1Mandac Diosmi shuctac llactacunata llaquichinamanta Jeremiasman huillarca.
2Josiaspac churi jatun mandac Joacim Judá llactata chuscu huatata mandacucpimi, Babilonia llactata jatun mandac Nabucodonosorca Egipto llactata jatun mandac Faraón nishca Necaopac soldadocunata Eufrates yacu ladopi tiyac Carquemis llactapi macanacushpa misharca. Chai soldadocunamanta Mandac Dios rimashpaca:
3«Uchilla escudocunata
apashpa macanacuiman shamuichic.
4¡Carretacunata caballopi huataichic!
¡Caballocunapi montaichic!
¡Fierro cascota churarichic!
¡Lanzacunatapish mulaichic!
¡Shunguta pacac fierro churanata
churarichic!
5¿Ima nishpatac mancharishpa,
huashaiman cuticunguichic?
Egipto sinchi soldadocunaca
manchaihuanmi mana tigra ricushpa,
miticungapac callpan.
Tucui ladopimi manchai tiyan.
6Yallita callpac runapish,
mana callpai pudinchu.
Yalli sinchi runapish
mana ati pudinchu.
Jahua lado Eufrates yacu ladopimi
huactarishpa urmancuna.
7¿Pitac jatun Nilo yacu shina
huacyashpa shamucun?
8Egipto llacta gentecunaca
jatun Nilo yacu shinami miramun.
Paicunaca: “Huichai rishpa,
tucui llactata tapashpami,
llactapi causaccunatapish
tucuchishun” nincuna.
9Caballopi, Carretapi tiyarishpa
callpaichic.
Alli sinchi soldadocunaca
escudota apaichic.
Etiopía llacta, Put llacta
soldadocunapish llucshichic.
Arcohuan macanacuc Lud llactamanta
soldadocunapish llucchichic.
10Chai punzhaca tucuita Mandac
Diospac punzhami canga.
Paita piñaccunataca llaquichina
punzhami canga.
Espadaca tucuita huañuchishpami,
yahuarsapa tucushpa,
machashca shina canga.
Tucuita Mandac Diosca
jahua lado llacta Eufrates yacu
patapimi yallita huañuchinga.
11¡Carihuan manarac chayarishca
soltera shina, Egipto runacunalla,
Galaad llactaman huichai rishpa,
balsamota apamugrichic!
Mashna jambicunata tandashpapish,
mana alli tucunguichicchu.
12Cancunata pingaichishcataca
shuctac llactacunapish ñami yachan.
Cancuna caparishcaca
tucui cai pachapimi uyarin.
Sinchi soldadoca caishuc sinchi
soldadohuan huactarishpami urman»
nishpami huillarca.
Jatun mandac Nabucodonosor Egiptopicausaccunata mishashcamanta13Babilonia llactata jatun mandac Nabucodonosor shamushpa, Egipto llactapi causaccunata llaquichinamanta Mandac Dios pai ima nishcata huillac Jeremiasman huillashpaca:
14«Egipto llactapi huillaichic.
Migdol, Menfis, Tafnes llactacunapi
huillashpa:
“¡Allichirishpa shayarichic.
Cancuna causacuc muyunditaca
espadahuanmi tucuchinga!” nichic.
15¿Ima nishpatac Apis nishca
dios huagraca tucurishca?
Mandac Dios urmachicpimi,
Apis nishca dios huagraca urmarca.
16Soldadocunaca yallita mitcarishpami
paicunapac jahuallapitac urmancuna.
Chashna urmashpaca:
“Jatariyari, ñucanchic llactaman,
ñucanchic huacharishca
llactaman jacuchic.
Jatun macanacuimanta
miticushpa callpashunchic” nincuna.
17Chaipi caparishpaca:
“¡Egipto llactata jatun mandac
Faraonca shimillami!
Macana horasca imata mana ruhuanchu”
nishpami caparirca.
18Ñucaca causacuc Jatun Mandacmi cani.
Ñuca shutica tucuita
Mandac Diosmi.
Soldadocunaca tucui urcucunamanta
yalli Tabor urcuta,
mama cucha ladopi tiyac Carmelo
urcuta yalli jatunmi chayamunga.
19Egiptopi causaccunalla,
prezu apacpi, ringapac
quipita allichichic.
Menfisca shitashca
pambami saquiringa.
Chaipi causaccunaca
shucllapish mana tiyangachu.
20Egipto llactaca
sumac vaquilla shinami.
Shina cacpipish, jahua llactamantaca
tucuchicmi shamucun.
21Cullquillamanta macanacuc
soldadocunapish huira beci shinami.
Paicunapish mana tigra
ricushpami callparca.
Llaquichina punzhacuna, huatacuna
shamushcamantami chashna callparca.
22Egiptopi causaccunaca
culebra shinami sas nishpa callpan.
Paicunata piñaccunaca
shuc yantac runa shinami
hachahuan shamun.
23Chai llaquichic runacunaca
langostacuna shinami
maita mana yupaipac,
mana yaicuipac jatun sachaman
yaicushpa, yuracunata tigrachinga.
Chaitaca Mandac Dios ñucami nini.
24Egipto llactapi causaccunaca
pingaichishcami canga.
Jahua llacta gentecunapac
maquipi churashcami canga» ninmi.
25Israelcunapac tucuita Mandac Diosca: «Ñucaca Tebas llacta Amón diosta llaquichishami. Faraontapish, pai mandacuc Egipto llactatapish, paicunapac dioscunatapish, paicunapac mandaccunatapish llaquichigrinimi. Faraontapish, paipi shunguta churashpa causaccunatapishmi llaquichisha.
26Paicunata huañuchisha niccunapac maquipi, Babilonia llactata jatun mandac Nabucodonosorpac maquipi, jatun mandacta serviccunapac maquipimi churasha. Shina cashpapish, quipataca punta punzhacuna shinallatacmi Egipto llactapi causanga. Chaitaca Mandac Dios ñucami nini.
Mandac Dios pai acllashcacunata quishpichinamanta27Mandac Diosca:
«Shina cacpipish, ñucata servic
Jacobolla, ama manchaichu.
Israelcunalla, ama manchaichicchu.
Ñucami cancunataca
caru llactamanta cacharichimusha.
Cancunapac huahuacunatapish
prezumanta quishpichimushami.
Jacobopac huahuacuna cutishpaca
imatapish mana manchashpami,
cushilla causanga.
Pipish mana manchachingachu.
28Ñucata servic Jacobolla,
ñucami canhuan cani.
Chaimanta ama manchaichu.
Canta ñuca llucchishpa cachacpi,
caita chaita rishpa causana
llactacunataca tucuchigrinimi.
Shina cashpapish cantaca
mana tucui tucuchishachu.
Ñuca caita, chaita cachacpimi,
shuctac llactacunapi causacungui.
Tucui chai llactacunatami tucuchisha.
Ashtahuanpish cantaca
mana tucuchishachu.
Chaipac randica, cashcata
ruhuashpami llaquichisha.
Canta llaquichinataca
manatac saquishachu» ninmi.
Who We AreWhat We EelieveWhat We Do
2025 by iamachristian.org,Inc All rights reserved.
