1 REYES 6 - Biblia Quichua Cañar 2010

Salomón Diospac huasita shayachishcamanta(2 Cr 3.1-14)

1Israelcunata Salomón chuscu huatata mandacui huatami israelcuna Egipto llactamanta llucshimushcaca chuscu patsac pusac chunga huata tucurca. Chai huatapac Zif shuti quillapimi Mandac Diospac huasita shayachinata callarirca.

2Mandac Diospac jatun mandac Salomón shayachishca huasica ishcai chunga canchis metro largomi carca. Anchomanca iscun metromi carca. Huichaimanca chunga quimsa metro chaupimi carca.

3Diospac huasi ñaupaman tiyac corredorca Diospac ucu largo shinallatacmi iscun metrota charirca. Shinallatac Diospac ucu ñaupapica chuscu metro chaupi anchomi carca.

4Diospac huasi ventanacunataca ucumanca ancho canzhamanca quichquitami ruhuarca.

5Shinallatac chai huasi jatun pircapi quimichishpami uchilla ucucunatapish ruhuarca. Diospaclla chicanyachishca ucu pata muyundipipish chashnallatac ucucunatami ruhuarca.

6Pirca muyundipi tiyac callari ucuca ishcai metro ishcai chunga pichca centímetro anchomi carca. Chai ucupac jahuapi tiyac ucuca ishcai metro canchis chunga centimetromi carca. Chai ishcai ucupac jahuaman tiyac ucuca quimsa metro chunga pichca centimetromi carca. Diospac huasi patacunapi caspicunata mana jarcachishpa churangapacmi huasi canzha lado pircataca ñañuyachishpa ruhuarca.

7Diospac huasita shayachingapacca allichishca rumicunallatacmi apamurca. Chaimantami huasita ruhuacucpica, tacana fierrota, hachata, ima shuc fierrocunapish chilin nishpaca mana uyarirca.

8Chaupi altoi-bajopi tiyac ucuman yaicuna punguca Diospac huasi alli ladomanmi carca. Chaupi altoi-bajoman huichai ringapacpish, chai altoi-bajomanta ashtahuan jahua altoi-bajoman huichai ringapacpish achcata muyushpa churu shina gradami carca.

9Salomonca Diospac huasita tucuchishpaca, chai huasi jahuataca vigacunahuan, cedro tablacunahuanmi taparca.

10Shinallatac Diospac huasi tucui muyundipica ishcai metro ishcai chunga pichca centimetrota charic huasicunatami shayachirca. Chai huasica Diospac huasi pircapi cedro caspihuan jarcachishcami carca.

11Chai quipami mandac Diosca Salomonta rimashpaca:

12«Can shayachishca huasimantaca caitami nisha nini. Ñuca quillcashcacunata cazushpa, ñuca huillashcata uyashpa, ñuca mandashca shimicunata tucui pactachishpa alli causacpica, cambac taita Davidman ima nishcataca canhuanmi pactachisha:

13Ñucaca israelcunapac chaupipi causashpami ñuca acllashcacunataca mana saquisha» nircami.

14Shinami Salomonca Diospac huasita shayachinataca tucuchirca.

15Diospac huasi ucu pircacunataca caspihuan ruhuashca shina saquirichunmi ucu pambamanta pacha jahua viga caspicaman chayacta cedro tablahuan tucui taparca. Diospac huasi ucu pambataca ciprés tablacunahuanmi taparca.

16Shinallatac chai huasi ucupica ucu pambamanta pacha jahuacamanmi iscun metrota charic ucuta cedro tablahuan ruhuarca. Chai ucutaca Diospaclla chicanyachishca cachunmi ruhuarca.

17Diospac huasi ñaupa lado ucuca chunga pusac metro largomi carca.

