2 SAMUEL 5 - Biblia Quichua Cañar 2010

Davidta jatun mandac cachun churashcamanta(1 Cr 11.1-3)

1Chai quipami tucui Israel aillucuna Hebrón pueblopi Davidpacman chayashpaca: «Ñucanchicca cambac aicha, cambac tullullatacmi canchic.

2Ñucanchicta Saúl mandacui punzhacunapica canmi israelcunataca macanacuiman pushashpa llucshic carcangui. Shinallatac Mandac Diosca: “Canmi ñuca israelcunataca michingui. Canllatacmi mandangui” nircami» nirca.

3Tucui israelcunata pushac yuyaccunami jatun mandac Davidpacman Hebrón puebloman rirca. Chaipimi Davidca Diospac ñaupapi shuc ari ninacuita paicunahuan ruhuarca. Chaillapitacmi Davidta aceitehuan cahuishpa israelcunata jatun mandacta ruhuarca.

4Davidca quimsa chunga huatata charishpami, mandai callarirca. Paica chuscu chunga huatatami mandarca.

5Canchis huata sucta quillatami Hebrón pueblopi mandarca. Chai quipaca quimsa chunga quimsa huatatami Israel llactatapish, Judá llactatapish Jerusalén pueblopi causashpa mandarca.

David Sión jatun torreta japishcamanta(1 Cr 11.4-9)

6Jatun mandac Davidca paipac runacunata pushashpami Jerusalenpi causac jebuseocunahuan macanacungapac rirca. Chaipimi paicunaca Davidtaca: «Canca cai pueblomanca mana yaicui pudinguichu. Ñahui mana ricuccunapish, suchucunapish, Davidca mana cai pueblomanca yaicungachu» nishpami mana yaicuchun saquinga nirca.

7Chashna nicucpipish, Davidca jatun torrehuan jarcashca Sión pueblotaca japircami. Chai puebloca Davidpac pueblomi.

8Chai punzhami Davidca: «Jebuseocunata huañuchingapac riccunaca toma yacuta catishpa, ñucata mana ricunayachic ñahui mana ricuccunata, suchucunata huañuchinguichic» nirca. Chaimantami: «Ñahui mana ricuccunapish, suchucunapish Mandac Diospac huasimanca mana yaicungachu» nirca.

9Davidca chai jatun torrehuan jarcachishca pueblopi causashpami Davidpac pueblo nishpa cayarca. Shinallatac Milo pushtumanta callarishpaca pai tiyana huasicaman jatun pircata ruhuachirca.

10Mandac Dios Davidhuan cashcamantami paica punzhanta ashtahuan ashtahuan sinchi tucushpa catirca.

Hiram huillaccunata Davidpacman cachashcamanta(1 Cr 14.1-2)

11Tiro pueblota jatun mandac Hirampish, rimaccunata cedro caspicunahuan, shinallatac carpinterocunatapish, rumita labraccunatapish Davidpacman cacharcami. Paicunami Davidpac huasitaca ruhuarca.

12Shina ruhuacpimi, Davidca Diosllatac israelcunata cuyashpa, paita jatun mandac cachun churashcata, shinallatac tucui imapipish alli pushacushcata yachac chayarca.

David Jerusalenpi ashtahuan churicunata charishcamanta(1 Cr 3.5-9; 14.3-7)

13David Hebrón pueblomanta rishpaca Jerusalén pueblopi causac caishuc huarmicunatami ashtahuan charirca. Chai huarmicunapish cari huahuacunata, huarmi huahuacunatami charirca.

14Jerusalén pueblopi huacharishca huahuacunaca: Samúa, Sobab, Natán, Salomón,

15Ibhar, Elisúa, Nefeg, Jafía,

16Elisama, Eliada, Elifeletmi carca.

Filisteocunahuan macanacushpa David atishcamanta(1 Cr 14.8-17)

17Filisteocunaca Davidta israelcuna jatun mandac cachun aceitehuan cahuishcata yachashpami, Davidhuan macanacungapac huichai rirca. Chaita yachashpami, Davidca jatun pircahuan jarcashca puebloman rirca.

18Filisteocuna chashna rishpami, tucui Refaim pambapi tiyarirca.

19Chaimantami David Mandac Diosta tapushpaca:

—¿Filisteocunahuan macanacungapac huichai rinachu cani? ¿Paicunata ñuca maquipi churanguichu?— nirca.

Shina nicpimi Mandac Diosca:

—Macanacugrilla, paicunataca cambac maquipimi churasha— nirca.

20Chashna nicpi, David rishpaca, Baal-perazim pambapi macanacushpami filisteocunata atirca. Shina atishpami Davidca: «¡Mandac Diosca jatun yacu apac shinami ñucata piñaccunata tucui chingachishca!» nirca. Chaimantami chai pambataca Baal-perazimta shutichirca.

21Filisteocuna paicunapac ruhuashcalla dioscunata chaipi shitashpa ricpimi Davidpish, paipac runacunapish aparca.

22Shina cashpapish cutinllatacmi filisteocunaca Refaim tucui pambaman shamushpa, chaipi tiyarirca.

23Chaimanta David Mandac Diosta tapucpi paica:

—Paicunahuanca ama macanacungapac llucshichu. Ashtahuanpish bálsamo yuracuna tiyac pushtupi muyushpa japigri.

24Bálsamo panga jahuata puric shina uyaricpica, filisteocunahuan macanacungapac llucshingui. Chaipimi Mandac Dios Ñucaca filisteocunata huañuchingapac ñaupashpa risha— nirca.

25Jatun mandac Davidca Mandac Dios nishca shina ruhuashpami, filisteocunataca Geba pueblomantaca Gezer pueblo yaicunacaman catishpa huañuchirca.