2 SAMUEL 10 - Biblia Quichua Cañar 2010

Amonitacunata, siriocunata atishcamanta(1 Cr 19.1-19)

1Quipaca Amón llactata jatun mandac huañucpimi, paipac churi Hanún mandai callarirca.

2Shina tucucpimi Davidca: «Nahaspac churi Anunpac taitaca ñucahuan allimi apanacuc carca. Chaimantami paitapish cuyana cani» nishpa yuyarirca.

Shina yuyarishpami, paipac taita huañushcamanta llaquinacuchun, ishcai serviccunata cacharca.

3Ashtahuanpish Davidta serviccuna Amón llactaman chayacpi, chai llacta mandaccunaca Hanuntaca: «David chashna cachashpaca, ¿cushichichunchu cachashca canga? David paita serviccunata cachashpaca, ¿manachu quipata tucui tucuchingapac cai llacta imalaya cashcata ricuchun, pueblocunata ricushpa purichun cachashca canga?» nirca.

4Shina nicpimi, Hanunca Davidta serviccunata japishpa, shuc lado barbasta pitishpa, churanatapish cinturamanta urapi pitishpa cutichishpa cacharca.

5David chaita yachashpaca, paicuna yallita pingaihuan cacpimi, paicunata tupachun cacharca. Tupagriccunataca: «Jericó pueblollapi barbas huiñangacaman saquirichic. Quipaca cutinguichicllami» nichunmi cacharca.

6Amón llactapi causaccunaca David piñashpa, mana ricunayachicushcata yachashpami, Bet-rehob pueblopi, Soba pueblopi causac ishcai chunga huaranga soldadocunata, shinallatac Maaca llactata jatun mandacpac huaranga soldadocunata, Is-tob llactamantaca chunga ishcai huaranga soldadocunata pagashpa pushamurca.

7Chaita yachashpami, Davidca Joabta tucui sinchi soldadocunahuan macanacuchun cacharca.

8Amón llacta runacunaca pueblo yaicuna pungupimi macanacungapac allichirirca. Cutin Soba llactamanta, Rehobmanta siriocunaca Maaca, Is-bot llactamanta soldadocunahuanmi shuctac lado pambapi macanacungapac allichirirca.

9Joabca ñaupa ladomanpish, huasha ladomanpish macanacungapac allichirishca shayacucta ricushpami, tucui Israelmanta ashtahuan sinchi runacunata acllashpa, siriocunahuan macanacugrirca.

10Cutin puchushca soldadocunataca Amón llacta runacunahuan macanacuchunmi paipac huauqui Abisaiman curca.

11Shina cushpami paitaca: «Siriocuna ñucata atishpa ashtahuan sinchicuna cacpica, can ayudac shamungui. Cutin Amón llacta runacuna canta atishpa ashtahuan sinchicuna cacpica, ñucami canta ayudangapac risha.

12Ñucanchic llactamantapish, ñucanchicta Mandac Diospac pueblocunamantapish sinchita macanacushunchic. Ama manchaichu. Mandac Dios pai munashca shina ruhuachun» nirca.

13Shina nishpami, Joabca paihuan cac runacunata pushashpa siriocunahuan macanacungapac rirca. Siriocunaca miticushpami, paipac ñaupamanta callparca.

14Siriocuna miticushpa callpacta ricushpami, Amón llacta runacunapish Abisaipac ñaupamanta callpashpa pueblopi yaicurca. Shina callpacpimi, Joabca Amón llacta runacunahuan mana macanacushpa Jerusalenman cutirca.

15Siriocunaca israelcuna atishcamantami cutinllatac tandanacui callarirca.

16Shina tandanacushpami, Hadad-ezerca Eufrates yacumanta chimba ladoman cac siriocunata pushachun cacharca. Paicunaca Hadad-ezerpac soldadocunata mandac Sobacta mandac cachun churashpami, Helam puebloman chayarca.

17Chaita huillacpimi, Davidca tucui israelcunata pushashpa, Jordán yacuta pasashpa Helam puebloman chayarca. Chaipimi, siriocunaca Davidhuan macanacungapac allichirirca.

18Ashtahuanpish, siriocunaca israelcunata manchashpami, miticushpa callparca. Chaipimi, Davidca carretapi ric canchis patsac soldadocunata, caballopi ric chuscu chunga huaranga soldadocunata huañuchirca. Chaillapitacmi Sirio soldadocunata mandac Sobapish chugrichicpi huañurca.

19Israelcuna chashna macanacushpa aticpimi, jatun mandac Hadad-ezerta ayudac mandaccunaca israelcunahuan alli tucushpa, paicunata servishpa causarca. Chai punzhamanta pachami siriocunaca Amón llacta runacunata ayudanataca mancharca.