PROVERBIOS 26 - Biblia Quichua Cañar 2010

1Rasuca mana usyai punzhacunachu,

tamyapish mana cosecha punzhacunapacchu,

ima allicunapish yuyai illac runapacca

mana canchu.

2Zhutacuna atishpa ric shina,

golondrina volac shinami,

maldiciashcaca mana yanga shamun.

3Chicoteca caballota macangapacmi.

Frenoca burrota cazuchingapacmi.

Varaca yuyai illac runata

lomopi shitangapacmi.

4Yuyai illac runa shina

mana tucungapacca,

ama pai shinallatac cutichinguichu.

5Yuyai illac runa paipac yuyaipi

yachacmi cani ama nichunca,

pai ima shina cashca shinallatac rimangui.

6Yuyai illac runata huillachun cachacca

chaquita paquic shina, mana cashpaca

ima mana allita ubiac shinami

paillatac llaqui tucun.

7Yuyai illac runamanca yuyaita cuc

rimaicunaca suchu runapac chaqui

paquirishpa yanga huarcuracuc shinami.

8Yuyai illac runata alli ninaca

rumita huaracapi huatac shinami.

9Yuyai illac runapac shimipica

yuyaita cuc rimaicunaca

machashca runa cashapi

taunallishpa mana nanaric shinami.

10Yuyai illac yanga puric runacunata

cullquimanta trabajachic runaca,

flechata cacharishpa

tucui mashnata chugrichic shinami.

11Allcu arcadashcata

cutin micuc shinami,

yuyai illac runaca

paipac shungupi yuyarishcata

cutinllatac ruhuan.

12¿Paipac yuyaillapi

yuyaisapami cani niric runata

ricushcanguichu?

Chaipac randica, yuyai illac runamantami

imallatapish shuyana can.

13Quilla runaca: «¡Leonmi ñanpi chapacun!

¡Canzhapica leonmi shayacun!» ninmi.

14Bisagrapi pungu muyucuc shinami,

quilla runaca paipac camapi

caiman chaiman singucun.

15Quilla runaca platomanta

micunata paipac maquihuan

shimiman apanatami quillacun.

16Quilla runaca paipac shungupica

alli yuyaita cuc canchis runacunatapish,

yalli ashtahuan yachacmi cani yuyanmi.

17Shuccunapac piñanacuipi satiricca,

ñanta pasacuc allcuta ringripi

japiric shinami.

18Loco tucushpa ninata japichishpa,

flechata cacharishpa huañuchic shinami,

19paihuan apanacucta

imatapish nishpa pandachin.

Chai quipaca: «¡Asingapacllami

chashna ruhuarcani!» ninmi.

20Yanta illacpica, ninapish huañunmi.

Huashalla parlaccuna illacpica,

piñanacuipish tucurinmi.

21Carbonca brazasta ruhuangapacmi.

Yantaca rupachingapacmi.

Piñarishpa rimaric runaca

piñanacuitami callarichin.

22Huashalla parlac runa parlashcaca

micuna shinami ucu huicsaman rinlla.

23Mana alli shunguhuan crinallata

llullashpa parlashcaca

cullquita yacuyachishpa mapata llucchishpa,

barro mangapi saquishca shinami.

24Piñac runaca nic tucushpallami

mishquillata riman.

Ashtahuanpish shungupica

pandachina yuyaillami puricun.

25Canhuan apanacuc tucushpa rimacpica,

ama cringuichu.

Chaica, paipac shungupica canchis

jatun millanayai yuyaicuna jundami.

26Pai piñarishcata

shimihuan pacacushpapish,

pai mana allita ruhuashcaca

tandanacuipimi ricuringa.

27Ucuta jutcuc runaca

chaillapitacmi urmanga.

Jatun rumita singuchicpica,

paipac jahuallatatacmi shamunga.

28Llulla callu runaca

llaquichishca runatami

ashtahuan llaquichin.

Crinallata llullashpa parlashcaca

llaquipimi urmachin.