1 SAMUEL 23 - Biblia Quichua Cañar 2010

Keila pueblopi causaccunata David quishpichishcamanta

1Davidman huillashpaca: «Riqui, filisteocunami Keila pueblopi causaccunata macashpa, trillana pambacunamanta granocunata shuhuashpa apacun» nirca.

2Shina huillacpimi Davidca Mandac Diostaca:

—¿Chai filisteocunahuan macanacugrishachu?— nishpa tapurca.

Shina tapucpimi, Mandac Diosca Davidtaca:

—Filisteocunahuan macanacushpa, Keila pueblopi causaccunata quishpichigri— nirca.

3Ashtahuanpish Davidpac runacunaca:

—Riqui, ñucanchicca cai Judá llactapi cashpapish manchaihuanmi canchic. ¡Keila puebloman rishpa, filisteocunahuan macanacunatacarin ashtahuanmi manchanayanga!— nirca.

4Shina nicpi, David Mandac Diosta cutinllatac tapucpimi Mandac Diosca:

—Jatarishpa Keila puebloman rilla. Ñucami filisteocunataca cambac maquipi churasha— nirca.

5Shina nicpimi, Davidca paipac runacunahuan Keila puebloman rishpa, filisteocunataca macashpa tucuita atirca. Chashna atishpami, paicunapac animalcunatapish quichushpa Keila pueblopi causaccunataca quishpichirca.

6Ahimelecpac churi Abiatar miticushpa Davidta catishpa Keila puebloman rishpaca efod churanata apashpami rirca.

7Keila puebloman David shamushcata Saulman huillacpimi, Saulca: «Diosmi ñuca maquipi churashca. Chaimantami Davidllatac puebloman yaicushpa, pungucunata huichcarishpa aldabarishca» nishpa yuyarca.

8Chaimantami Saulca Keila pueblopi macanacungapac ringapac tucui paipac runacunata tandachirca. Paica Davidtapish, paipac runacunatapish muyunacushpa japinatami yuyarca.

9Ashtahuanpish Davidca Saúl ima shina huañuchinata yuyaricushcata yachashpami Abiatar curataca:

—Efodta apamui— nirca.

10Chai quipami Davidca:

—Israelcunata Mandac Dioslla, Keila pueblopi causaccunataca canta servic ñucamanta Saúl tucuchingapac shamugricushcatami yachani.

11¿Keila pueblopi causaccunaca Saulpac maquipi ñucata churangacunachu? ¿Canta servic ñuca uyashca shina Saulca urai shamungachu? Israelcunata Mandac Dioslla, canta servic ñuca tapushcataca huillaiyari— nirca.

Shina tapucpi Mandac Diosca:

—Ari, Saulca urai shamungami— nirca.

12Shina nicpi, Davidca cutinllatac tapushpaca:

—¿Keila pueblopi causaccunaca ñucatapish, ñuca runacunatapish Saulpac maquipi churangacunachu?— nirca.

Shina nicpimi, Mandac Diosca:

—Ari, canta japichingacunami— nirca.

13Shina nicpimi, Davidca paihuan cac sucta patsac runacunandi, Keila pueblomanta llucshishpa maiman rina cashcata mana yachashpa rircacunalla. David Keila pueblomanta miticushpa rishcata Saúl yachac chayashpaca, mana rishpami saquirirca.

14Shinami Davidca shitashca pamba Zif urcucunaman rishpa pirca huashacunapi miticushpa causacurca. Saulca punzhanta mashcacucpipish Diosca Davidtaca mana paipac maquipi churarcachu.

15Davidca paita huañuchingapac Saúl mashcangapac llucshishcata yachashpami, Zif shitashca pambapi cac Hores pamballapitac saquirirca.

16Chaita yachashpami, Saulpac churi Jonatanca Hores pambapi Davidta ricungapac rirca. Diospi yuyaita churashpa ashtahuan sinchiyachun nishpami,

17Jonatanca:

—Ama manchaichu, ñuca taita Saúl canta mashcacushpapish mana taringachu. Canmi israelcunata jatun mandac tucungui. Ñucaca cambac catic mandacmi tucusha. Chaitaca ñuca taita Saulpish allimi yachan— nirca.

18Ishcaita Mandac Diospac ñaupapi ari ninacushpami, Davidca Hores pamballapitac saquirirca. Cutin Jonatanca paipac huasimanmi cutirca.

19Chai quipami Zif pueblopi causaccunaca Gabaa puebloman huichai rishpa Saultaca:

—¿Davidca ñucanchic llacta Hores pambamanta ura ladoman cac Haquila lomacunapi mai mana chayanapimi miticushca canga?

20Cunanca jatun mandaclla, can yuyashca shina, utca urai shamuilla. Ñucanchicmi can jatun mandacpac maquipi churashun— nirca.

21Shina nicpimi Saulca:

—Cancuna ñucata llaquishpa, huillangapac shamushcamantaca Mandac Diosllatac bendiciachun.

22Cunanca, maipi miticushca pushtuta alli ricushpa ricsigrichic. Pi ricushcatapish, alli yachaichic. Paica yalli vivo cashcatami ñucamanca huillancuna.

23Alli alli ricushpa maipi miticuctapish allita yachashpa ñucaman huillac shamunguichic. Chashna huillacpica, cancunahuan rishallami. Chai llactapi cacpica, Judá llactapi causacuc huaranga huaranga gentecunapimi mashcasha— nirca.

24Shina nicpimi, paicunaca Saulpac ñaupamantaca Zif puebloman cutircacuna. Ashtahuanpish Davidca Arabá llactapi cac Maón shitashca pamba ura ladopimi paipac runacunandi carca.

25Saulca paipac soldadocunandimi mashcangapac rirca. Chaita Davidman huillacpimi, shitashca Maón pambapi cac jatun rumi quingraita urai rirca. Chaita Saúl yachashpami, shitashca Maón pambata Davidta catishpa rirca.

26Saulca shuc lado urcuta ricpica, Davidca paipac runacunandimi caishuc lado urcuta miticungapac callpashpa rircacuna. Ashtahuanpish Saulca paipac soldadocunahuanmi Davidtaca paipac runacunandi japingapac muyunacugrirca.

27Shina cacpimi Saulpacman shuc huillac shamushpaca:

—Filisteocunami ñucanchic llactapi macanacungapac yaicushca. Chaimanta utca shamui— nirca.

28Shina huillacpimi, Saulca Davidta huañuchingapac caticushcata saquishpa, filisteocunahuan macanacungapac cutirca. Chaimantami chai pambataca Sela-hama-lecotta shutichirca.

29Chaimantami Davidca chaimanta huichai rishpa, maita mana chayaipac shitashca En-gadi pamba quingraicunapi miticushpa causagrirca.