JEREMÍAS 34 - Biblia Quichua Cañar 2010

Jeremías Sedequiasta rimashcamanta

1Babilonia llactata jatun mandac Nabucodonosor tucui paipac soldadocunahuan, cai pachapi tiyac pai mandacuc llactacunata mandaccunahuan shamushpa, Jerusalenpi causaccunahuan, chai llactacunapi causaccunahuan macanacucucpimi, Mandac Diosca Jeremiastaca:

2«Israelcunata Mandac Dios ñucaca: “Judá llactata jatun mandac Sedequiaspacman rishpa, Mandac Diosca: Cai llactataca Babilonia llactata jatun mandacmanmi cugrini. Paica ninata japichishpami tucui rupachiga.

3Paipac maquimantaca mana llucshi pudinguichu. Ashtahuanpish paipac maquipi japi tucushpami prezuringui. Canta Babilonia llactaman apacpica, jatun mandactaca ñahui ñahuimi ricungui. Paica ñahui ñahuimi canhuanca parlanga” ninmi.

4Shina cacpipish, jatun mandac Sedequiaslla, Mandac Dios rimashcata uyai. Mandac Dios canmanta rimashpaca: “Cantaca mana espadahuanchu huañuchinga.

5Ashtahuanpish sumac huañuitami charingui. Can huañucpica, ñaupa taita jatun mandaccunaman shinami mishquilla ashnacucta rupachinga. Paicuna canmanta llaquishpaca: ‘¡Aij, ñucanchic mandaclla!’ nishpami huacanga. Ñuca huillachishcaca chashnatacmi pactanga. Chaitaca Mandac Dios ñucami nini” ninmi ningui» nirca.

6Dios ima nishcata huillac Jeremiasca Jerusalenpimi Judá llactata jatun mandac Sedequiasmanca tucui caicunata huillarca.

7Babilonia llactata jatun mandacpac soldadocunaca Jerusalenpi causaccunahuan, Judá llactapi saquirishca Laquis, Azeca llactapi causaccunahuanmi macanacucurca. Judá llactapi muyundita pircashca llactacunaca chai ishcaillami saquirishca carca.

Serviccunata mana cacharishcamanta

8Jatun mandac Sedequiasca serviccunata cacharichingapacmi tucui Jerusalenpi causaccunahuan ari ninacurca. Chai quipami Mandac Diosca Jeremiasman huillarca.

9Chaica, hebreopuramanta servic caricunatapish, servic huarmicunatapish, tucuita cacharichun. Pipish Judá llactapi causac huauquicunataca ama servichishpa charichunmi ari nichirca.

10Servic caricunahuanpish, servic huarmicunahuanpish cacharichichun nishpa ari nishcataca tucui gentecunami cazurca. Chashnami pipish mana ashtahuan servichingapac tucui cacharirca.

11Shina cashpapish, shuctac yuyaita japishpami servic caricunatapish, servic huarmicunatapish, cutin servichun tucuita cutichimurca.

12Chaimanta Mandac Dios Jeremiasta rimashpaca:

13«Israelcunata Mandac Dios ñucaca: Egipto llactapi servishpa, llaquinayaita causacucmanta llucchimui punzha cancunapac ñaupa taitacunahuan ari ninacushpaca:

14Hebreopuramanta maijan cancunaman caturishpa servicucpica, cada canchis huatapi cacharinguichic. Sucta huatallata servichishpa charinguichic nircanimi. Ashtahuanpish cancunapac ñaupa taitacunaca mana uyarcachu, shinallatac mana cazurcachu.

15Cancunata servic huauquicunata cacharishpaca ñuca mandashcatami ruhuanguichic. Allita ruhuasha nishpami, ñucata mañana huasipi, ñucapac ñaupapi ari ninacushpa, paicunata cacharircanguichic.

16Ashtahuanpish, ñuca shutita yangapi churashpami, servic caricunatapish, servic huarmicunatapish paicuna munashca shina cacharishpa cutichimurcanguichic. Shinami cutinllatac servichishpa charircanguichic.

17Chaimantami Mandac Dios ñucaca: Cancunata servic huauquicunatapish, ayudaccunatapish mana cazurcanguichicchu. Riquichic, jatun macanacuita, jatun ungüita, yarcaitami llaquichichun cacharigrini. Chashna llaquichishpami cancunataca tucui cai pachapi tiyac llactacuna pingaichichun saquigrini.

18Becita huañuchishpa, ishcaipi chaupishpami, chai chaupita pasarcanguichic. Chaimantami ñucahuan ari nishcata saquishpa, mana pactachishcamanta llaquichigrini.

19Judá llactata mandaccunapish, Jerusalenta mandaccunapish, shuctac mandaccunapish, curacunapish, cai llactapi causac tucui gentecunapish becita huañuchishpa chaupishcatami pasarca. Paicunatapish chashnallatacmi llaquichigrini.

20Paicunata piñashpa, huañuchinata munaccunapac maquipimi churagrini. Paicunapac cuerpotaca volac animalcuna, sacha animalcunami micunga.

21Judá llactata jatun mandac Sedequiastapish, pai churashca mandaccunatapish, paita piñashpa huañuchinata munaccunapac, cancunapac ñaupamanta rishca Babilonia llactata jatun mandacpac soldadocunapac maquipimi churasha.

22Paicunataca cutinmi cai llactaman cutichimusha. Paicunami cancunataca mishashpa, cai llactata quichushpa rupachinga. Chashna rupachicpica, Judá llactapi tiyac pueblocunapica shuc runallapish mana saquirishpami tucui huañunga. Chashnami shitashca pambata ruhuasha. Chaitaca Mandac Dios ñucami nini» nirca.