2 REYES 4 - Biblia Quichua Cañar 2010

Eliseomantapish, viuda huarmipac aceitemantapish

1Dios ima nishcata huillacpuramanta shuc runapac churipac huarmimi Eliseotaca:

—Canta servic ñuca cusaca huañushcami. Canta servic ñuca cusa Mandac Diosta servic cashcataca canllatac yachanguimi. Shina cacpipish, ñucanchicman cullquita mañachic runami, ñuca ishcai huahuacunata paita servic cachun apangapac shamushca— nirca.

2Shina nicpimi Eliseoca:

—¿Canmantaca imatatac ruhuachun ningui? ¿Cambac huasipi imatatac charingui?— nirca.

Shina nicpimi, chai huarmica:

—Canta servic ñucaca imatapish huasipica mana charinichu. Shuc puñu aceitellatami charini— nirca.

3Shina nicpimi Eliseoca:

—Cambac vecinocunapacman rishpa, chushac puñucunata mañai. Chaicunataca mashnatapish mañanguilla.

4Chai quipaca huasiman huahuacunahuan rishpa, punguta huichcarishpa, tucui chai puñucunapi aceiteta jundachi. Ña jundachishca puñutaca shucman chicanyachishpa churai— nirca.

5Chai huarmi Eliseopac ñaupamanta rishpaca, paipac huahuacunandimi ucupi huichcarirca. Huahuacunaca puñucunata paiman tupachicpica, paica aceiteta jundachishpami catirca.

6Ña tucuipi jundashca quipami paipac shuc huahuataca:

—Ashtahuan puñuta apamui— nirca.

Shina nicpimi huahuaca:

—Puñucunaca ña mana ashtahuan tiyanchu— nirca.

Aceitepish ña mana tiyarcachu.

7Chai quipami chai huarmica Diospac runapacman rishpa huillarca. Chashna huillacpi, Eliseoca:

—Chai aceiteta catushpa debita pagangapac rilla. Chai puchushca cullquihuanca canpish, cambac huahuacunapish micushpa causaichiclla— nirca.

Sunamita huarmi huahuata charishcamanta

8Shuc punzhami Eliseoca Sunem pueblota pasacurca. Chai pueblopimi shuc chayuc sunamita huarmi causarca. Chai huarmimi Eliseotaca paipac huasipi micugrichun nishpa jaculla nirca. Eliseo chai pueblota pasacushpaca, chai huarmipac huasipimi micuc carca.

9Chaimantami chai huarmica paipac cusataca:

—Riqui, cai ñucanchic huasita pasac runaca Diospaclla chicanyachishca runa cashcatami yachani.

10Cunanca, pai ima horas ñucanchicpacman shamushpa samarichun, huasi altopi shuc uchilla ucuta ruhuashpa, shuc camata, shuc mizata, shuc bancota, shuc lamparata churashun— nirca.

11Shuc punzhami Eliseoca chai huasiman chayashpa, chai ucuman huichai rishpa chaipi sueñurca.

12Chaipi cashpami, paita servic Giezi runataca:

—Caipi causac sunamita huarmita cayai— nirca.

Chai servic runa cayacpimi, paipac ñaupaman shamurca.

13Eliseoca paita servic Giezitaca:

—Chai huarmitaca: “Ñucanchic-huanca yallitami alli cashcangui. Chaimanta, ¿ima allitatac canman ruhuashun? ¿Jatun mandac-huan mana cashpaca, soldadocunata mandac-huan canmanta parlachun ninguichu?” nishpa tapui— nirca.

Shina tapucpi, chai huarmica:

—Cai ñuca gentecunapac chaupipica allimi causani— nirca.

14Shina nicpimi, Eliseoca paita servictaca:

—Shinashpaca, cai huarmimanca ¿Imatatac ruhuashun?— nirca.

Shina nicpimi, paita servic Giezica:

—Riqui, paica huahuacunata mana charinchu. Paipac cusapish yuyacmi— nirca.

15Shina nicpimi Eliseoca:

—Chai huarmita cayai— nirca.

Shina chai huarmita cayacpi, shamushpa pungu yaicunapi shayaricpimi,

16Eliseoca:

—Cai shamuc huata, cunan shina punzhapica shuc huahuatami marcashca cangui— nirca.

Shina nicpi, chai huarmica:

—¡Ñuca mandaclla, Diospac runalla! ¡Canta servic ñucataca ama yanga crichichu!— nirca.

17Shina cashpapish, caishuc huatapica Eliseo nishca punzhallapitacmi huicsayuc tucushpa, shuc cari huahuata charirca.

18Chai huahua jatunyashpaca, paipac taita, caishuc cosechaccunahuan cosechacucpimi taitata ricungapac rirca.

19Chaipi cashpami, chai huahuaca paipac taitataca:

—¡Aij, ñuca umata nananmi, ñuca umata nananmi!— nirca.

Shina nicpi, taitaca paita servictaca:

—Paipac mamapacman apai— nirca.

20Chashna nicpimi, paipac mamapacman aparca. Chaupi punzhacaman mamapac changapi tiyacushpallatacmi huañurca.

21Chaimantami chai huarmica altoman huichicushpa, Diospac runapac camapi huambrata sirichishpa, punguta huichcashpa llucshirca.

22Chai quipaca paipac cusata cayashpaca:

—Diospac runapacman rishpa utca cutimungapac, maijan shuc servicta shuc burrohuan cachai— nirca.

23Shina nicpimi, paipac cusaca:

—Cunanca, mana llullu quillapish, mana samana punzhapish canchu. ¿Imapactac paita ricungapac rigringui?— nirca.

