JEREMÍAS 40 - Biblia Quichua Cañar 2010

Jeremias-huan, Gedalias-huan saquirishcamanta

1Jerusalenmantapish, Judá llactamantapish Babilonia llactaman gentecunata prezu apashpami, Jeremiastapish cadenahuan huatarca. Chaipi cacpimi, soldadocunata mandac Nabuzaradanca Jeremiastaca Ramaman cacharca. Chai quipa Mandac Dios Jeremiasta rimarca.

2Soldadocunata mandac Nabuzaradán Jeremiasta cayashpaca: «Canta Mandac Diosmi cai llactata llaquichinata huillarca.

3Mandac Diosca pai nishca shinami, llaquichishpa, pai nishcata pactachishca. Cancunallatac juchata ruhuashpa, Mandac Diosta mana cazushcamanta, pai rimashcata mana uyashcamantami cai llaquicunahuan llaquichishca.

4Cunanmi cadenahuan huatashcataca maquimanta cacharichini. Ñucahuan Babilonia llactaman risha nishpaca jaculla. Cantaca ñucami cuidasha. Cutin Babilonia llactaman mana rishpa, caipi saquirisha nishpaca saquilla. Riqui, cai tucui llactacunami cambac ñaupapi, maimanmi risha ningui, chaiman rilla.

5Jeremías imatapish manarac yuyaricpimi Nabuzaradanca: Ahicampac churi, Safanpac nieto Gedaliaspacman cuti. Paitaca Babilonia llactata jatun mandacmi tucui Judá llactata mandachun churarca. Judá llactapi cambac llactapuracunapac chaupipi causagri. Mana cashpaca, maipi ashtahuan alli causanata ricushpa, chaipi causai» nirca. Shinami soldadocunata mandacca micunatapish, shuctac regalotapish Jeremiasman cushpa, caya minchacaman nishpa cacharca.

6Jeremiasca Ahicampac churi Gedaliaspacmanmi Mizpa llactaman cutirca. Chaipimi Judá llactapi saquirishcacunapac chaupipi causarca.

7Babilonia llactata jatun mandac Ahicampac churi Gedaliasta Judá llactatapish, Babilonia llactaman mana apashca caricunatapish, huarmicunatapish, huahuacunatapish, huacchacunatapish mandachun churashcatami urcucunapi miticushpa saquirishca mandac soldadocuna, caishuc soldadocunaca yachac chayarca.

8Chai quipami paicunaca Gedaliaspacman Mizpa llactaman shamurca. Paicunaca Netaniaspac churi Ismael, Careapac churi Johanán, Jonatán, Tanhumetpac churi Seraías, Netofatitapuramanta Efaipac churicuna, Maaca llactapi causac runapac churi Jezaniasmi carca. Tucui paicunapac soldadocunandimi shamurca.

9Chashna shamucpi, Ahicampac churi, Safanpac nieto Gedalías paicunahuan, paicunapac soldadocunahuan ari nishpaca: «Caldeocunata servinataca ama manchaichicchu. Babilonia llactapi jatun mandacta servishpa causaichiclla. Chashna servishpaca allimi causanguichic.

10Caldeocuna cancunapacman shamucpica, ñucami cancunapac randi cai Mizpa llactapi rimasha. Ashtahuanpish cancunaca, cancuna japishca llactacunallapitac shuyaichiclla. Vinotapish, aceitetapish, pucushca granotapish usyai punzhacunapi tandachishpa, huasipi huacaichichiclla» nirca.

11Judá llactamanta rishpa Moab, Amón, Edom llactacunapi causaccunatapish, tucui caishuc llactapi causaccunatapish Babilonia llactata jatun mandac Judá llactapi maijan saquishcacunata Ahicampac churi, Safanpac nieto Gedaliasta mandachun churashcatami yachac chayarca.

12Chaimantami Judá llactamanta llucchishpa cachashca gentecunaca chai pushtullamantac cutirca. Paicunaca Gedaliaspacmanmi Mizpa llactaman shamurca. Chaipimi usyai punzhacuna tiyac vinotapish, ima shuctac granotapish achcata tandachirca.

Ismael Gedaliasta pacalla huañuchinata yuyarishcamanta

13Chaimantami Careapac churi Johananpish, miticushpa saquirishca mandac soldadocunapish Gedaliaspacman Mizpa llactaman shamurca.

14Chashna shamushpami paicunaca: «¿Manachu amonitacunata jatun mandac Baalis Netaniaspac churi Ismaelta canta huañuchichun cachashcata yachangui?» nirca. Shina nicpipish, Ahicampac churi Gedaliasca mana crircachu.

15Chaimanta Careapac churi Johananca Mizpa llactapi Gedaliasta cayashpaca: «Netaniaspac churi Ismaelta cunanllata huañuchigrichun saqui. Chaitaca pipish mana yachangachu. ¿Ima nishpatac cantaca huañuchingayari? ¿Ima nishpatac canhuan tandanacushpa Judá llactapi causaccuna caita, chaita richun saquishunyari? ¿Ima nishpatac maijanpish saquirishca Judá llactapi causaccunaca tucuringayari?» nirca.

16Shina nicpimi, Ahicampac churi Gedaliasca Careapac churi Johanantaca: «Ama chaita ruhuagrichu. Ismaelmanta nicushcaca yangallami» nirca.