1Chaimantami Mandac Diosca: «Moises-huan, Samuelhuan ñuca ñaupapi shayaricpipish, cai llactataca mana llaquishachu. Ñucapac ñaupamanta anchuchishpa, llucchishpa cachai.
2Paicuna: “¿Maimantac rishunyari?” nicpica, Mandac Diosca:
“Huañungapac caccunaca huañuchun.
Jatun macanacuipi huañungapac caccunaca
jatun macanacuipi huañuchun.
Yarcaihuan huañungapac caccunaca
yarcaihuan huañuchun.
Prezurina caccunaca
prezurichun” ninmi ningui.
3Mandac Dios ñucaca: “Paicunata llaquichingapacca chuscu jatun llaquicunatami churasha. Espadataca huañuchichun, allcucunataca caiman chaiman aisarichun, volac animalcunataca micuchun, sacha animalcunataca polvochunmi churasha.
4Paicunataca Ezequiaspac churi, Judá llactata jatun mandac Manasés Jerusalenpi mana allita ruhuashcamantami yallita llaquichisha. Chaita, shuctac llactacunata mandaccuna ricushpaca mancharingami” nini.
5Jerusalenlla,
¿pitac cantaca llaquingayari?
Can llaquita apacucpica,
¿pitac huacangayari?
¿Pitac “allilla causangui” ningayari?
6Canca ñucata saquishpami,
huashaiman cutircangui.
Ñucaca llaquicushpami shaicurcani.
Chaimantami llaquichisha
Chaitaca Mandac Diosmi nin.
7Ñuca acllashcacunaca
huairachinahuan huairachic shina,
llactamanta llucshishpa cachacpipish,
huahuacuna illacta saquicpipish
millaita ruhuanata mana saquircachu.
8Viuda huarmicunaca
mama cuchapi tiyac tiyutapish
yalli achcami saquirirca.
Quipa huiñaicunapac mamacunata
huañuchichunca punzha pachami
huañuchiccunata cacharcani.
Chai llactapica mana yuyashca
horasmi yalli manchaita churasha.
9Canchis huahuayuc huarmica
shungupi yallita llaquirishpami,
huañunalla shina tucunga.
Intica punzhapiracmi tutayanga.
Pingaihuanmi cumuringa.
Maijan saquirishcacunataca
piñaccunapac ñaupapimi espadahuan
huañuchichun churasha» ninmi.
Jeremías llaquirishcamanta10Jeremiasca Ñucaca:
«¡Aij, ñuca mamitalla!
¡Tucui llactapi causaccunahuan
piñanacushpa, rimanacuchunmi
ñucataca sajuarishcangui!
Piman cullquita mana mañarcanichu,
shinallatac mana mañachircanichu.
Shina cacpipish, ñucataca
mana alli nishpami rimacun.
11Mandac Dioslla,
ñuca mana allita servishca cacpi,
ñucata piñaccuna llaquihuan cacpi,
paicunamanta mana mañashca cacpica,
paicuna mana alli nishcaca pactachunlla.
Israelcunata llaquichinamanta12Jahua lado llactapi
tiyac fierrotapish,
broncetapish,
¿pitac paqui pudingayari?
13Cancunapac juchacunamantami
cancunapac llactapi
ima tiyashcacunatapish,
sumac charinacunatapish
shuhuaccunaman yanga cushpa cusha.
14Ñucaca nina japiric shina,
yallita piñarishcami cani.
Chaimantami mana ricsishca
llactapi cancunata piñaccunata
servichun churasha.
Jeremías mañashcamanta15Mandac Dioslla,
canca tucuitami yachangui.
Ñucata yuyarishpa,
ayudangapac shamuiyari.
Ñucata piñaccunata ñucata
llaquichishca shinallatac
llaquichiyari.
Ama ashtahuan piñacuillachu.
Ñucaca canmantami
yalli llaquita apacuni.
16Tucuita Mandac Dioslla,
can rimashcata uyashpaca
tucui micuc shinami chasquircani.
Can rimashcaca ñuca shunguta
yallita cushichicmi carca.
Ñucaca cambac shutipi
cayashcami cani.
17Millaita ruhuashpa cushicuc
runacunahuanpish mana
tandarircanichu.
Can ñucata cambacllata
ruhuashcamanta pachami,
ñucalla causai callarircani.
Chai millaita ruhuaccunataca
mana ricunayanchu.
18¿Ima nishpatac ñuca nanaica
punzhanta tiyacunlla?
¿Ima nishpatac ñuca chugrica
maita mana jambipac?
¿Canca chaquiclla yacu shinachu,
ñucahuanca cagringui?» nircani.
19Shina nicpimi, Mandac Diosca:
«Can ñucapacman cutiricpica,
cutinmi cantaca alliyachisha.
Shina ruhuacpica, ñuca ñaupapimi
ñucata servishpa causangui.
Imapacpish mana vali parlocunata
saquishpa, alli rimaicunallata
parlashpaca, ñuca rimashcatami
cutin huillangui.
Canca ama paicunapacman cutirichu.
Ashtahuanpish paicunami
cambacman cutiringa.
20Cantaca gentecunapac ñaupapi jatun
bronce pirca shina cachunmi churasha.
Canhuan macanacungapac
shamushpapish mana mishai pudingachu.
Mandac Dios ñucami,
canta cuidashpa quishpichingapac
canhuan casha.
21Mana allita ruhuac millai
runacunapac maquimantapish
quishpichishpami cuidasha» nirca.
Who We AreWhat We EelieveWhat We Do
2025 by iamachristian.org,Inc All rights reserved.