Shina nicpi, chai huarmica:

—Chaimanta ama mancharichu— nirca.

24Chai quipaca burrota parejachishpami chai servictaca:

—Cunanca burrota aisashpa utca pushailla. Ama ñanpi shayaringuichu, ñuca shayari nicllapi, shayaringui— nirca.

25Chashna utca rishpami, Carmelo urcupi Diospac runapacman chayarca. Diospac runaca chai huarmita carupi ricushpami, paita servic Giezitaca:

—Riqui, chaitaca sunamita huarmimi shamucun.

26Cunanca, paita tupangapac callpai. Paita tupashpaca: “¿Allillachu cangui? ¿Cambac cusapish allillachu? ¿Cambac huahuapish allillachu?” ningui— nirca.

Shina nicpi, chai huarmica:

—Allillami canchic— nirca.

27Chai urcupi Diospac runapacman chayashpami, paipac chaquita ucllarirca. Chashna ucllaricpimi, Giezica anchuchingapac japirirca. Chashna japiricpimi, Diospac runaca:

—Saquilla, paipac shungupica jatun llaquihuanmi. Diosmi paipac llaquitaca pacashpa, mana huillashca— nirca.

28Shina nicpi, chai huarmica:

—Amito, ñucaca mana huahuata mañarcanichu. Huahuata charigringuimi nicpica, ¿manachu ñucaca ama yanga crichishpa cushichichun?— nircani.

29Shina nicpi, Eliseoca paita servic Giezitaca:

—Chumbillishpa ñuca taunata apashpa ri. Maijan tupacpipish, ama allillachu cangui ninguichu. Canta allillachu cangui nicpipish, upalla ringuilla. Ña huasiman chayashpaca, huahuapac ñahui jahuapi ñuca taunata churangui— nirca.

30Shina nicpimi, chai huahuapac mamaca:

—¡Mandac Diospac shutipi, cambac shutipimi nini: Cantaca manatac saquishpa rishachu!— nirca.

31Shina nicpimi, Eliseoca jatarishpa, chai huarmihuan rirca. Giezica paicunata ñaupashpa rishpami, chai huambrapac ñahui jahuapi taunata churarca. Chashna churacpipish, mana cuyurircachu, mana rimarircachu. Chaimantami Eliseohuan tupangapac cutirca. Chashna cutishpaca:

—Huahuaca mana riccharinchu— nirca.

32Chai huasiman Eliseo chayacpica, paipac camapimi chai huahuaca huañushca siricurca.

33Chaimantami Eliseoca ishcaitatac canzhapi saquishpa, punguta huichcarishpa, Mandac Diosta mañarca.

34Chai quipaca camaman huichicushpami, Eliseoca paipac shimitaca huahuapac shimipi, paipac ñahuitaca huahuapac ñahui jahuapi, paipac maquitapish huahuapac maqui jahuapi churashpa huahuapac jahuapi siririrca. Chashna siriricpimi, huahuapac cuerpoca cunurirca.

35Chaimanta jatarishpami, Eliseoca ucupi caiman chaiman puricurca. Chai quipa camaman huichicushpami, cutinllatac huahuapac jahuapi chashnallatac siririrca. Chashna canchis cutincaman tuparicpimi huahuaca ñahuita pascarca.

36Chaimanta Eliseoca Giezitata cayashpaca: «Sunamita huarmita cayai» nirca.

Chashna cayacpi, chai huarmi ucuman chayacpimi Eliseoca:

«Caica cambac huahua» nirca.

37Shina nicpi, chai huarmi ucuman yaicushpaca, Eliseopac chaqui ladopi allpacaman cumurirca. Chai quipami paipac huahuata japishpa, chai ucumanta llucshirca.

Eliseo jayac micunata allichishcamanta

38Eliseoca achca yarcai punzhacunami Gilgal puebloman cutimurca. Dios ima nishcata huillaccunapac churicunapish chaipimi paihuan carca. Chaimantami Eliseoca paita servic runataca: «Dios ima nishcata huillaccunaman carangapac jatun mangapi yanui» nirca.

39Paicunapuramanta shuc micunata tandangapac pambaman llucshishpami, sacha zambuta tarirca. Chaitami paipac jahualla churanapi jundachishpa pallamurca. Chaitaca ima cashcata mana yachashpami, jatun mangapi picashpa churarca.

40Ña micunalla cacpimi, chai runacunaman cararca. Paicuna chai micunata micucushpaca:

—¡Diosmanta huillaclla, cai micunapica venenotami churashca!— nishpa caparircacuna.

Shina nishpaca ña mana micurcacunachu.

41Shina caparicpimi, Eliseoca:

«Harinata apamuichic» nirca.

Chai harinata mangapi churashpaca:

«Gentecuna micuchun carailla» nirca.

Gentecunaca micurcami, ima mapapish ña mana tiyarcachu.

42Chai quipami Baal-salisa pueblomanta shuc runa Diospac runaman cungapac punta pucushca granota apamurca. Paica ishcai chunga cebada tandata, mushuc trigo espigacunatapish apamurca. Chaita japishpami, Eliseoca paita serviccunataca:

—Gentecuna micuchun carai— nirca.

43Shina nicpi, chai servic runaca:

—¿Maitatac caillataca patsac runacunamanca carashayari?— nirca.

Shina nicpimi Eliseoca:

—Gentecuna micuchun carailla. Mandac Diosca: “Paicuna micucpipish puchungaracmi” ninmi— nirca.

44Shina nicpimi, paita servicca gentecunaman cararca. Chashna paicuna micucpipish, Mandac Dios nishca shinallatacmi puchurca.