JOSUÉ 21 - Biblia Quichua Cañar 2010

Levitacunapac pueblocunamanta(1 Cr 6.54-81)

1Levitacunapac huasi ucupurata mandaccunami Eleazar curapacman, Nunpac churi Josuepacman, israelcunata pushaccunapacman shamurca.

2Canaán llactapi cac Silo pueblopi carpacunata shayachishpa causacucpi cuchuyashpa: «Mandac Diosca Moisestaca ñucanchic causana pueblocunataca animalcunata michina pambacunandi ñucanchicman cuchunmi mandarca» nirca.

3Shina nicpimi, israelcunaca paicunapac llacta pueblocunata Mandac Dios mandashca shina, michina pambacunandi levitacunaman curca.

4Punta suerteta ruhuashpaca, Cohatpac familiacunamanmi curca. Paicunaca Aarón curapac churi levitacunami carca. Paicunamanca Judá, Simeón, Benjamín aillucunapac llactacunamantami suerteta ruhuashpa chunga quimsa pueblota curca.

5Cutin chai puchushca Cohatpac churicunamanca Efraín, Dan aillucunapac, Manasespac chaupi aillupac llactamantami chunga pueblocunata suerteta ruhuashpa curca.

6Gersonpac churicunamanca Isacarpac, Aserpac, Neftalipac aillucunapac, Basán llactapi causac Manasespac chaupi aillupac llactamantami suerteta ruhuashpa, chunga quimsa pueblocunata curca.

7Shinallatac Meraripac aillumanca paicuna mashna cashcata ricushpami Rubenpac, Gadpac, Zabulonpac aillucunapac llactacunamanta suerteta ruhuashpa, chunga ishcai pueblocunata curca.

8Israelcunaca Mandac Dios Moisesta mandashca shinallatacmi suerteta ruhuashpa, levitacunamanca pueblo lado michina pambacunandi curca.

Cohatpac aillucunaman pueblocunata cushcamanta

9Judapac, Simeonpac aillucunapac llactacunamantaca cai pueblocunatami levitacunaman curca.

10Cai pueblocunatami Aaronpac churicunapuramanta Levipac churi Cohatpac aillumanca curca. Paicunamanca punta suerteta ruhuashcamantami cai pueblocunata curca.

11Judá aillupac urcupica Anacpac taitapac cashca Quiriat-arba nishca Hebrón pueblotami muyundi michina pambacunandi curca.

12Shina cacpipish, chai pueblo muyundi pambataca uchilla llactacunandimi Jefonepac churi Calebman curca.

13Aarón curapac churicunamanca huañuchishpa miticuna Hebrón pueblotami michina pambacunandi curcacuna. Shinallatac Libna pueblotapish michina pambacunandi,

14Jatir, Estemoa pueblocunatapish michina pambacunandi,

15Holón, Debir pueblocunatapish michina pambacunandi,

16Aín, Juta shinallatac Bet-semes pueblocunatapish michina pambacunandimi curca. Chai ishcai aillucunapac llactamantaca iscun pueblocunatami curca.

17Benjamín aillupac llactamantaca Gabaón, Geba pueblocunata michina pambacunandi,

18Anatot, Almón pueblocunatami michina pambacunandi curca. Tucuica chuscu pueblocunatami curca.

19Aarón curapac churicunaman cushca pueblocunaca chunga quimsa pueblocunatami michina pambacunandi curca.

20Cohatpac aillucunapuramanta saquirishca levitacunaman pueblocunata cungapac suerteta ruhuashpaca, Efraín aillupac llactamantami

21Efraín urcupi tiyac Siquem pueblota michina pambacunandi curca. Shinallatac huañuchishpa miticuna pueblotapish curcami. Shinallatac Gezer pueblotapish michina pambacunandi,

22Quibsaim, Bet-horón pueblotapish michina pambacunandimi curca. Tucuica chuscu pueblocunatami curca.

23Dan aillupac llactamantaca Elteque, Gibetón pueblocunatami michina pambacunandi,

24Agalón, Gat-rimón pueblocunatami michina pambacunandi curca. Tucuica chuscu pueblocunatami curca.

25Manasespac chaupi aillupac llactamantaca Taanac, Gat-rimón pueblocunatami michina pambacunandi curca. Tucuica ishcai pueblocunatami curca.

26Cohatpac churicunapac saquirishca ailluman cushca tucui pueblocunaca chunga pueblocunami michina pambacunandi carca.

Gersonpac familiaman pueblocunata cushcamanta

27Gersonpac churi levitacunamanca Manasespac chaupi aillupac Basán llactamantami Golán pueblota michina pambacunandi curca. Shinallatac huañuchishpa miticuna pueblotapish curcami. Beestera pueblotapish michina pambacunandimi curca.

28Isacar aillupac llactamantaca Cisón, Daberat pueblocunata michina pambacunandi,

29Jarmut, En-ganim pueblocunatami michina pambacunandi curca. Tucuica chuscu pueblocunatami curca.

30Aser aillupac llactamantaca Miseal, Abdón pueblocunata michina pambacunandi,

31Helcat, Rehob pueblocunatami michina pambacunandi curca. Tucuica chuscu pueblocunatami curca.

32Neftalí aillupac llactamantaca Galilea llactapi cac Cedes pueblota, Hamot-dor pueblota, Cartán pueblotami michina pambacunandi curca. Tucuica quimsa pueblocunatami curca. Shinallatac huañuchishpa miticuna pueblotapish curcami.

33Gersonpac churicunaman michina pambacunandi cushca pueblocunaca chunga quimsami carca.

Merari familiaman pueblocunata cushcamanta

34Meraripac churi saquirishca levitacunamanca cai Zabulón aillupac llactamantami Jocneam, Carta pueblocunata michina pambacunandi,

35Dimna, Naalal pueblocunatami michina pambacunandi curca. Tucuica chuscu pueblocunatami curca.

36Rubén aillupac llactamantaca Beser, Jahaza pueblocunata michina pambacunandi,

37Cademot, Mefaat pueblocunatami michina pambacunandi curca. Tucuica chuscu pueblocunatami curca.

38Gad aillupac llactamantaca Galaadpi tiyac Ramot pueblota, huañuchishpa miticuna Mahanaim pueblota michina pambacunandi,

39Hesbón, Jaser pueblocunatami michina pambacunandi curca. Tucuica chuscu pueblocunatami curca.

40Meraripac churicunamanta saquirishca levitacunamanca chunga ishcai pueblotami suerteta ruhuashpa, paicuna mashna cashcata ricushpa curca.

41Israelcunapac chaupipi levitacunapac pueblocuna michina pambacunandica chuscu chunga pusac pueblomi carca.

42Chai pueblocunaca cada pueblomi muyundipi michina pambacunata charirca. Chashnami tucui pueblo carca.

Israelcuna, paicunapac allpacunapi causai callarishcamanta

43Shinami Mandac Diosca ñaupa taitacunaman cusha nishpa ari nishca llactataca israelcunaman curca. Chai tucui llactatami paicuna causachun curca.

44Mandac Diosca ñaupa taitacunaman ari nishca shinallatacmi tucui chai llacta muyundipi cushilla causaita curca. Shinami tucui israelcunata piñaccunaca maijanpish macanacungapac mana shayarirca. Chai piñaccunataca Mandac Diosmi tucui israelcunapac maquipi churarca.

45Mandac Dios israelcunaman allita ruhuasha nishcataca shuc rimaillatapish mana saquishpami tucui pactachirca.