1 SAMUEL 4 - Biblia Quichua Cañar 2010

Filisteocuna Arcata quichushcamanta

1Samuelca tucui israelcunamanmi huillarca.

Chai punzhacunallatacmi, israelcunaca filisteocunahuan macanacungapac llucshishpa, Eben-ezer ladopi carpa huasicunata shayachishpa tiyarirca. Cutin filisteocunapish, Afec pueblopimi carpa huasicunata shayachishpa tiyarirca.

2Filisteocunaca israelcunahuan macanacungapacmi allichirirca. Chai yalli sinchi macanacuipi filisteocuna israelcunata atishpami, chai pambapica chuscu huaranga israelcunata huañuchirca.

3Carpa huasicunaman israelcuna cutimucpimi, israelcunata pushac yuyaccunaca:

—¿Cunanca, ima nishpatac Mandac Diosca filisteocuna mishachun saquinyari? Cunanca Dios ari nishca quillcata huacaichina Arcata Silo pueblomanta apamugrishunchic. Shina apamucpimi, paica ñucanchic chaupipi causashpa ñucanchicta piñaccunapac maquimanta quishpichinga— nirca.

4Shina nicpimi, israelcunaca maijan gentecunata Silo pueblomanta querubincunapac chaupipi tiyac tucuita Mandac Dios ari nishca quillcata huacaichina Arcata apamuchun cacharca. Paicunahuanca Elipac churicuna, Ofnipish, Fineaspish rircami.

5Carpa huasicunaman Dios ari nishca quillcata huacaichina Arca chayacpica, tucui israelcunami yallita cushicushpa, allpa chucchucta caparirca.

6Chashna sinchita caparicta filisteocuna uyashpaca: «¿Hebreocunapac carpa huasicunapica, ima nishpatac chashna yallita cushicushpa caparicuncuna?» nirca.

Mandac Diospac Arca carpa huasicunaman apamushcata

7filisteocuna yachashpaca mancharircacunami. Chashna manchashpami: «¡Diosmari carpa huasicunaman chayamushca!» nishpami: «¡Cunancamanca jaicapi cashna llaquica mana tiyashcachu! ¡Aij, ñucanchiclla imachari tucushun!

8¡Aij ñucanchiclla! ¿Chai Diospac sinchi maquimantaca pitac cacharichingayari? Chai Diosmi Egiptopi causaccunataca shitashca pambapi tauca plagacunahuan llaquichirca.

9Filisteocunalla, hebreocuna ñucanchicta servishpa causacushca shinallatac ñucanchicpish paicunata mana servishpa causangapacca sinchiyaichic. ¡Filisteocunalla sinchi, sinchita shayarishpa macanacushunchic!» nirca.

10Filisteocunaca sinchita macanacushpami, israelcunataca atirca. Shina aticpimi, paicunapac quiquin carpa huasicunaman miticushpa callparca. Chaipi yallita huañuchicpimi, chaquillahuan ric israelcunaca quimsa chunga huaranga soldadocuna huañurca.

11Diospac Arcata quichushpami, Elipac churicuna, Ofnitapish, Fineastapish huañuchirca.

Elipac huasipi jatun llaqui tucushcamanta

12Chai punzhallatacmi Benjamín aillupuramanta shuc runa chai macanacuimanta miticushpa, Silo puebloman churanapish lliquirishca, umapish allpalla chayarca.

13Chai runa chayacpica, Elimi ñan ladopi chapashpa bancupi tiyacushca carca. Paica Diospac Arcata yuyarishpami shungupica chucchushpa tiyacurca. Chai runa Silo puebloman chayashpa paicunaman huillacpica, tucui chai pueblopi causaccunami yallita caparicurca.

14Chashna yallita caparinacucta Elí uyashpaca:

—¿Ima nishpatac chashna caparicuncuna?— nishpa tapurca.

Chai runaca Elipacman callpashpa cuchuyashpami tucui huillarca.

15Elica ña iscun chunga pusac huatatami charirca. Paipac ñahuipish ña amsayashcamantami, mana ricui pudirca.

16Chai runaca Elitaca:

—Ñucaca jatun macanacuimanta miticushpa shamuc runami cani. Cunanmi jatun macanacuimanta miticurcani— nirca.

Shina nicpimi Elica:

—Ñuca huahualla, ¿imatac tucurcayari?— nishpa tapurca.

17Shina tapucpimi, chai runaca:

—Filisteocuna macanacushpa mishacpimi, israelcunaca miticushpa callparca. Israelcunapurapica achca huañushcami tiyan. Cambac churicuna, Ofnitapish, Fineastapish huañuchishpami Diospac Arcatapish quichushpa aparcacuna— nirca.

18Diospac Arcata quichurcami nicpica, bancumanta Elica azhacman tigrarca. Paica ña yuyac cashcamanta shinallatac llashac cashcamantami urmashpaca nucata paquishpa huañurca. Paica chuscu chunga huatatami israelcunataca mandarca.

19Chai punzhallapitacmi Fineaspac huarmi Elipac nueraca huicsayuc tucushpa ña sajuarinalla carca. Chashna cashpami paica: “Diospac Arcata quichurcami, paipac suegropish, paipac cusapish huañushcami” nicta uyashpami yallita nanai japicpi sajuarirca.

20Nanaihuan huañunalla siricucpimi, paipac ladopi cac huarmicunaca: «Ama manchaichu, cari huahuatami charishcangui» nirca. Shina nicpipish, paica ima nishcatapish, mana uyashpami upalla carca.

21Paica: «Sumac achiclla Diosca israelcunamanta anchurishcami» nishpami chai huahuataca Icabodta shutichirca.

Diospac Arcata quichushcamanta suegropish, paipac cusapish huañushcamantami chashnaca shutichirca.

22Shinallatac: «Diospac Arcata quichushpa apashcamantaca sumac achiclla Diosca israelcunamanta anchurishcami» nirca.