SALMOS 55 - Biblia Quichua Cañar 2010

Apanacuc cashca jahua llaquichic runata tucuchichun DiostamañashcamantaCantaccunata pushac cuerdayuc tocanacunahuan cantachichun yachachingapac David ruhuashca Salmomi

1Ñuca Dioslla,

ñuca mañashcata uyaiyari.

Ñuca mañacucpica, ama anchurichu.

2Llaquihuan cashpa mañashcata

uyashpa chashquiyari.

Yallita llaquihuan cashpami

yuyai illac shina cani.

3Ñucata piñaccuna camishcamanta,

millai gentecuna llaquichishcamanta,

yanga juchanchishcamanta,

huañuchisha nishcamantami

cashna llaquihuan cani.

4Ñuca shunguca nanaihuanmi

tucuricun.

Huañuna manchaimi ñucataca

ñitic shina charicun.

5Yallita manchai pillushpa

charicuc shina cacpimi chucchucuni.

6Chaimantami ñucaca:

«¡Paloma shina alasyuc cashpaca,

volashpa maipi samanata

mashcagrimanchari!

7Mai caruta rishpami

shitashca pambapi pacarigriman.

8Acapana huaira shina,

mancharina tamya shina,

caticuc gentecunamantaca

callparishpachari

miticugriman» yuyani.

9Mandac Dioslla,

paicunataca tucuchiyari.

Paicunapac rimaitaca pandachiyari.

Pueblopica llaquichinacucta,

camishpa rimanacuctapimi ricuni.

10Tutai punzhami jatun pirca

jahuata ricushpa muyuncuna.

Pueblo ucupica millaita ruhuaccuna,

llaquichiccunami jundashca.

11Paicunapac chaupipica

millaita ruhuanallami tiyan.

Plaza pambacunapica llullashpa

umanaca mana illanchu.

12Ñucata piñac runa

ñucata llaquichishca cacpica,

llaquita apaimanllami carcani.

Ñucata mana ricunayachic

llaquichingapac

jatarishca cacpica,

miticuimanllami carcani.

13Ashtahuanpish can,

ñuca shinallatac cac,

ñucahuan puricllatac,

ñucahuan alli apanacucllatac

llaquichingapac jatarishcangui.

14Canhuanmi pi mana yachashcatapish,

sumacta parlanacuc carcanchic.

Diospac huasipipish

ishcai tucushpami

sumacta cushilla puric carcanchic.

15Cungailla huañui japichun,

Seolman causac chayagrishca

cachun.

Paicunapac huasipipish, paicunapac

chaupipish millaillatami ruhuancuna.

16Ashtahuanpish ñucaca,

Diostami caparishpa mañasha,

Paica ñucata quishpichingami.

17Tutamantapish, chaupi punzhapish,

chishipish Diosta

caparishpa mañashami.

Paica ñuca mañashcata uyangami.

18Ñucata piñaccuna tauca

tucushpa huaicashpa

huañuchingapac shamucpipish,

paimi ñuca causaita quishpichinga.

19Huiñaita causac Diosmi

ñuca mañashcata uyashpa,

paicunataca llaquichinga.

Paicuna tucui tucushpa

Diostapish mana manchashcamantami

chashnaca llaquichinga.

20Millai runaca paihuan

apanacucllatatac llaquichishpami,

sumacta causangapac

ari nishcatapish paquin.

21Paipac rimashca shimicuna

mantequilla shina ñutunlla

cashpapish, paipac shungupica

macanacuna yuyaillami can.

Aceitetapish yalli ñutunlla

rimaicunata parlashpapish

espadata bainamanta

llucchishpa charicuc shinami can.

22Cambac llaquitaca Diosman mingai.

Paica ayudangami.

Cashcata ruhuactaca

jaicapi mana urmachun saquingachu.

23Ñuca Dioslla, huañuchiccuna,

llullaccunaca mana unaita

causangachu.

Paicunataca chingarina

jatun jutcumanmi shitangui.

Ashtahuanpish ñucaca

canllapimi shunguta churani.