2 SAMUEL 21 - Biblia Quichua Cañar 2010

Gabaonitacunatapish llaquichishcamanta

1David mandacui punzhapimi quimsa huatata catipi yarcai tiyarca. Chashna cacpimi, Davidca Mandac Diosta tapurca. Chashna tapucpimi Mandac Diosca: «Saulpish, paipac huasi familiapish gabaonitacunata huañuchishpa yahuarta jichashcamantami yallita yarcaica tiyan» nirca.

2Chashna nicpimi, jatun mandacca gabaonitacunata cayashpa parlarca. Gabaonitacunaca mana israelpuramantachu carca. Paicunaca amorreopuramanta ashalla saquirishcacunami carca. Paicunatami israelcunaca: ‘Mana llaquichishunchu’ nishpa ari nishca carca. Shina cashpapish Saulca israelcunaman, Judá gentecunaman allita ruhuasha nishpami tucuchinata yuyarca.

3David gabaonitacunata tapushpaca:

—Mandac Dios cushca gentecunata cancuna bendiciachunca, cancunata llaquichishcamantaca ¿imatatac cancunamanca ruhuasha?— nirca.

4Shina nicpimi gabaonitacunaca:

—Ñucanchicca mana curimanta, mana cullquimantachu Saulhuanpish, paipac huasi ucupurahuanpish piñanacushca canchic. Shinallatac israelcunamantapish mana pi huañuchun munanchicchu— nirca.

Shina nicpimi paica:

—Cancuna ima mañashcatami ruhuasha nini— nirca.

5Shina nicpimi, paicunaca jatun mandactaca:

—Ñucanchictaca israelpurapi shucllatapish ama saquingapac nishpami mashcashpa llaquichirca.

6Cunanca, paipac huahua huahuacunamanta canchis runacunata Mandac Dios acllashca Saulpac Gabaón pueblopi sipingapac cui— nirca.

Shina nicpimi, jatun mandacca:

—Chai runacunata cushallami— nirca.

7Jatun mandac Saulpac churi Jonatanpac churi Mefi-bosettaca perdonarcami. Chaica mana llaquichinacungapacmi Jonatanhuan Davidhuan ari nishca carca.

8Shina cashpapish, Ajapac huarmi huahua Rizpa huarmipi Saúl charishca Armoni, shinallatac Mefi-bosettami curca. Shinallatac Saulpac ushi Merab huarmipi meholatitapuramanta Barzilaipac churi Adrielpac pichca churicunatapish curcami.

9Paicunatami gabaonitacunamanca curca. Paicunaca urcupimi Mandac Diospac ñaupapi sipirca. Chaipimi tucui canchis runacunaca huañurca.

Paicunataca cebada piti callari punzhacunapimi huañuchirca.

10Chaimantami Ajapac huarmi huahua Rizpaca cosecha callarinamanta tamya shamungacaman, shuc cilicio pañota rumi jahuapi tendirca. Chaipi tiyarishpami huañushcacunata punzhacunaca huairapi volashpa puric animalcuna, tutaca sacha animalcuna ama micuchun cuidacurca.

11Chashna Saulpac caishuc huarmi Rizpa imata ruhuashpa tiyacushcatami Davidman parlarca.

12Chaimantami Davidca Saulpac, paipac churi Jonatanpac tullucunata apangapac Galaad llacta Jabes puebloman rirca. Chai pueblopi causaccunami filisteocuna Saulta Gilboa urcupi atishpa huañuchishpa, Bet-seán pueblo plazapi huarcushcata shuhuashca carca.

13Chaimantami Saulpac tullucunata, paipac churi Jonatanpac tullucunata, shinallatac sipishpa huañuchishca tullucunata apachun cacharca.

14Saulpac tullucunata, paipac churi Jonatanpac tullucunataca Benjamín llacta Zela pueblopimi enterrarca. Chaipimi Saulpac taita Cispish enterrashca carca. Chashnami jatun mandac tucui nishcata ruhuashpa enterrarca. Chai quipami Diosca chai llactapi causaccuna mañashcata ruhuarca.

Abisai Davidta ayudashpa quishpichishcamanta

15Cutinllatacmi filisteocunaca israelcunahuan macanacui callarirca. Chaimantami Davidca paita serviccunahuan urai rishpa, filisteocunahuan macanacurca. Davidca shaicushcami carca.

16Manchana jatun runacunapuramanta Isbi-benobmi Davidta huañuchingapac shamurca. Chai runapac lanzaca quimsa kilo chaupi llashac bronce lanzami carca. Shinallatac chumbillishcapica mushuc espadata satishcami carca.

17Ashtahuanpish Sarviapac churi Abisaimi Davidta misashpa, chai runata chugrichishpa huañuchirca. Chaimantami Davidpac runacunaca paitaca: «Cunanmanta pacha ñucanchic-huan macanacungapacca ña mana llucshinguichu. Canta huañuchishpaca, israelcunapac mecha shinami huañushca canga» nirca.

Davidpac runacuna filisteocunata huañuchishcamanta(1 Cr 20.4-8)

18Chai quipaca cutinllatacmi Gob pueblopi filisteocunahuan macanacui callarirca. Chaipimi Husa pueblomanta Sibecaica manchana jatun runapuramanta Safta huañuchirca.

19Cutinllatacmi Gob pueblopi filisteocunahuan shuctac macanacui callarirca. Chaipimi Belén pueblomanta Jaare-oreguimpac churi Elhananca geteocunapuramanta Goliatta huañuchirca. Paipac lanzaca telar pilluna caspi shina racumi carca.

20Chai quipaca cutinllatacmi Gat pueblopi macanacui callarirca. Chaipimi cada maquipi sucta dedota, cada chaquipi sucta dedota charic manchana jatun runa tiyarca. Tucuica ishcai chunga chuscu dedotami charirca. Chai runapish manchana runacunapuramantami carca.

21Paimi israelcunahuan cariyarca. Shina cacpipish, Davidpac huauqui Simeapac churi Jonatanmi huañuchirca.

22Chai chuscu runacunaca Gat pueblopi huacharishca manchana runacunapac huahua huahuami carca. Paicunaca Davidpac maquipi, shinallatac Davidta serviccunapac maquipimi huañurca.