APOCALIPSIS 16 - Biblia Quichua Cañar 2010

Llaquichic canchis copacunamanta

1Chai quipaca Diosta mañana huasi ucumantami canchis angelman sinchita rimashpaca: «¡Richic, Dios piñarishpa cachashca canchis copacunapi tiyac llaquichinata allpapi talligrichic!» nishcata uyarcani.

2Shina nicpimi shucniqui ángel rishpaca, pai charicushca copata allpapi tallirca. Chashna tallicpica, manchana animalpac sellota chariccunata, shinallatac paiman ricchata alli niccunataca millai sisu ungüimi japirca.

3Ishcainiqui ángel rishpaca, pai charicushca copataca mama cucha yacupimi tallirca. Chaipi tallicpica, yahuar llucshic shina, chai yacu yahuar tucucpimi, tucui chai yacupi causac animalcuna huañurca.

4Quimsaniqui ángel rishpaca, tucyac yacupi shinallatac callpac yacupimi pai charicushca copata tallirca. Shina tallicpica, chai yacuca yahuarmi tucurca.

5Chai quipaca yacucunata mandac ángel rimashpaca:

«¡Jucha illac Dioslla!

Canllatacmi cangui,

canllatacmi carcangui.

Chashna llaquita cachashpaca,

allitami ruhuashcangui.

6Paicunami cambaclla caccunatapish,

canmanta huillaccunatapish

yahuarta jichashpa huañuchircacuna.

Paicunaca chashna

chasquina cashcamantami,

canpish chashnallatac paicunamanca

yahuarta ubiachishcangui»

nishcatami uyarcani.

7Shinallatac altar ucumanta shuc rimashpaca: «¡Tucui imatapish ruhuac Mandac Dioslla! Canca imatapish llaquichina cashcatatac ricushpami taripangui» nishcatami uyarcani.

8Chuscuniqui angelca intipimi pai charicushca copata tallirca. Chashnaca, inti ashtahuan rupacyashpa gentecunata rupachic cachunmi tallirca.

9Chaipica, tucui gentecunami ruparca. Shina cacpipish, Diosman cutirishpa, paita alli ninataca mana munarcacunachu, ashtahuanpish chai llaquicunatapish anchuchiclla Diostaca camishpami rimarcacuna.

10Pichcaniqui angelca manchana animal mandashpa tiyarinapimi pai charicushca copata tallirca. Shina tallicpica, pai mandana amsa pura tucucpimi gentecunaca nanaihuan calluta canirirca.

11Ashtahuanpish millaita ruhuanataca manatac saquircacunachu. Sisu ungüihuanpish, nanaihuanpish cashpami, jahua pacha Diostaca piñashpa rimarcacuna.

12Suctaniqui angelca Eufrates jatun yacupimi pai charicushca copata tallirca. Chashna tallicpica, inti llucshic ladomanta jatun mandaccuna shamushpa pasachunmi, chai yacuca chaquirca.

13Shina tucucpica Dragonpac shimimantapish, manchana animalpac shimimantapish, llullac huillacpac shimimantapish sapoman riccha quimsa mana alli espiritucuna llucshicuctami ricurcani.

14Chaicunaca pi mana ruhuaipacta ruhuashpa ricuchic, supaipac millai espiritumi carca. Chaicunaca tucui cai pachapi tiyac jatun mandaccunapacman rishpami, tucui poderta charic Diospac jatun macanacuna punzhapi macanacungapac tandachigrirca.

15«Uyaichic, ñucaca cancuna mana yuyashca horaspimi shuhua shamuc shina shamusha. Maijanpish riccharishca, churanata churarishca chapacucmanca, ¡mai cushicuimi canga! Chashna churarishca mana lluchulla cashpami, mana pinganachinga»

16Chai millai espiritucunaca hebreo rimaipi Armagedón nishca pambapimi tucui mandaccunata tandachirca.

17Canchisniqui angelca huairapimi pai charicushca copata tallirca. Chashna tallicpica, jahua pachapi cac Diosta mañana huasipi mandashpa tiyarinamantami sinchita rimashpaca: «Ñami tucui tucuchishca» nishca uyarirca.

18Chashna nicpica urcu tulun nishcapish, rimashcacunapish uyarircami. Relampa achic nishcapish ricurircami. Shinallatac gentecuna cai pachapi tiyashca punzhamanta pacha jaicapi mana chucchushcatami, allpaca chucchurca.

19Chashna tucucpica, jatun Babilonia puebloca quimsapimi chaupirirca. Cai pachapi tiyac tucui pueblocunapish tuñirircami. Chai jatun Babilonia pueblotaca jayac vinota ubiachic shina piñaihuan llaquichingapacmi, Diosca yuyarirca.

20Yacu chaupipi tiyac tucui llactacunapish, shinallatac urcucunapish tucuimi chingarirca.

21Jahua pachamantaca shuc quintal shina llashac runducunami tucui gentecunapac jahuapi urmarca. Shina urmashpa yallimana llaquichicpimi, gentecunaca Diosta piñashpa rimarcacuna.