18Diospac huasi ucu pircacunaca cedro tablahuan tapashcami carca. Chai tablacunapica sachapi tiyac calabazacunahuan, sisa butucunahuan allichishcami carca. Shinallatac cedro tablahuan tucui jarcashca cashpami shuc rumillapish mana ricurirca.

19Mandac Dios ari nishca quillcata huacaichina Arcata churangapacmi Diospaclla chicanyachishca ucutaca alli allichirca.

20Diospaclla chicanyachishca ucuca largomanpish, anchomanpish altomanpish iscun metrotami charirca. Chai ucutaca imahuan mana chapushpami curillahuan taparca. Cedro caspihuan ruhuashca Diospac altartapish curillahuantacmi taparca.

21Shinami Salomonca Diospac huasi ucutaca ashtahuan alli curihuan taparca. Diospaclla ucutapish curihuan tapashpami, chai ucuman yaicuna pungutapish curi cadenacunahuan jarcarca.

22Diospac huasi ucutaca tucuimi jahuamanta pacha ucu pambacaman curihuan taparca. Diospaclla chicanyachishca ucu chimbapurapi tiyac altartapish tucuimi curihuan taparca.

23Shinallatac Diospaclla chicanyachishca ucupi churangapacca ishcai querubintami olivos caspimanta ruhuarca. Chaicunaca chuscu metro altomi carca.

24Querubinpac shuc alasca ishcai metro ishcai chunga pichca centimetromi carca. Caishuc alaspish chashnallatacmi carca. Shuc alas puntamanta caishuc alas puntacamanca chuscu metro pichca chunga centimetromi carca.

25Chashnallatac caishuc querubinpish chuscu metro chaupitami charirca. Chai querubincunaca ishcaitami chashnallatac chai shinallatac ruhuashca carca.

26Punta querubinca chuscu metro chaupi jatunmi carca. Caishucpish chashnallatacmi carca.

27Chai querubincunataca Diospac huasipi cac Diospaclla chicanyachishca ucupimi churarca. Shuc querubinpac alasca caishuc lado pircaman tupacta, caishuc querubinpac alaspish caishuc lado pircaman tupactami carca. Chaupipica caishuc alascunahuan tupachinacushcami carca.

28Chai querubincunatapish curihuanmi jahuata taparca.

29Diospac huasi muyundi pircaca canzhamanpish, ucumanpish sumac ricunacunata ruhuashcami carca. Chaicunaca querubincuna, palmera yuracuna shinallatac butucuc sisacunami carca.

30Chai huasi ucu pambatapish, canzha ladotapish curihuanmi taparca.

31Diospaclla cac ucuman yaicuna pungupica huichaiman churashca caspicunapish, pichca esquinacunata ruhuashca olivos caspimantami carca.

32Ishcai pungucunatami olivos caspimanta ruhuashca carca. Chai pungucunapica querubincunata, palmera yuracunata, sisacunata ruhuashpami curihuan taparca.

33Dios-huan tupana huasi pungupi shayachina caspicunatapish olivos caspimanta cuadrota ruhuashpami shayachirca.

34Ashtahuanpish chai ishcai pungucunaca ciprés caspimanta ruhuashcami carca. Chai pungucunaca muyucllami carca.

35Chai pungucunapipish querubincunata, palmera quirucunata, sisacunata, ruhuashpami allichirca. Chai quipaca chai allichishcacunataca alli curihuanmi taparca.

36Shinallatac Dios-huan tupana huasi ucupi cac patataca labrashca rumicunahuanmi quimsa filata ruhuarca. Cutin shuc filataca cedro caspimantami ruhuarca.

37Ña chuscu huatata Salomón mandacucpimi, Zif shuti quillapi, Mandac Diospac huasita shayachingapac callari rumicunata churarca.

38Chai huasitaca chunga shuc huatata ña mandacucpimi, Bul shuti pusac quillapi tucui tucuchirca. Chaipi ima tiyanatapish, chaipi ima minishtirishcatapish canchis huatapi shayachishpa tucuchirca.