1Mandac Dioslla,
millai gentecunamanta
quishpichiyari.
Llaquichic gentecunamanta huacaichiyari.
2Paicunapac shungupica
llaquichina yuyaillami purincuna.
Shinallatac punzhantami
piñanacuipi churancuna.
3Paicunapac calluca
culebrapac callu shina puntasapami.
Paicunapac shimicunapish
culebrapac veneno shinami.
4Mandac Dioslla, canta mana manchacpac
maquimanta quishpichiyari.
Ñuca causaita pandachisha nic
llaquichic gentecunamanta cuidaiyari.
5Chai jatun tucushca gentecunaca
ñucata urmachingapacmi linchitapish,
chacnarina huascacunatapish churashca.
Ñuca ñan cuchupimi chacnarishpa
urmanata churashca.
6Ñucaca Mandac Diostaca:
«¡Canca ñuca Diosmi cangui!» nircanimi.
Mandac Dioslla,
ñuca yallita mañacuctaca uyaiyari.
7Ñucata quishpichic Mandac Dioslla,
canmi jatun macanacui punzhapica
ñuca ama huañuchun cuidarcangui.
8Mandac Dioslla, canta mana manchaccuna
paicuna munashcata pactachichunpish,
paicuna yuyashcata ruhuashpa,
jatun tucuchunpish ama saquichu.
9Ñucata llaquichingapac catic gentecuna
yuyashca llaquicunaca
paicunallatatac japichun.
10Paicunapac jahuapica rupacuc nina urmachun.
Maita mana llucshipac
nina jatun jutcupi shitashca cachun.
11Imatapish rimaric runaca
cai pachapica mana unaita causangachu.
Llaquichic runataca millaillatacmi
tangac shina apashpa tucuchinga.
12Mandac Dios huacchacunata
cuidac cashcatapish,
cashcata ruhuac cashcatapish yachanimi.
13Cashcata ruhuaccunami
cantaca pagui ningacuna.
Allita ruhuaccunallami
cambac ñaupapica causangacuna.
Who We AreWhat We EelieveWhat We Do
2025 by iamachristian.org,Inc All rights reserved.
