa cambac tucui shunguhuan Mandac Diosta mashcashcamantami can alli cashcata ricushca— nirca.
Josafat juezcunata churashcamanta4Josafatca Jerusalenpimi causarca. Shina cashpapish, Beerseba pueblomantaca Efraín urcucaman rishpami, tucui chaipi causaccunata, paipac ñaupa taitacunata Mandac Diospacman cutirichic ningapac rirca.
5Judá llactapi cac muyundi jatun pircashca pueblocunapica tucuipimi juezcunata churarca.
6Chai juezcunataca: «Cancuna imata ruhuacushcataca alli yuyarichic. Cancunaca, mana runapac randichu mandacunguichic, ashtahuanpish Mandac Diospac randimi mandacunguichic. Cancuna allita mandacucpica, Paica cancunahuanmi canga.
7Mandac Diosta manchashpa causanguichic. Imata ruhuangapacpish alli yuyarichic. Ñucanchicta Mandac Diosmanca ima mana allipish, shucllaman tucunapish, ima cushcacunata pacalla japinapish mana tiyanchu» nirca.
8Josafatca Mandac Dios mandashcata allita ricushpa mandachun, imapish llaquicunata allichinacuchunmi Jerusalenpica maijan levitacunatapish, curacunatapish, israelcunapac familiacunata pushaccunatapish churarca.
9Paicunataca: «Mandac Diosta manchashpa, mana llullashpa, alli shunguhuan cazushpami allita ruhuana canguichic.
10Caishuc pueblopi causac cancunapac huauquicuna huañuchishca jahua, mana cashpaca mandashca, imata ruhuachun yachachishcacunata, mandashpa quillcachishcacunata mana cazushca jahua huillangapac shamucpica, cancunamanpish, cancunapac huauquicunamanpish Diospac rabia ama urmachunmi, Mandac Diosta llaquichishpa ama juchallichicchu nishpa allita rimana canguichic. Cashna cancuna ruhuashpaca, mana juchanchishcachu canguichic.
11Riquichic, Mandac Diospacta tucui imata ruhuanataca Amarías curami mandanga. Jatun mandacman imata ruhuanataca Judapac huahua huahuapuramanta Ismaelpac churi Zebadiasmi ricunga. Levitacunapish cancunapac ñaupapimi Diosta servishpa ayudangacuna. Cancuna imata ruhuanataca sinchita ruhuaichic. Mandac Diosca allita ruhuaccunahuan cachun» nirca.
Who We AreWhat We EelieveWhat We Do
2025 by iamachristian.org,Inc All rights reserved.
